نائب مزن وزیر ءُ وزیر درئی کار اسحاق ڈار مسجد نبوی ءِ زیارت ءَ شتگ

اسلام آباد۔20مارچ (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ مدینہ ءِ تر ءُ تاب کتگ ءُ مسجد پیغمبر ءَ نماز ونتگ۔ سوشل میڈیا پلیٹ فارم ایکس ءِ سر ءَ جاڑی بوتگیں بیان ءِ تہ ءَ نائب مزن وزیر ءَ گوشت کہ 12 دری کارانی وزیر آنی مشاورتی وزارتی دیوان ءُ جتا جتائیں دو نیمگی ءُ چار نیمگی دیوان آنی تہ ءَ بھر زوری ءَ پد گوستگیں شپ ءَ مغرب ءَ چہ پیسر مدینہ ءَ سر بوتگ آں ۔ آئی ءَ گوشت کہ مدینہ ءَ سر بوھگ ءَ پد جبل اھود ءِ تر ءُ تاب کت ءُ رسول اللہ ءِ مسجد ءَ سلام دات۔ نائب مزن وزیر ءَ گوشت کہ پاکستان ءِ امن ءُ ایمنی، راج ءِ برجاھیں دیمروئی ءُ گہبود ءِ واستہ ھاسیں دعا لوٹائینتگ۔ سینیٹر محمد اسحاق ڈار ءَ گوشت کہ آئی ءَ مسلم امت ءِ نیام ءَ مھکم، یکوئی ءُ مھکم بوھگ ءِ واستہ ھم دعا کتگ ءُ اے گرانیں وھد ءَ میاں اوستمانی براتی ءِ نیام ءَ زانت ءُ کمک ءِ دیمروئی ءِ ھوار دائمی امن ءُ یکجائی وشھالی ءِ واستہ ھم دعا کتگ۔ زانگ بہ بیت کہ نائب مزن وزیر سینیٹر محمد اسحاق ڈار ءَ 18 ءَ بگر داں 19 مارچ ءَ سعودی عرب ءِ بنجاھی شھر ریاض ءَ عرب اسلامی دری کارانی وزیر آنی دیوان ءَ بھر زرتگ ات کہ ایشی ءِ تہ ءَ گوستگیں دمگی جاور ھال آنی سر ءَ گپ ءُ تران کنگ بوتگ ات۔ سعودی عرب ءِ میزبانی ءَ بوتگیں اے گند ءُ نند ءَ سعودی عرب، پاکستان، آذربائیجان، بحرین، مصر، اردن، کویت، لبنان، قطر، شام، ترکی ءُ متحدہ عرب امارات ءِ دری کارانی وزیر آں بہر زرتگ۔