ایلو ملک آتیان چپ پاکستان پیٹرولیم مصنوعات آتا بابت متوازن و محتاط حکمتِ عملی اس تیناکرے، نرخ آتیٹی ودکی نا کچ 22 آن 24 درسد ئس، سلاہکار وزیرخزانہ

اسلام آباد ۔ 24 مارچ (اے پی پی) وزیرِ خزانہ نا سلاہکار خرم شہزاد پارینے کہ جہانی منڈی ٹی ایندھن نا نرخ آتیٹی ودکی نا منظرنامہ ٹی پاکستان نسبتاََ متوازن و محتاطِ حکمت عملی اس تینا کرسا مالیاتی سوگوی و السی فائدہ غاتا نیام اٹ توازن ءِ برقرار تخنگ نا کوشست کرینے، ایلو ملک آتیان چپ پاکستان اٹی پیٹرولیم مصنوعات آتا نہاد آتا ودکی نا کچ 22 آن 24 درسد نا نیام اٹ مسنے۔ سے شنبے نادے آ راجی رابطہ نا ویب سائٹ ’’ایکس‘‘ آ تینا اسہ بیان اسے ٹی سلاہکار خزانہ پارے کہ جہانی کہول آ ایندھن نا نرخ آتیٹی ساڑی آ ہفتہ غاتیٹی نمان ودکی ریکارڈ کننگا ، چندی ملک آک خاص کر ڈیزل نا نہاد آتیٹی بھلو کچ اسے آ ودکی صارف آتسکان منتقل کرینن۔سلاہکار خزانہ پارے کہ زرگزرانی جاچ آتا رداٹ شون ہلوک و مون آ بروک زرگزران تیٹی ساڑی آ دے تیٹی ایندھن نا نہاد آتیٹی ترندی اٹ ودکی مون آ بسنے ، جہانی کہول آ ڈیزل و پیٹرول نا نہاد آتیٹی ودکی پاکستان نا مقابلہ ٹی بھاز زیات ئسر، ہراڑے کیہی ملک آتیٹی نہاد آک 27 آن 71 درسد یا اوکان ہم زیات ودفنگار وخت اس کہ پاکستان اٹی ودکی نسبتاََ محدود رہینگسا 22 آن 24 درسد نا نیام اٹ ئس۔اوپارے کہ چندی ملک آک خاص کر مون آ بروک زرگزران آک جہانی کہول آ نرخ آتیٹی ودکی نا دھچکہ غاتے دمدستی و بھلو کچ اسے آ صارف آتسکان گدریفیر ، ہراٹی ہندی کہول آ ایندھن نا نہاد آتیٹی نمان ودکی مون آ بس۔ اوپارے کہ پیٹرولیم مصنوعات آتیا خراج آتا بابت حساب وکتاب آن پاش مننگ ءِ کہ  پاکستان اٹی دا مصنوعات آتیا ریٹیل خراج نا جم کچ 25 درسد ءِ  ہراٹی ڈیزل آ 16 درسد اور پٹرول آ 33 درسد خراج اوار ءِ  ۔ دا کچ ڈیہہ انا اوسط 35 درسد نا مقابلہ ٹی کم ءِ ۔ وخت اس کہ پاکستان اٹی سیلز خراج نا کچ صفر درسد تخنگانے  خوبصورتِ پین 18درسد مننگ کریکہ او پارے کہ پاکستان نا کنڈ آن نرخ آتیٹی رد و بدل نسبتاََ اعتدال پسند و ریسہ ور تخنگانے ہرا اسہ سجفوک و متوازن طرزعمل نا عکاسی ءِ کننگ ءِ و ہرا نا مسخت اسہ کنڈآ مالیاتی نظم وضبط ءِ برقرار تخنگ و ایلو کنڈآ الس آ بھاریم ءِ کم آن ک کننگ تخنگ ءِ۔ اوپارے کہ جہانی رجحان تیان داہم ظاہر ءِ کہ بھلو وخت اسسکان سبسڈی برقرار تخنگ نا گنجائشت مچ آ دنیا ٹی محدود مرسا کننگ ءِ و گیشتر زرگزرانک پدریسہ نہاد آتے حقی کہول آ اتنگ نا کنڈآ ہِننگ ءُ۔