مزن وزیر شہباز شریف ءَ انڈونیشیا ءِ صدر سوبیانتو ءَ گوں فون ءِ سر ءَ گپ ءُ تران کتگ، دوئیں رہشوناں خلیج ءَ کش ءُ چیل ءِ زوتیں ھلاسی ءِ سر ءَ زور داتگ

لاہور۔22مارچ (اے پی پی): پاکستان ءُ انڈونیشیا ءِ سروکی ءَ گپ ءُ تران ءُ سفارتکاری ءِ وسیلگ ءَ درستیں اختلاف آناں گیش ءُ گیوار کنگ ءِ ضلورت ءِ سر ءَ زور پر داتگ وھدیکہ مزن وزیر محمد شہباز شریف ءَ پاکستان ءُ انڈونیشیا ءِ نیام ءَ راجدپتری ءُ براتی سیادی ءَ را گیش مھکم کنگ ءِ وتی جزم ءِ سر ءَ زور پر دات ءُ سرجمیں دمگ ءِ تہ ءَ دو نیمگی کمک ءَ را دیمروئی دیگ ءِ واھشت ءِ درشان کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ یک شمبے ءِ روچ ءَ انڈونیشیا ءِ صدر پرابو سوبیانتو ءَ گوں فون ءِ سر ءَ گپ ءُ تران کتگ۔ گرم ءُ دوستی ءَ گپ ءُ تران ءِ ساھت ءَ مزن وزیر شہباز شریف ءَ انڈونیشیا ءِ صدر ءُ اودا براتیں اُلس ءَ را عید الفطر ءِ موہ ءَ مبارکی دات۔ انڈونیشیا ءِ صدر ءَ مزن وزیر ءَ را عید الفطر ءِ موہ ءَ ھم مبارکی دات۔ دوئیں راہشوناں وتی وتی راج ءُ مسلمان امت ءِ واستہ امن ءُ ایمنی ءُ وشحالی ءِ دعا کتگ۔ مزن وزیر ءَ پاکستان ءُ انڈونیشیا ءِ نیام ءَ راجدپتری ءُ براتی سیادی آناں گیش مھکم کنگ ءِ واستہ وتی جزم ءِ سر ءَ زور پر دات ءُ وت مہ وتی نپ ءِ توامیں پڑ آنی تہ ءَ دو نیمگی کمک ءَ را دیمروئی دیگ ءِ واھشت ءِ درشان کت۔ دوئیں رہشوناں دمگ ءِ نوکیں وئیل ءُ ھاسیں رنگ ءَ ایران ءُ خلیج ءِ دمگ ءَ برجاھیں تناؤ ءِ بابت ءَ ھم گپ ءُ تران کتگ۔ اے موہ ءِ سر ءَ دوئیں گلاں زوتیں وھد ءَ کش ءُ چیل ءِ ھلاسی ءِ لوٹ کتگ ءُ گپ ءُ تران ءُ سفارتکاری ءِ وسیلگ ءَ درستیں اختلاف آناں گیش ءُ گیوار کنگ ءِ ضلورت ءِ سر ءَ تپاک کتگ۔