پاکستان نا روس اور یوکرین نا نیام اٹی دمدستی جنگ بندی ، بامعنی مذاکرات نا خواست

اقوامِ متحدہ ۔ 24 مارچ (اے پی پی) پاکستان روس اور یوکرین نا نیام اٹی دمدستی جنگ بندی و امن مذاکرات نا زوت بحالی نا خواست کرسا داہیت آ زور شاغانے کہ دانا ہچ ءُ فوجی ایسری اس ساڑی اف۔ دا ہیت آتے اقوامِ متحدہ ٹی پاکستان نا آخبتی مندوب عاصم افتخار احمد سلامتی کونسل اٹی یوکرین نا حالیت آتیا شرہ ٹی پارے۔ او پارے کہ روس اور یوکرین نا دا جنگ پنچ میکو سال اٹی پترینگانے ۔ پاکستانی مندوب پارے کہ اسہ منصفانہ اور پائیدار امن بیرہ پدریسہ ، منظم و بامعنی مذاکرات نا کمک اٹ ہی دوئی کننگ مریک ۔ او پارے کہ پاکستان دا جنگ نا اول سر آن ہی ہیت و گپ اور سفارت کاری نا مخ تفی ءِ کرینے، انتئے کہ دا جنگ الس، اوفتا زرگزران ، ملک اور مچ آ ڈیہہ ءِ بھاز نسخان تسنے۔ او مستی پارے کہ دا مرغن جنگ جہانی بشخ و پانٹ ءِ پین زیات کرینے کثیر الجہتی نظام ءِ نزور کرے وپرامن ایسری نا کوشست آتے پیچیدہ کرینے ۔سلامتی کونسل نا دا دیوان امریکہ نا کماشی ٹی مس، ہراڑے امریکی نائب وزیر خارجہ کرسٹوفر لینڈاؤ کماشی ءِ کرے۔ پاکستانی مندوب پارے کہ لس شاری دا جنگ انا غٹ زیات بھاریم ءِ ہرفنگ ءُ ، ہرافتے جانی نسخان، بے اُرا مننگ و اُرا و بنداوی پنجر نا بھسکاری مون تروک ءِ ۔ او پارے کہ السی تکلیف آک دمدستی وڑاٹ داہیت انا خواہندار ءُ کہ شاری تا رکھ و پرامن ایسری ءِ اولیت تننگے ۔ او است ہسونی نا درشانی ءِ کرے کہ دے ٹک نیامی ٹی اسہ پین تنکی اس یوکرین نا مذاکرات نا عمل ءِ زہمی کرینے، ولے او اومیت ظاہر کرے کہ مذاکرات نا بروک آ دور زوت بناکیک ،غٹ فریق آک حقی سیاسی عزم انا درشانی ءِ کیر ہ و تین پہ تینی پت ءِ مون آدیرہ و تعمیری وڑاٹ اوار مرسا سنجیدہ کوشست آتون امن کن مون آ بریرہ ۔ پاکستانی مندوب پارے کہ پائیدار امن کن اقوامِ متحدہ نا منشور نا اصول آتا پاسداری اور غٹ فریق آتا روا سکیورٹی فائدہ غاتے مون آ تخسا قابل قبول ایسر اس پٹنگ المی ءِ ۔