اسلام آباد۔ 25مارچ(اے پی پی) وزیراعظم محمد شہباز شریف سعودی سرکڑدہ غاتے غٹ فریق آتسکان پاکستان نا تعمیری سفارتی رسینگ نا بارواٹی پت اٹی ہلسا ساڑی آ تنکی ٹی سعودی عرب بھلا تحمل نا ستاء ءِ کرینے، و باوری کرفینے کہ پاکستان مدام سعودی عرب و ایلم الس تون سلک۔ پی ایم آفس نا میڈیا ونگ آن جاری بیان نا رداٹ وزیر اعظم شہباز شریف سعودی عرب نا ولی عہد …
وزیراعظم نا سعودی ولی عہد تون ٹیل فون آ گپ وتران، سعودی عرب و ایلم الس تون سلنگ نا عزم انا درشانی ءِ کرے
گیشتریں ھال
اسلام آباد۔ 25مارچ(اے پی پی) وزیراعظم محمد شہباز شریف سعودی سرکڑدہ غاتے غٹ فریق آتسکان پاکستان نا تعمیری سفارتی رسینگ نا بارواٹی پت اٹی ہلسا ساڑی آ تنکی ٹی سعودی عرب بھلا تحمل نا ستاء ءِ کرینے، و باوری کرفینے کہ پاکستان مدام سعودی عرب و ایلم الس تون سلک۔ پی ایم آفس نا میڈیا ونگ آن جاری بیان نا رداٹ وزیر اعظم شہباز شریف سعودی عرب نا ولی عہد شہزادہ محمد بن سلمان بن عبدالعزیز آل سعود تون چارشنبے نا دے آ ٹیل فون آ گپ وتران کرے۔ بیان نا رداٹ خوشگوار گپ وتران اٹی وزیراعظم محمد شہباز شریف خادمین الحرمین الشریفین شاہ سلمان بن عبدالعزیز آل سعود، ولی عہد شہزادہ محمد بن سلمان و سعودی عرب نا ایلم الس ءِ چنکا عئید انا مبارکبادی تس۔ سعودی ولی عہد شہزادہ محمد بن سلمان ہم وزیراعظم محمد شہباز شریف ءِ عئید انا مبارکبادی تس، و نیک است خواہی نا درشانی ءِ کرے۔ وزیراعظم سعودی عرب ساڑی آ جلہو آتا پاکستان نا کنڈآن شدید مذمت نا درشانی ءِ کرسا اسہ وار ولدا دا مشکل وخت اٹی ہم ملک و اونا الس کن پاکستان نا پورو یکجہتی و مخ تفی نا درشانی ءِ کرے۔ ساڑی آ تنکی ٹی بھلا تحمل نا درشانی ءِ کننگ مملکت نا سرکڑدہ غاتا ستاءِ کرسا وزیراعظم باوری کرفے کہ پاکستان مدام مملکت سعودی عرب و ایلم الس تون سلک، ہراوڑ او مدام پاکستان نا مخ تفی ءِ کرینو۔ وزیراعظم محمد شہباز شریف دمدستی وڑاٹ جنگ بندی نا چٹفنگ و حالیت آتا معمول آ بننگ آ زور شاغا ہرانا مہالو آن زیات گرج ءِ۔ او سعودی ولی عہد ءِ غٹ فریق آتسکان پاکستان نا تعمیری سفارتی رسینگ نا بارواٹی معلومدار کرے، ہراٹی بے چیٹی ءِ کم کننگ و اختلاف آتے مذاکرات و سفارتکاری نا کمک اٹ ایسر کننگ آ زور شاغنگانے۔ سعودی ولی عہد پاکستان نا امن کوشست آتا ستاء ءِ کرے۔ ہڑتوم آ راہشونک ہڑتوم آ ملک آتا نیام اٹ ہر کہول آ خڑکی رابطہ ءِ برقرار تننگ آ امنا کریر۔
