پاکستان ءَ ھوار سرجمیں دگنیا ءَ ڈاؤن سنڈروم ءِ جھان ءِ روچ برجم دارگ بوت

اسلام آباد۔21مارچ (اے پی پی): شمبے ءِ روچ ءَ پاکستان ءَ ھوار سرجمیں دگنیا ءَ ڈاؤن سنڈروم ءِ جھان ءِ روچ دارگ بوت۔ ڈاؤن سنڈروم یک سنگینیں جینیاتی نادراہی یے ءُ ایشی ءِ آماچیں زھگاں وتی ذہنی ءُ جسمانی نادراھی ءِ سبب ءَ جتائیں شدت ءِ ھست۔ ڈاؤن سنڈروم ءَ ٹرائیسومی 21 ءِ نام ءَ ھم زانگ بیت ، وھدے کہ ڈاؤن سنڈروم ءِ آماچیں زھگانی سیلاں 46 ءِ بدل ءَ 47 کروموسوم ھست انت ، اے گیشیں کروموزوم زھگ ءِ ذھنی دیمروئی ءُ جسمانی نادراھی ءِ تہ ءَ تاخیر ءِ سوب بیت ۔ جہانی جان سلامتی ءِ گل ءِ ردا دنیا ءِ ہر ہزار زھگاں چہ یکے ڈاؤن سنڈروم ءِ نادراہی ءَ گوں نادراہ بوت کنت۔ جان سلامتی ءِ ماہرین ءِ گشگ انت کہ ڈاؤن سنڈروم ءِ نادراہیں زھگ گیشتر وش وش بنت، آہاں وانگ، نبشتہ کنگ، راہ ءِ سرا روگ، جیڑگ ءُ سرپد بوھگ ءِ تہا مشکل ءِ آماچ بیت۔ اے چُک وتی نادراھی ءِ باوجود دگہ طبیعی توانائیاں گوں ھوار اَنت۔ آئی ءَ گوشت کہ ڈاؤن سنڈروم ءِ نادراھی ءَ گوں نادراھیں زھگ آناں وتی مات ءُ پت ءِ ھاسیں دلگوشی ءِ ضلورت اِنت۔ ماہرین ءَ گیش گشتگ کہ ڈاؤن سنڈروم ءِ نادراہی ءِ آماچیں زھگ جتائیں توانائیانی تہا چہ نارمل زھگاں چہ یقینی طور ءَ کم توانمند انت بلے کمو محنت، دلگوش ءُ جسمانی ورزش ایشانی شریں زند گوازینگ ءَ کمک کنت۔ ڈاؤن سنڈروم ءِ جھان ءِ روچ ءِ موہ ءَ سرکاری، غیر سرکاری، نجی، طبی ءُ چاگردی ادارگ آنی نیمگ ءَ برجم داشتگیں جتا جتائیں مراگش آنی تہ ءَ اے نادراھی ءِ بابت ءَ سرپدی دیگ بوت تانکہ اے نادراھی ءِ آماچیں زھگ آناں چاگرد ءِ کارآمدیں شہری جوڑ بوھگ ءَ کمک کنگ بہ بیت۔