دے ٹک نیامی ٹی ودوک آ بے چیٹی نا رداٹ غٹ فریق آتا دشمنی نا چٹفنگ و ویل آتا پرامن ایسری کن کوشست کننگ اُن ، پاکستان

اقوام متحدہ۔ 25 مارچ (اے پی پی ) پاکستان پارینے کہ او دے ٹک نیامی ٹی ودوک آ بے چیٹی نا رداٹ غٹ فریق آتے دشمنی ءِ چٹفنگ و ویل آتا پُرامن ایسری نا کنڈآ اتنگ کن فعال کڑد ادا کننگ ءِ۔ داہیت ءِ اقوام متحدہ ٹی پاکستان نا آخبتی مندوب عاصم افتخار احمد تدوک آ دے دے ٹک نیامی نا حالیت آتیا سلامتی کونسل نا دیوان اٹی شرہ ٹی پارے۔ اوپارے کہ پاکستان ایلو شریدار آتون اواری اٹ دا مسخت نا مون آ دننگ کن لگوک ءِ، ڈیہہ داوخت آنازرک موڑاسے آ سلوک ءِ  ہراڑے گیشتر جھیڑہ و اوفتا دوررس اثرآتا خطرہ ساڑی ءِ۔ اونا پاننگ ئس کہ مہالو آن سنگین حالیت آتیٹی پین بےچیٹی آن ہرحال اٹ بچنگے ، غٹ فریق آتیان زیات آن زیات تحمل نا درشانی ءِ کننگ نا خواست ءِ کینہ۔ دیوان نا بناٹی دے ٹک نیامی امن عمل کن اقوام متحدہ نا نائب خصوصی رابطہ کار رمیز الاکباروف سلامتی کونسل نا قرارداد 2334(2016) آتے مون آتخا ہراٹی اسرائیل آن خواست کننگاسس کہ او مقبوضہ فلسطینی علاقہ بشمول دے ٹکی بیت المقدس اٹی بستی تا تفنگ ءِ بند کے۔ داوخت آ امریکی صدر ڈونلڈ ٹرمپ نا بورڈ آف پیس آ غزہ کن بڑزکو نمائندہ نکولے ملادینوف سلامتی کونسل نا قرارداد 2803(2025) نا نافذ کننگ آ ہم حوال تس ہراٹی غزہ جھیڑہ نا چٹفنگ کن امریکہ نا جوان ڈٹ آتے پک کننگاسس۔ پاکستانی مندوب پارے کہ فلسطین نا ایسرنا چاری ویل عرب اسرائیل جھیڑہ نا ماس ءِ ہرا نزوری ، بے چیٹی و ناانصافی ءِ ودفنگ ءِ۔