پاکستان نا آسیہ اندرابی ، فہمیدہ صوفی و ناہیدہ نسرین ءِ بنفوک آ سزا تا مذمت، مقبوضہ و جموں کشمیر اٹی انسانی حق آ جہانی چکار نا خواست

اسلام آباد۔ 25 مارچ (اے پی پی ) پاکستان پنی آ کشمیری سیاسی راہشون آسیہ اندرابی ءِ مچ آ زند بندی نا سزا بِنفنگ و اونا اِرا سنگت فہمیدہ صوفی و ناہیدہ نسرین ءِ ‘‘انسداد غیرکانودی سرجزآ تاایکٹ ’’ کون آ سخت کانود نا رداٹ 30، 30 سال بندی نا سزاتننگ ءِ یکسر مسترد کرسا پارینے کہ دافیصلہ انصاف نا خواست آتیان چپ و بھارت نا غیرکانودی کوزہ ٹی جموں وکشمیر اٹی بنداوی حق انا پدریسہ لتاڑنگ نا عکاسی ءِ کیک۔ ترجمان دفترخارجہ غان چارشنبے نادے آ جاری بیان اٹی پاننگانے کہ پاکستان دا فیصلہ ءِ سیاسی بنداوتیا جوڑ مقدمہ غاتا گیشتر چرجوئی نا بشخ تکک ہرانا مسخت اختلافی توار تے توننگ و کشمیری الس نا روا حق آتیکن توار بڑزکروک آتے خوفزدہ کننگ ءِ۔ اوپارے کہ دا سزاک کانودی خواست، عدالتی وتواجہی و جہانی انسانی حق انا زمواری تا پاسداری نا بابت سنگین گڑتی تے ودی کیرہ۔ بیان نا رداٹ آسیہ اندرابی بھلو وخت اسے آن کشمیر کاز انا اسہ گچین ءُ توار اس مسنے، اونا سزا و سخت سلوک بھارت نا غیرکانودی کوزہ ٹی جموں وکشمیر اٹی سیاسی درشانی و شاری آجوئی تا محدود مروک دنگ ءِ ظاہر کیک۔ اونا پاننگ ئس کہ پاکستان داہیت آ یخین تخک کہ داوڑنا گام گیج ڈیہہ اٹی بے چیٹی ءِ ودفک و سویلی ایشیا ٹی امن وسوگوی نا گمان تے نسخان ایتک۔ ترجمان پارے کہ پاکستان جہانی برادری خاص کر اقوام متحدہ و جہانی انسانی حق انا تنظیم تیان خواست کیک کہ او دا حالیت آتا دمدستی نوٹس ءِ ہلیر و بھارت ءِ مقبوضہ جموں و کشمیر اٹی اونا گام گیج آتا جوابدہ گوندفر۔ اوپارے کہ پاکستان کشمیری الس نا سیاسی، راجی و انسانی حق بشمول آجوئی درشانی و انصاف اٹ ٹرائل نا حق انا رکھ انا ہم خواست ءِ کیک۔ بیان اٹی پاننگانے کہ پاکستان اسہ وار ولدا بھارت نا غیرکانودی کوزہ ٹی جموں وکشمیر نا الس نا حق خودارادیت کن روا جہد نا پبی مخ تفی نا درشانی ءِ کیک ہرادے اقوام متحدہ نا سلامتی کونسل نا تعلقدار قرارداد آتیٹی امنا کننگانے۔