مزن وزیر شہباز شریف ءَ بنگلہ دیش ءِ مزن وزیر طارق الرحمان ءَ گوں ٹیلی فون کتگ، ائید ءِ مبارکی درشان

لاہور۔20مارچ (اے پی پی): مزن وزیر محمد شہباز شریف ءَ بنگلہ دیش ءِ مزن وزیر طارق الرحمان ءَ گوں ٹیلی فون کتگ ءُ آئی ءَ را ائید ءِ مبارک ءُ مبارکی داتگ۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دوئیں رہشون آنی نیام ءَ دلپھکی ءِ گپ ءُ تران ءِ ساھت ءَ مزن وزیر شہباز شریف ءَ مزن وزیر طارق رحمان ءُ بنگلہ دیش ءِ براتیں اُلس ءَ را ائید ءِ مبارکی دات۔ دوئیں ملک آنی نیام ءَ دیریں، راجدپتری ءُ براتی سیادی آنی حوالہ ءَ مزن وزیر شہباز شریف ءَ بنگلہ دیش ءِ گوما توامیں پڑ آنی تہ ءَ دو نیمگی کمک ءَ را گیش مھکم کنگ ءِ واستہ پاکستان ءِ مھکمیں جزم ءِ سر ءَ زور پر دات۔ دوئیں بامرد آں جنوبی ایشیا ءِ دمگی دیمروئی ءِ ھواری ءَ میاں اوستمانی تک ءِ جاورھال آنی سر ءَ گپ ءُ تران کنان ءَ کش ءُ چیل ءُ جیڑھانی گیواری ءِ واستہ گپ ءُ تران ءُ سفارتکاری ءِ سر ءَ زور پر دات۔ مزن وزیر رحمان ءَ مزن وزیر شہباز شریف ءِ ائید ءِ مبارکی آنی سر ءَ گرمیں پسو دات ءُ پاکستانی الس ءَ را نیکیں واھگ آنی درشان کت۔ دوئیں بامرد آں دمگی ءُ جھان ءِ امن ءُ ایمنی ءِ یکجائی مول ءُ مراد آنی واستہ آیوکیں روچ آنی تہ ءَ یکجائی ءَ کار کنگ ءِ جزم ءِ درشان کت۔