پیرس ءَ پاکستانی سفارت خانہ ءَ پاکستان ءِ روچ ءِ درگت ءَ پرچم ءِ ایر کنگ ءِ مراگش

پیرس۔23مارچ (اے پی پی): پاکستان ءِ روچ ءِ درگت ءَ پیرس ءَ پاکستان ءِ سفارت خانہ ءَ یک سادہ ءُ شرپداریں بیرک ءِ ایر کنگ ءِ مراگش برجم دارگ بوت۔ اے مراگش ءَ مزنیں کساسے ءَ پاکستانی کمیونٹی ءِ مردم ءُ سفارت خانہ ءِ کارندہ آں بہر زرتگ۔ مراگش ءِ دمگ ءِ انوگیں جاور ءُ سرکاری ہدایتانی رد ءَ گوں سادگی ءُ اختصار ءَ برجم دارگ بوتگ۔ ادا رسوکیں پریس ریلیز ءِ رد ءَ اے موہ ءِ سر ءَ صدر، مزن وزیر ءُ دری کارانی وزیر ءِ نیمگ ءَ چہ ھم کلوہ وانگ بوت۔

مراگش ءَ گوں گشتانک دیان ءَ فرانس ءَ پاکستان ءِ سفیر ممتاز زہرا بلوچ ءَ راج ءِ پِت محمد علی جناح ءِ رژنائیں سروکی ءَ را شگر ءُ منت دات۔ آئی ءَ پاکستانی راج ءِ دلیری ءُ محکمی ءِ توسیپ کت ءُ گوشت کہ راج ءَ وتی راجدپتر ءِ ھمک مشکل ءَ گوں دلیری ءُ یکوئی ءَ گوں دیم پہ دیم بوتگ۔ گوستگیں سال ءِ مئی ءَ راستی ءِ جہد ءُ آپریشن بنیان مرسوس ءُ غادب الحق ءِ حوالہ ءَ آئی ءَ گوشت کہ پاکستان ءَ وتی وت واجہی ءُ علاقائی یکوئی ءِ رکھینگ ءِ واستہ بے دروریں جزم ءِ درشان کتگ۔ ممتاز زہرہ بلوچ ءَ گشتگ کہ پاکستان ءِ روچ ءِ درگت ءَ ہما مردماں شموشگی نہ انت کہ آ زلم ءُ دری قبضہ ءِ آماچ انت۔ آئی ءَ فلسطین ءِ اُلس ءُ بھارتی ناجائزیں رنگ ءَ قبضہ کتگیں جموں ءُ کشمیر ءِ واستہ پاکستان ءِ برجاھیں سفارتی ءُ سیاسی کمک ءِ پدرائی کت۔ پاکستانی سفیر ءَ پاکستان ءُ فرانس ءِ نیام ءَ سیادی ءِ ارزشت ءِ سر ءَ ھم زور پر دات ءُ دوئیں ملک آنی نیام ءَ وت مہ وتی سیادی، بیپار ءُ سرمایہ کاری ءَ را دیمروئی دیگ ءِ واستہ جزم ءِ سر ءَ پدا زور پر دات۔ آئی ءَ فرانس ءَ نندوکیں پاکستانی کمیونٹی ءِ ازمت آناں ساڑاتگ ءُ گوشت کہ اے دوئیں ملک آنی نیام ءَ مردم آنی نیام ءَ مردم آنی سیادی ءَ را گیش مھکم کنگ ءَ ھاسیں کرد پیلو کنگ ءَ انت۔