انوگیں چیلنج آنی دیم ءَ دارگ ءِ واستہ راجی یکوئی ءُ سیاسی برجائی ناگزیر انت، پاکستان اسلامی دنیا ءَ امن ءِ علامت جوڑ بوتگ، رانا ثنا اللہ خان

فیصل آباد ۔ 21 مارچ (اے پی پی): مزن وزیر ءِ سیاسی ءُ پبلک افیئرز ءِ مشیر سینیٹر رانا ثنا اللہ خان ءَ گوشت کہ پاکستان ءَ را اے وھد ءَ تہی ءُ درائیں محاذ آنی سر ءَ جتا جتائیں چیلنج آنی دیم ءَ انت، البت مزن وزیر محمد شہباز شریف ءِ سروکی ءَ ملک ءَ را اے درستیں چیلنج آناں گیش ءُ گیوار کنگ ءَ انت۔ عالمی سطح ءِ تہا ءُ اسلامی دنیا ءِ تہا امن ءُ یکوئی ءُ امید ءِ علامت جوڑ بوتگ۔ آئی ءَ وتی پبلک سیکرٹریٹ ءَ کسانیں ائید ءِ نماز ءِ وانگ ءَ پد رسانکدر ءِ نمائندگاں گوں گپ ءُ تران کنان ءَ ایران ءِ سر ءَ زوراکی ءُ سروک آیت اللہ خامنہ ای ءِ سر ءَ اُرش ءِ سک باز مذمت کتگ ءُ اسلامی دگنیا ءِ گوما سرجمیں یکوئی ءِ درشانی کتگ۔ آئی ءَ گوشت کہ پاکستان نا ایوک ءَ ایران ءِ سر ءَ بلکینگ ءَ اے دگہ مسلمانیں ملک آنی سر ءَ ھم ھرچ وڑیں زوراکی ءَ را تچکیں رنگ ءَ ایر جنت۔ رانا ثنا اللہ خان ءَ گوشت کہ مرچی پاکستان ءَ ایران، سعودی عرب، متحدہ عرب امارات، قطر، عمان ءُ بحرین ءُ اے دگہ عرب ءُ اسلامی ملک آنی سرجمیں بھروسہ است انت ءُ پاکستان اسلامی دگنیا ءَ امن، یکوئی ءُ امیت ءِ رنگ ءَ دیم ءَ اتکگ۔ پڑ ءَ امن ءُ ایمنی ءِ واستہ پاکستان ءِ کرد سک باز المی انت۔ اوگانستان ءِ بابت ءَ گپ جنان ءَ آئی ءَ گوشت کہ پاکستان ءِ موقف سک پدّر اِنت کہ آ نہ اوگانستان ءِ سر ءَ جنگ مسلط کنگ لوٹ اِیت ءُ نہ کہ آ اوگانستان ءِ کجام ھم بھر ءَ قبضہ کنگ لوٹ اِیت، بلے پاکستان ایوک ءَ ھمے لوٹ اِیت کہ اوگانستان ءِ ھاک ھچ ملک ھاسیں رنگ ءَ پاکستان ءِ ھلاپ ءَ ناشرکاری ءِ واستہ کارمرد کنگ مہ بیت۔ اگاں اوگانستان اے ھوالگ ءَ دل یکیمی دات گڈا دوئیں ملکانی نیام ءَ کش ءُ گور ءِ کش ءُ چیل زوت ھلاس بوت کنت ۔ آئی ءَ گیش گوشت کہ پاکستان دوحہ ءِ معاہدے ءِ شرپ ءَ کنت ءُ میاں اوستمانی کانود آنی سر ءَ عمل کنگ مئے پالیشی ءِ یک ھاسیں بھرے انت۔ آئی ءَ گوشت کہ انٹیلی جنس ءِ بنیات ءَ ناشرکاری ءِ پناہ گاہ آنی حلاف ءَ آپریشن غادب الحق کنگ بوھگ ءَ انت ءُ سیکورٹی فورسز ءَ ناشرکاری ءِ پناہ گاہ آناں موثر رنگ ءَ نشانگ جوڑ کتگ۔ آئی ءَ گوشت کہ ریاستی ادارگ ناشرکاری ءِ ھلاسی ءِ واستہ جزمیگ اَنت ءُ اے پڑ ءَ مزنیں سوب مندی بوھگ ءَ اَنت۔ آئی ءَ سیاسی جاور ھال آنی سر ءَ چمشانک دیان ءَ گوشت کہ استیں حکومت ءَ را سیاسی عمل ءِ برجاہ دارگ ءِ سر ءَ ایمان اِنت ءُ پاکستان ءِ واستہ مزن وزیر ءِ برجائی ءِ کلوہ السی تک ءَ رسگ ءَ اِنت۔ آئی ءَ گوشت کہ استیں جھان ءِ جاور سک باز نگیگ انت ایشی ءِ تہ ءَ گیش ھراب بوھگ سرجمیں دگنیا ءَ بحران ءِ ودی کت کنت، پاکستان ءَ راجی یکوئی وھد ءِ لوٹ انت۔ مئی ءِ واکیہانی حوالہ ءَ رانا ثنا اللہ خان ءَ گشتگ کہ اے کیس سپریم کورٹ ءِ اسٹے آرڈر ءِ سبب ءَ دیر بوتگ انت بلے نوں آمید گس کیس گوشدارگ ءَ انت ءُ قانون ءِ رد ءَ فیصلہ کنگ بوہگ ءَ انت۔ انصاف ءِ لوٹ پیلو کنگ بوھگ ءَ انت ءُ ھچ بے گناہیں مردم ءَ را سزا دیگ نہ بوتگ ۔ اگر یک مردمے فیصلہانی ھلاپ ءَ اپیل کنگ لوٹیت گڑا آئی ءَ سرجمیں قانونی حق ھست۔ تحریک انصاف ءِ بانی ءِ حلاف ءَ کیسانی حوالہ ءَ آئی ءَ گشتگ 190ملین پونڈ ءِ کیس ، توشا خانہ ءُ اے دگہ معاملہ درستانی دیم ءَ انت بلے اپیل کنگ ہر شہری ءِ قانونی حق انت ۔ آئی ءَ گوشت کہ پاکستان ءَ ھمک مذھب ءِ مردم برابر اَنت، ملک ءِ تہ ءَ آتش زنی یا مال ءُ مڈی ءِ تاوان ءِ واستہ کجام ھم درائیں وئیل ءَ را توجیل ءِ رنگ ءَ کارمرد کنگ منّگ نہ بیت۔ آئی ءَ راج ءَ گوں دزبندی کتگ کہ آ زمہ واری ءِ درشان ءَ بہ کن اَنت ءُ اے وڑیں کار ءُ کرداں چہ وت ءَ بہ پھریز اَنت کہ راجی نپ ءِ ھلاپ اَنت۔ یک جستے ءِ پسو ءَ آئی ءَ گوشت کہ پاکستان سعودی عرب ءِ گوما وتی منظوری آنی پابند انت ءُ سعودی عرب ءُ ایران ءِ نیام ءَ دمگ ءَ کش ءُ چیل آنی کم کنگ ءِ واستہ کوشست بوھگ ءَ انت۔ ھمک جیڈھ ءِ گیواری جنگ نہ اِنت، بلکینگ ءَ سفارتکاری ءُ گپ ءُ تران ھم ھاسیں کرد ءَ پیلو کن اَنت۔ آئی ءَ خیبر پختونخوا ءَ تحریک انصاف ءِ سرکار ءِ سرا ایراد گپتگ ءُ گشتگ کہ آ راجی مفاداں چہ گیش سیاسی مفاداں دیم ءَ آرگ ءَ انت وھدیکہ سرجمیں سیاسی گل راجی جیڈھانی سرا یکجاہ بہ بنت۔ رانا ثنا اللہ خان ءَ گشتگ تحریک انصاف گپ ءُ تران ءِ بدل ءَ اسٹیبلشمنٹ ءَ گوں دیم پہ دیم بوھگ لوٹیت بلے ملک ءِ برجائی ءِ ھاتر ءَ سنگینیں سیاسی کرد ءِ پیلو کنگ ءَ تیار نہ انت۔ اگاں 2018ءَ یک خاصیں سیاسی منصوبگ ءِ بندات نہ بوتیں گڈا مرچی پاکستان باز گیش دیمروئی کتگ ات۔ اقتصادی جاور ھالانی سر ءَ گپ ءُ تران کنان ءَ آئی ءَ گوشت کہ حکومت الس ءَ را ریلیف پجاری ءِ واستہ گامگیج کنگ ءَ انت ءُ پٹرول ءُ ڈیزل ءِ نہادانی تہ ءَ گیشی ءِ سمری ھم رد کنگ بوتگ۔ آئی ءَ الس ءَ گوں دزبندی کتگ کہ آ پٹرول ءُ گیس ءِ کارمردی ءَ را پنجاہ درسد کم کنان ءَ راجی معیشت ءِ برجائی ءَ وتی کرد ءَ پیلو بہ کن اَنت۔ بنجاھی گچین کاری ءِ ھوالگ ءَ آئی ءَ گوشت کہ ھما وھد ءَ گچین کاری بنت ھما وھد ءَ کہ جاور گہتر بنت ءُ حکومت ایشی ءِ واستہ سرجمی ءَ تیار بیت ۔ آئی ءَ گوشت کہ آبادی ءِ تہ ءَ ترندی ءَ گوں گیشی ھم ملک ءِ یک مزنیں جیڑھے، ایشی ءِ سر ءَ گوست ءَ ھم جوانیں دلگوشی دیگ نہ بوتگ۔ آبادی ءِ گیشی ءَ را مزنیں جیڈھ لیکگ ءَ آئی ءَ گوشت کہ ایشی ءِ سر ءَ وفاقی ءُ صوبائی تک ءَ گیش موثر گامگیج آنی ضلورت اِنت ءُ اے رد ءَ آئینی تک ءَ ھم پیشرفت کنگ بوھگ ءَ اِنت۔ دگہ جستے ءِ پسو ءَ آئی ءَ گشتگ تحریک انصاف ءِ بُن ھشت ایر کنوک ءِ زھگ اگاں دیوان ءِ واستہ بیا انت گڈا آھاں کانود ءِ رد ءَ آسراتی دیگ بیت البت اگاں آ سیاسی کارانی تہ ءَ بھر زورگ لوٹ انت گڈا کانود ءِ رد ءَ پیسلہ کنگ بیت۔ تحریک انصاف ءَ گند ءُ نند ءِ جیڈھ ھم جنجال جوڑ کتگ، وھدیکہ اے درگت ءَ ہائی کورٹ ءِ پیسلہ پدر اِنت ءُ ایشی ءِ سر ءَ عمل کنگ بہ بیت۔