سپین اٹی رہینگوک آ پاکستانی تیکن بھلو ریلیف اس، ریذیڈنٹ کارڈ کن پاسپورٹ و دستاویزات ہفتہ ٹی جاری کننگ نا فیصلہ

اسلام آباد۔ 25 مارچ (اے پی پی ) بنجائی حکومت سپین اٹی رہینگوک آ پاکستانی تے کانودی حیثیت ترفنگ کن ہلہلہ ئی بنداو آ گام گیج آتا فیصلہ کرینے۔ بنجائی وزیر داخلہ محسن نقوی و بنجائی وزیر اوورسیز پاکستانیز سالک حسین نا کماشی ٹی اڈ ہلوک بڑزکو کہول انا دیوان اٹی فیصلہ کننگانے کہ سپینش ریذیڈنٹ کارڈ انا دوئی کننگ کن پاکستانی تے پاسپورٹ و ایلو المی سفری دستاویزآتا فراوانی اسہ ہفتہ نا تہہ ٹی  پک کننگک۔ اسپین اٹی غیرکانودی پردیسی تے کانودی حیثیت تننگ کن رجسٹریشن نا بناآن مست غٹ تعلقدار کاغد و پاسپورٹ آتے اسہ ہفتہ ٹی جاری کننگک۔ وزیر داخلہ محسن نقوی اسپین اٹی پاکستانی سفارت خانہ نا پاسپورٹ سیکشن کن دمدستی وڑاٹ ودکی عملہ فراوان کننگ نا پارت کرے۔ ہراڑے پاسپورٹ نا زوت جاری کننگ ءِ اولیت تننگانے ہموڑے پیدوار کننگانے کہ ڈوہدار یا درکار دوبہ دار ءِ پاسپورٹ اسُل جاری کننگپک۔ نیشنل پولیس بیورو نا کنڈآن کریکٹر سرٹیفکیٹ نا پک کننگ نا عمل ءِ آسان و ترند کننگانے تانکہ پردیسی تے ہرے تون مون تروئی تمپ۔ وزیر اوورسیز پاکستانیز سالک حسین پارے کہ اسپین نا دا اسکیم آن کم و ود 15 ہزار پاکستانی فائدہ ہرفرہ، اوسمندر پار پاکستانی تا کمکاری آ وزارت داخلہ نا کمکاری نا ستاءِ کرے و منت واری ءِ ہرفے۔ دیوان اٹی وزیر مملکت داخلہ طلال چوہدری، بنجائی سیکرٹریز، ڈی جی ایف آئی اے و نادرا کمامدار آک ہم بشخ ہلکر۔ اسپین اٹی پاکستان نا سفیر ڈاکٹر ظہور احمد و قونصل جنرل بارسلونا محمد علی وزیر بذریعہ زوم حوال ترسا پاریر کہ 10 ہزار بندغ آتے اتھارٹی لیٹر جاری کننگانے، غٹ ادارہ غاک دستاویز آتا وخت آ فراوانی کن مربوط وڑاٹ کاریم کنگ ءُ، اوفتا پاننگ ئس کہ کریکٹر سرٹیفکیٹ و پاسپورٹ نا جاری کننگ نا رفتاراٹی نمان ودکی مسنے۔