جھان ءِ مارکیٹ ءَ پٹرولیم ءِ نھاد ءِ تہ ءَ گیشی ءِ باوجود مزن وزیر ءَ 70 ارب ءِ بار حکومت بلال اظہر کیانی ءِ سر ءَ دیم داتگ

اسلام آباد۔ 23 مارچ(اے پی پی) ھزانگ ءُ ریلوے ءِ وزیر ءِ مملکت بلال اظہر کیانی ءَ گوشت کہ جھان ءِ مارکیٹ ءَ تیل ءِ نھاد آنی تہ ءَ مزنیں گیشی ءِ باوجود مزن وزیر شہباز شریف ءَ مہنگائی ءِ مزنیں طوفان ءَ چہ الس ءَ را رکینتگ۔ مزن وزیر ءَ اوگرا ءِ نیمگ ءَ پٹرول ءُ ڈیزل ءِ نہاد ءَ دو رند ءَ گیش کنگ ءِ تجویز رد کتگ ءُ نزیک 70 ارب کلدار ءِ بار سرکار ءِ سر ءَ دیم داتگ۔ دو شمبے ءِ روچ ءَ نجی ٹی وی چینل ءَ گوں تران کنان ءَ وزیر ءِ مملکت بلال اظہر کیانی ءَ گوشت کہ خطہ ءَ برجاھیں جنگ ءِ سبب ءَ سرجمیں دگنیا ءِ معیشت دباؤ ءِ آماچ انت ءُ تیل ءِ نرخ گیش بوھگ ءَ انت بلے حکومت ءِ اولی ترجی ایش انت کہ عام شہری ءَ را ایشی ءِ اثرات ءَ چہ رکھینگ بہ بیت۔ آئی ءَ درائینتگ کہ گوستگیں دو ھپتگ ءِ تہ ءَ پٹرول ءُ ڈیزل ءِ نھاد برجائی ءِ واستہ حکومت ءَ را 24ارب ءُ پدا 45 ءَ چہ 50ارب کلدار ءِ مزنیں تاوان بوتگ۔ بلال اظہر کیانی ءَ اے گپ ءِ پدرائی کت کہ ہائی آکٹین ​​ءِ نرخ ءِ تہ ءَ گیشی ءَ چہ 9 ارب کلدار ءِ زرّ اے تاوان ءَ را کم کنگ ءُ عام مردم ءَ را ایندھن ءِ سبسڈی دیگ ءِ واستہ کارمرد کنگ بیت۔ آئی ءَ گوشت کہ ہائی آکٹین ​​ایوک ءَ لگژری ءُ مزنیں درآمدیں گاڑی آنی تہ ءَ کارمرد کنگ بیت (مرسڈیز، آڈی، بی ایم ڈبلیو)، ءُ ھما مردم کہ آھانی تہ ءَ وسیلہ ھست کہ آ کروڑ آنی مالیت ءِ گاڑی آنی برداشت ءَ کن اَنت آ ھم اے گیشیں بوجھ ءَ برداشت کن اَنت۔ وزیر ءِ مملکت ءَ حکومتی گامگیج آناں پدر کنان ءَ گوشت کہ مزن وزیر ءَ نہ ایوک ءَ الس آناں ریلیف داتگ بلکینگ ءَ حکومت ءِ واستہ سختیں پیسلہ ھم کتگ۔ کفایت شعاری ءِ مہم ءِ رد ءَ سرکاری گاڑی آنی تہ ءَ ہائی آکٹین ​​ءِ کارمرد کنگ ءِ سر ءَ سرجمیں بندش جنگ بوتگ۔ نوں اگاں کسے سرکاری کارندہ وتی گاڑی ءَ ہائی آکٹین ​​کارمرز کنگ لوٹیت گڑا آئی ءَ چہ وتی جیب ءَ زرّ دیگی اِنت۔ آئی ءَ گوشت کہ مزن وزیر ءَ نہ ایوک ءَ پٹرولیم ءِ جیڈھ ءَ گوں گر ءُ چیل بوھگ ءِ واستہ کمیٹی جوڑ کتگ بلکیں کفایت شعاری ءِ مہم ءِ تہ ءَ 60درسد سرکاری گاڑی آناں زوت گراؤنڈنگ (کارمرز بند کنگ) ءِ پرمان ھم داتگ ءُ توامیں محکمہ آنی ایندھن ءِ کوٹہ ءَ 50درسد کمی ءِ پرمان ھم داتگ۔ اے درستیں گامگیج آنی مول ءُ مراد ایش انت کہ راجی وسیلگ آناں اشرافیہ ءِ بدل ءَ راج ءِ ریلیف ءِ نیمگ ءَ دیم پہ دیم کنگ بہ بیت دانکہ موٹر سائیکل ءُ کسانیں گاڑی آنی کارمرد کنوکیں طبقہ ءَ را ھچ وڑیں تاوان مہ رسیت۔