من نوروز ءِ مراگش ءَ داروکاں دل ءِ جہلانکی ءَ چہ سلام پیش کناں، من ءَ اُمیت اِنت کہ اے میلہ ءِ مراگش ءَ امن، مھکم ءُ وشھالی ءِ سبب جوڑ بیت، نوروز ءِ  درگت  ءَ صدر ءِ کلوہ

اسلام آباد۔20 مارچ  (اے پی پی): صدر آصف علی زرداری ءَ پاکستان ءُ دمگ ءِ دگہ دمگاں نوروز ءِ برجم داروکیں مردم آناں دل ءِ جہلانکی ءَ چہ سلام ءُ دروت درشان کنان ءَ امیت درشان کتگ کہ چیاکہ بہار ءِ روچ نوک بندات بوھگ ءَ انت من ءَ امیت انت کہ اے موہ ءَ اے میلہ ءِ برجم داروکیں مردم آناں امن ءُ ایمنی ءُ وشھالی ءِ سبب جوڑ بیت۔ صدر ءِ مملکت ءَ نوروز ءِ موہ ءَ وتی کلوہ ءِ تہ ءَ گوشت کہ اے کوھنیں میلہ ءِ موہ ءَ کہ بہار ءِ آیگ ءِ ھال ءَ آرگ ءَ اِنت، پاکستان ءِ توامیں مردم آناں ءُ دمگ ءِ توامیں دمگ آناں دل ءِ دل ءَ چہ سلام پیش کناں۔ آئی ءَ گوشت کہ ایران، میاں اوستمانی ایشیا، مغربی ایشیا، جنوبی ایشیا، ءُ ایشیا ءِ نزیکیں دمگ آنی تہ ءَ نوروز ءَ را سداں سال آنی تہ ءَ نوکیں موسم ءِ بندات ءِ رنگ ءَ برجم دارگ بوھگ ءَ اِنت۔ اے طبیعی نظام ءِ تہا سال ءِ بدلی ءِ نشانی اِنت کہ شپ ءُ روچ، رژن ءُ تہاری نہ ایوک ءَ توازن ءَ کیت، بلکیں تہاری کم کم ءَ کم بیت ءُ رژنائی گیش بوہگ ءَ بندات کنت۔ صدر ءِ مملکت ءَ گوشت کہ ایشی ءَ وش آتک کنوکیں راج آنی واستہ اے روچ راجدپتر ءِ سر ءَ نوک کنگ، پدا ودی بوھگ، تازگی ءُ رُژن ءِ سوب ءُ مرگ ءِ سر ءَ زندمان ءِ علامت بوتگ۔ آئی ءَ گوشت کہ پاکستان یک انچیں ملکے کہ ایشی ءِ تہ ءَ جتا جتائیں دود ءُ ربیدگ، مذھب ءُ دود ءُ ربیدگ جتا اَنت، جتا جتائیں کمیونٹی وتی رنگ ءَ وتی تہواراں برجم دار اَنت کہ مئے شھر ءُ دمگ آنی رنگ ءُ ھم آہنگی ءَ را گیش کن اَنت۔ اے تنوع دیر اِنت کہ مئے راجی زند ءِ بہرے بوتگ ءُ انگت مئے یکجاھیں تواناں چہ یکے ۔ صدر ءِ مملکت ءَ گوشت کہ اے سال نوروز ءِ نزیک بوھگ ءَ گوں مئے ھیال ءُ دعا خطہ ءِ ھما مردم آنی گوما انت کہ آ مشکل ءُ چیلنجیں جاور آنی تہ ءَ بہار ءَ را وش آتک کنگ ءَ انت۔ ھما دمگاں کہ اے میلہ دیر اِنت کہ نوک کنگ ءِ علامت اِنت، نوں اے موسم ٹُکّر ٹُکّریں وانگجاہ ءُ نادراھجاہانی ملبہ ءُ زوراکی ءِ دیریں اثرانی میان ءَ سر بیت۔ آئی ءَ گوشت کہ اے وھد ءَ کہ بہار وشی ءِ آرگ ءَ اِنت بازیں ھاندان تاوان ءُ سکی ءِ دیمپان انت۔ صدر آصف علی زرداری ءَ گوشت کہ نوروز ءِ لھتیں دمگ آنی تہ ءَ بھارگاہ ءِ پُل ءِ سر ءَ ملبہ ءُ ھون ءَ گیپتگیں درچک ءُ بارود ءِ وشبو ءَ ساہگ کپتگ۔ آئی ءَ گوشت کہ مئے ھمساھگیں ملک اوگانستان ءَ کہ اودا نوروز ءِ مراگش سداں سال اِنت برجم دارگ بوھگ ءَ اِنت، یک ناجائزیں طالبان ءِ رژیم ءَ الس ءَ را اے میلہ ءَ چہ ھم زبھر کتگ۔ پہ اوگانستان ءِ ھما مردماں کہ بازیں وھدے ءَ چہ نادراھی ءِ آماچ اَنت من نوروز ءِ روچ ءَ وتی ھاسیں سلام ءَ پیش کن آں ءُ امیت کن آں کہ اے نوروز ایشانی دراجیں سیاھیں شپ ءِ آسر ثابت بیت۔ صدر ءِ مملکت ءَ گوشت کہ من اے نوروز ءِ روچ ءَ امیت وار آں جنگ ءِ جمبر شنگ ءُ تالان بنت ءُ ساپیں آزمان پدا گوں رژنائیں روچ ءَ گوں واتر کئیت۔ آئی ءَ گوشت کہ بہار ءِ بندات ءَ منی دل ءِ جہلانکی ءَ چہ دعا اِنت کہ اے موہ ءَ اے میلہ ءِ برجم داروک آناں امن، برجائی ءُ وشھالی ءِ سبب جوڑ بہ بیت۔