مزن وزیر محمد شہباز شریف ءَ گوں جمہوریہ ازبکستان ءِ صدر شوکت میرزیویوف ءَ ٹیلی فون ءِ سر ءَ گپ ءُ تران

لاہور۔20مارچ (اے پی پی): پاکستان ءُ ازبکستان ءِ سروکی ءَ دو نیمگی سیادی ءِ سر ءَ دل یکیمی ءِ درشان کنان ءَ خلیج ءِ کش ءُ گوری جاور ءُ جیڈھ آناں سفارتکاری ءُ گپ ءُ تران ءِ وسیلگ ءَ گیش ءُ گیوار کنگ ءِ ضلورت ءِ سر ءَ زور پر داتگ۔ مزن وزیر محمد شہباز شریف ءَ جمعہ ءِ روچ ءَ جمہوریہ ازبکستان ءِ صدر شوکت میرزیویف ءَ گوں ٹیلی فون ءِ سر ءَ گپ ءُ تران کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دوئیں رہشون آنی نیام ءَ عید الفطر ءِ نیکیں موہ ءِ سر ءَ مبارکی کلوہ سہرا کنگ بوت۔ گرمیں گپ ءُ تران ءِ ساھت ءَ مزن وزیر ءَ ازبکستان ءِ صدر ءُ براتیں الس ءِ واستہ دل ءِ جہلانکی ءَ چہ نیکیں واھگ آنی درشان کت، ازبکستان ءِ صدر ءَ اے گپ سک باز دل ءِ جہلانکی ءَ گوں من اِت ءُ مزن وزیر ءَ را ھم وتی نیکیں واھگ آناں سر کت۔ دوئیں رہشوناں گوستگیں ماہ ءَ ازبکستان ءِ صدر ءِ پاکستان ءِ تر ءُ تاب ءِ سکیں سوبمندیں آسر ءِ سر ءَ دل یکیمی ءِ درشانی کت۔ مزن وزیر ءَ گوشت کہ دوئیں رہشون آنی نیام ءَ بوتگیں ھاسیں پیسلہ آنی سر ءَ باقاعدہ پیشرفت ءَ چہ دو نیمگی سیادی ءَ را گیش مھکم بیت۔ دوئیں رہشوناں ایران ءُ خلیج ءِ دمگ ءَ برجاھیں جیڈھ آنی سر ءَ ھم گپ ءُ تران کت ءُ جیڈھ آناں ترندیں رنگ ءَ ھلاس کنگ ءُ درستیں جیڈھ آناں گیواری ءِ واستہ گپ ءُ تران ءُ سفارتکاری ءِ دیمروئی ءِ ضلورت ءِ سر ءَ زور پر دات۔