پنجاب ءِ صنعت ءُ تجارت ءِ وزیر ءَ چینی قونصل خانہ ءِ تر ءُ تاب کتگ، چینی قونصل جنرل لاہور ءَ گوں گند ءُ نند

لاہور۔22مارچ (اے پی پی): پنجاب ءِ صنعت ءُ تجارت ءِ وزیر چوہدری شفیع حسین ءَ چین ءِ قونصل خانہ ءِ تر ءُ تاب کتگ ءُ چین ءِ نوکیں قونصل جنرل واجہ سن یان ءَ گوں گند ءُ نند کتگ۔ صوبائی وزیر ءَ نوکیں قونصل جنرل ءَ را لاہور ءَ اگدہ ءِ سر ءَ نندگ ءِ پد ءَ مبارک بات دات۔ گند ءُ نند ءِ ساھت ءَ سرمایہ کاری ءَ را دیمروئی دیگ ءِ واستہ صنعت ءِ محکمہ ءُ قونصل خانہ ءِ نیام ءَ یکجائی ورکنگ گروپ ءِ جوڑ کنگ ءِ سر ءَ تپاک کنگ بوت، ءُ انفارمیشن ٹیکنالوجی، ای وی سیکٹر، صنعت، زراعت ءُ ایندگر شوبگ آنی تہ ءَ وت مہ وتی کمک ءَ را گیش کنگ ءِ سر ءَ تپاک کنگ بوت۔ صوبائی وزیر ءَ پنجاب ءِ ھاسیں اقتصادی زون آنی تہ ءَ سرمایہ کاری ءِ موہ ءُ چینی کمپنی آنی نیمگ ءَ سرمایہ کاری ءِ بابت ءَ سرپد کت۔ اے موہ ءِ سر ءَ چوہدری شفیع حسین ءَ گوشت کہ مزنیں چینی کمپنی آنی نیمگ ءَ پنجاب ءِ جتا جتائیں شوبگ آنی تہ ءَ ارباں کلدار سرمایہ کاری کنگ بوتگ، چین ءِ ویبو موبائل فون کمپنی پاکستان ءَ اولی رند ءَ چپ فریم ءِ جوڑ کنگ بندات کنگ ءَ اِنت، ءُ ماڈرن ایگریکلچر گروپ ءِ گوما یکوئی کمک ءِ معاہدہ ءِ سر ءَ دستخط کنگ بوتگ۔ آئی ءَ گوشت کہ ٹیکسٹائل ءِ شوبگ ءَ گوں ھمگرنچیں چین ءِ چیلنج گروپ ادا 2 نوکیں کارخانہ جوڑ کنگ ءَ اِنت ایشی ءَ چہ 21ہزار نوکیں روزگار ءِ موہ پیداک بنت ءُ قائد آباد ءَ سالٹ رینج ءِ نزیک ءَ نوکیں صنعتی اسٹیٹ جوڑ کنگ بوھگ ءَ اِنت، ایشی ءِ تہ ءَ گلابی نم ءِ واستہ ویلیو ایڈیشن فیکٹری جوڑ کنگ بنت۔ آئی ءَ گوشت کہ ھاسیں اقتصادی زون آنی تہ ءَ جھان ءِ تک ءِ صنعتی بنیاتی ڈھانچہ دست کپ ایت ءُ صنعت ءِ لوٹ آنی رد ءَ نوکیں صنعتی اسٹیٹ ھم جوڑ کنگ بوھگ ءَ انت۔ آئی ءَ گوشت کہ چینی سرمایہ کار پنجاب ءَ پچیں دل ءَ گوں سرمایہ کاری بہ کن اَنت، ھمک ممکنیں آسراتی پجاری کنگ بیت، چینی سرمایہ کار ءُ آھانی پنجاب ءَ سرمایہ کاری ءِ سرجمی ءَ رکھینگ بیت۔ آئی ءَ گوشت کہ پاکستان ءُ چین ءِ دائمی دوستی ءَ را لبز آنی تہ ءَ بیان کنگ نہ بیت، ءُ دوئیں ملک آنی نیام ءَ السی تک ءَ ھم مھکمیں سیادی است انت۔ آئی ءَ گوشت کہ جنگ بہ بیت یا امن، سیلاب یا زمین چنڈ بہ بیت یا دگہ کجام ھم قدرتی آفت چین مدام سنگ ءِ رنگ ءَ پاکستان ءِ کش ءَ اوشتاتگ ءُ آیوکیں روچ آنی تہ ءَ دوئیں ملک آنی دوستی ءُ اقتصادی سیادی گیش مھکم بنت۔ صوبائی وزیر ءَ چین ءِ تر ءُ تاب ءِ وھد ءَ پنجاب ءَ سرمایہ کاری ءِ ھوالگ ءَ چینی کمپنیانی گوما بوتگیں معاہدہ آنی بابت ءَ ھم سرپد کت۔ چین ءِ قونصل جنرل سن یان ءَ گوشت کہ لاہور پاکستان ءِ راجدپتری، مہذب ءُ دود ءُ ربیدگی شہر انت ایشی ءِ واستہ ادا تعینات کنگ شرپ ءِ گپ انت۔ آئی ءَ گوشت کہ ما چین ءُ پاکستان ءِ نیام ءَ دوستی ءُ اقتصادی کمک ءَ را ارزشت دئیں، چین ءُ پاکستان اقتصادی راہداری دوئیں ملک آنی نیام ءَ دوستی ءُ اقتصادی کمک ءِ مزنیں درور انت۔ آئی ءَ گوشت کہ پنجاب ءَ چینی کمپنی آنی سرمایہ کاری ءَ را گیش کنگ ءِ واستہ ھمک رنگ ءِ کوشست کنگ بیت، چین ءُ پنجاب ءِ نیام ءَ اقتصادی کمک ءَ را گیش کنگ ءِ واستہ جوانیں گامگیج چست کنگ بیت۔ آئی ءَ گوشت کہ پنجاب سرکار ءِ شگر ءُ منت وار آں کہ آئی ءَ چینی آناں جوانیں سیکورٹی داتگ۔ گند ءُ نند ءَ پنجاب انویسٹمنٹ بورڈ ءِ ڈائریکٹر ڈاکٹر عمران ہاشمی ءُ چین ءِ قونصل خانہ ءِ کارندہ ہم ساڑی اتنت۔