پاکستان نا خارجہ پالیسی وقار، سوگوی و امن کن پکا عزم نا عکاسی ءِ کیک ، بنجائی وزیر پارلیمانی امور

اسلام آباد۔ 24 مارچ (اے پی پی) بنجائی وزیر پارلیمانی امور ڈاکٹر طارق فضل چوہدری پارینے کہ پاکستان نا ساڑی آ خارجہ پالیسی وقار، سوگوی و امن کن پکا عزم نا عکاسی ءِ کیک ، اودے وزیراعظم محمد شہباز شریف، نائب وزیراعظم محمد اسحاق ڈار و فیلڈ مارشل سید عاصم منیر دور اندیشی اٹ مون آ دننگ اُن ۔سے شنبے نا دے ایکس آ جاری بیان اٹی او پارے کہ اینو نا بے پک و جھیڑہ غاتیان پُر آ جہانی چاگڑد اٹی پاکستان امن، گپ وتران و تین پہ شرف ءِ مون آ دننگ کن نمان کڑد ادا کننگ ءِ ۔ او پارے کہ پاکستان نا موقف مدام انصاف، مظلوم قوم تا مخ تفی و ڈیہہ اٹی سوگوی نا قیام نا حق اٹی مسنے و جہانی کچ آ اونا توار ہم گرنچی، سیوت و انسانیت نا کلہو نا وڑ اٹ بننگک۔اونا پاننگ ئس کہ مشکل آتیان پد ہم پاکستان ثابت قدمی نا درشانی ءِ کرے ، ننا سرکڑدہ غاک بیرہ جہانی تعلقداری تے گچین کریر بلکن پاکستان نا مثبت دروشم ءِ ہم مون تالان کریر ، دا اسہ ہندن ءُ ملک اسے ہرا امن، تین پہ تینی کمک و شونداری آ یخین تخک۔ او پارے کہ اینو پاکستان بیرہ تینا فائدہ غاتا رکھ ءِ کپننگ ءِ بلکن اسہ گچین و پرامن آ آخبت نا بنداو ءِ ہم تخنگ ءِ ہراڑے اختلاف آتا جاگہ غا مکالمہغالب مرے۔ اونا پاننگ ئس کہ دنیا داسہ پاکستان ءِ اسہ ہندن ءُ ملک اسے نا وڑ اٹ ہُننگ ءِ ہرا امن ءِ اولیت ایتک ولے تینا وقار و اصول آتیا ہم ڈٹ کر سلک ۔