اسلام آباد ءِ مہلوک ائید ءِ دومی روچ ءَ پہ تر ءُ  تاب ءِ واستہ پارکاں رھادگ بنت

اسلام آباد۔22مارچ (اے پی پی): یک شمبے ءِ روچ ءَ عید الفطر ءِ دومی روچ ءَ وفاقی دارالحکومت ءِ تفریحی جاھاں مزنیں کساسے ءَ سیل ءُ سواد کنوک اتکگ اَنت۔ عید الفطر ءِ یاتگار کنگ ءِ ھاترا ھاندان ءُ سنگتاں مزنیں کساسے ءَ پارک ءُ دلگوش ءِ جاھاں رھادگ بوتگ اَنت۔ شکرپاریان، لیک ویو پارک ءُ دامن کوہ ءَ ھواریں شنگ ءُ تالانیں جاہاں سرجمیں روچ ءَ مردمانی ھژدری بوتگ۔ ایشی ءَ چہ پیسر دارالحکومت انتظامیہ ءَ اے جاگہ ​​ائید ءِ چھٹیانی وھد ءَ شہری آنی آسراتی ءِ واستہ 20 مارچ ءَ بگر داں 23 مارچ ءَ فیملی پارک ءِ جار جتگ ات۔ فاطمہ جناح پارک ایف 9 ءَ سیل ءُ سواد کنوکیں مردمانی مزنیں کساسے ھم گندگ بوتگ کہ آ بہار ءِ وشیں موسم ءُ ائید ءِ میلہ ءَ چہ وش ءُ وشحال گندگ بوتگ اَنت۔ تفریحی جاہ ءُ پارکاں ساہگیں درچک ءِ چیر ءَ جتا جتائیں ھاندان یکجاہ بوتگ اَنت وھدے کہ زھگ گوازی کنگ ءَ گندگ بوتگ اَنت۔ بچکانی بے گناہیں کاراں اے ساھت یاتگار کتگ اتنت۔ بازیں مردماں ھم وتی چکانی ویڈیو جوڑ کنگ ءَ اتنت کہ اے ساھتاں بہ رکّین انت۔ فوڈ اسٹال ءُ دکاناں ھم رش ءُ شور بوتگ۔ مردماں چہ جتا جتائیں روایتی وراک ءُ ناناں وش ءُ وشحالی برجاہ داشت ءُ ائید ءِ میلہ یک وشیں تامے جوڑ بوت۔ بازیں سیل ءُ سواد کنوکاں پارک ءُ دلگوش ءِ جاہانی سٹالاں چہ ورگ ءُ چرگ ءِ بھا زورگ برجاہ داشتگ ءُ لھتیں ھانداناں چہ لوگ ءَ تیار کتگیں ورگ آورتگ اَنت کہ ایشی ءَ چہ ائید ءِ وشیں کار دوگنا بوتگ اَنت۔ ائید ءِ دومی روچ ءَ مزنیں کساسے ءَ مردم ھم وتی نزیکیں مردم، سنگت ءُ وارسانی گند ءُ نند ءَ سر بوتگ اَنت۔ بازیں مردماں گوں کوھنیں زانتکاراں ھم رابطہ کتگ، فون کتگ ءُ ائید ءِ مبارکی ھم داتگ۔ اے پی پی ءَ گوں گپ ءُ تران کنان ءَ لیک ویو پارک ءَ آیوکیں سیل ءُ سواد کنوک ءَ گشتگ کہ ائید ءِ روچ ایوک ءَ منگ نہ انت بلکیں مئے نزیکیں مردماں گوں دوبر رابطہ کنگ ہم انت۔ آئی ءَ گْوشت کہ ما سھب ءَ وتی سیاد ءُ وارسانی گند ءُ نند ءَ شُتیں ءُ پد ءَ اِدا اتکگیں کہ گوں ھاندان ءَ وھد گوازین ایں۔ آئی ءَ گوشت کہ اے رنگیں تر ءُ تاب ءُ تامر ائید ءَ را گیش وش ءُ یاتگار جوڑ کن اَنت۔ یک لوگبانک انام ءَ گْوشتگ: من سُھب ءَ وتی لوگ ءَ سیاد ءُ وارسانی میزبانی ءَ گوازینتگ، من وتی مہمانانی واستہ شیر کھرمہ ءُ دگہ روایتی ورگ جوڑ کتگ اَنت، پد ءَ ما پارک ءَ شُتیں کہ زھگ اوپن ایئر ءِ سرگرمیاں چہ وش ءُ وشحال بہ بنت۔ آئی ءَ گوشت کہ ائید ءِ سیادی گوں ھاندان ءِ دود ءُ ربیدگاں اِنت ءُ زھگ ھاسیں رنگ ءَ ھما کہ وتی پیرین آنی نیمگ ءَ چہ ائید ءِ رسگ ءَ اَنت آ وتی پسند ءِ وشیں کار ءُ وردن ءِ چیز آنی سر ءَ گوازینگ ءِ ودار ءَ اَنت۔ دگہ بازیں سیل ءُ سواد کنوکاں ھم ھمے رنگیں جزبگ درشان کتگ ءُ گوشت کہ سرکاری پارک آنی تہ ءَ ھاندان آنی واستہ یک ارزانیں ءُ وشیں آسراتی یے رس ایت کہ آ یکجاھی ءَ ائید ءِ روچ ءَ برجم بہ دار اَنت۔ ھما جاہ ءَ کہ ورنا جتا جتائیں سواری ءَ چہ وشھال بوھگ ءَ گندگ بوتگ اَنت وھدے کہ مزنیں مردماں آرام دہ ماحول ءَ چاگردی، زندگ ءُ ھواریں میلہ ءِ سر ءَ ھیال ءُ لیکہ کتگ۔ اسلام آباد انتظامیہ ءُ پولیس ءَ مزنیں تفریحی جاہ آنی سر ءَ سیکورٹی ءِ ھاتر ءَ ھاسیں بندوبست کتگ تانکہ سیل ءُ سواد کنوک آنی واستہ ایمن ءُ وشیں تجربگ ءِ ھاتر ءَ دل یکیمی کنگ بہ بیت۔ سیکورٹی کارندہ داخلہ ءُ درآہگ ءِ جاہ آنی سر ءَ ایر کنگ بوتگ اَنت وھدیکہ نگرانی ءِ گامگیج ھم گندگ بوتگ اَنت کہ آ لس مھلوک ءَ را جوانیں رنگ ءَ دیم ءَ برگ ءَ اَنت۔ اے موہ ءِ سر ءَ جتاجتائیں خیراتی ادارگاں گریب آنی تہ ءَ وردن ءُ پوشاک ءِ بھر ءُ بانگ ءَ چہ ائید ءِ میلہ ءِ روح ءَ برجم داشتگ ءُ اے گپ ءَ دل یکیمی کتگ کہ ائید ءِ وشی چاگرد ءِ توامیں تک ءُ پھنات آنی دست ءَ بہ بیت۔ ائید ءِ دومی روچ ءَ سرجمیں دارالحکومت ءَ ھبکّہی، مچی ءُ یکجاھیں ورگ ءِ گوما یک وشیں ماحولے گندگ بوتگ کہ ایشی ءِ تہ ءَ یکے دومی ءِ براتی ءُ وشھالی ءِ بندش گندگ بوتگ اَنت۔