جدید ٹیکنالوجی ءِ دیمروئی ءِ صنعت، کشت ءُ کشاری ءُ آئی ٹی ءِ شوبگ ءَ مزنیں کردے است انت، مزن وزیر ءَ ’5G‘ سپیکٹرم لائسنس ءِ جاری کنگ ءِ مراگش ءَ گوں تران کنان ءَ گشتانک

اسلام آباد۔19مارچ  (اے پی پی): مزن وزیر محمد شہباز شریف ءَ راج ءَ را نوکیں ٹیکنالوجی ءِ آسراتی پجاری ءِ وتی عزم ءِ یک رند ءَ پدر کنان ءَ گوشت کہ نوکیں ٹیکنالوجی ءِ دیمروئی ءِ صنعت، کشت ءُ کشاری ءُ آئی ٹی ءِ شوبگ آنی تہ ءَ مزنیں کرد اِنت۔ 5 جی سپیکٹرم لائسنس آنی نیلامی سک شفافیں رنگ ءَ کنگ بوتگ۔ چین ءُ پاکستان ءِ دوستی بے درور انت ۔ اے دوستی ءِ یک ھاسیں عکسے نوکیں ٹیکنالوجی اِنت۔ ورنا نوکیں ٹیکنالوجی ءَ چہ پائدگ چست کن انت ءُ آئی ٹی ءِ شوبگ ءَ ملک ءَ را نامدار کن انت۔ آئی ءَ اے ھیالانی درشانی پنچ شمبے ءِ روچ ءَ ادا ’5 جی‘ سپیکٹرم لائسنس ءِ جاری کنگ ءِ مراگش ءَ گوں تران کنان ءَ کت۔ اے مراگش ءَ وفاقی وزیر ءُ آئی ٹی ءِ ماہرین ءَ بہر زرتگ ات۔ مزن وزیر ءَ انفارمیشن ٹیکنالوجی ءِ وفاقی وزیر شازہ فاطمہ خواجہ ءُ آئی ءِ سرجمیں ٹیم ءَ را فورجی اسپیکٹرم ءِ سوبمندیں ایوارڈ ءُ لائسنس زرتگیں ٹیلی کام آپریٹر آناں مبارکی دات ءُ گوشت کہ اے پاکستان ءَ ٹیکنالوجی ءِ پڑ ءَ مزنیں گامگیج اِنت۔ ٹیکنالوجی ءِ دیمروئی ءَ پاکستان ءِ صنعت، کشت ءُ کشاری ءُ آئی ٹی ءِ شوبگ آنی سر ءَ مزنیں اثرے کپیت۔ آئی ءَ گوشت کہ حکومت سرجمیں ملک ءَ الس آناں نوکیں ٹیکنالوجی ءِ آسراتی پجاری ءِ واستہ جزمیگ انت۔ 4G سپیکٹرم لائسنس سکیں شفافیں رنگ ءَ داتگ، ایشی ءَ چہ پیسر پی آئی اے ءِ نجکاری شفافیں رنگ ءَ کنگ بوتگ۔ من وفاقی وزیر کانود ءُ انصاف اعظم نظیر ترار ءُ سرجمیں ٹیم ءَ را مبارک بات دیان آں کہ آہاں قانونی چیلنج آناں دوستانہ رنگ ءَ گیواری کتگ۔ آئی ءَ گوشت کہ ٹیلی کام ءِ شوبگ ءِ تہ ءَ زونگ ءُ ایندگر شریک من ھم آپریٹرز آنی کمک ءِ ستا ءَ کن آں، ءُ امیت کن آں کہ آ اے ٹیکنالوجی ءَ را ملک ءِ ھر کُنڈ ءَ الس ءِ دیم ءَ سر کن اَنت۔ آئی ءَ گوشت کہ چین ءُ پاکستان ءِ دوستی بے درور اِنت ءُ اے دوستی ءِ یک ھاسیں آدینک نوکیں ٹیکنالوجی اِنت۔ آئی ءَ گوشت کہ اے آئی ءِ ورنا پروفیشنل نوکیں ٹیکنالوجی ءَ چہ پائدگ چست کن اَنت ءُ آئی ٹی ءِ شوبگ ءَ ملک ءَ را نامدار کن اَنت۔ وفاقی وزیر انفارمیشن ٹیکنالوجی شازہ فاطمہ خواجہ ءَ گوشت کہ مزن وزیر ءِ سرجمیں کمک ءِ سبب ءَ اے سوبمندی ممکن بوتگ۔ پاکستان ءَ اولی رند ءَ 5 جی سروس بندات کنگ بوتگ ۔ شہری آناں جوانیں فورجی سروسز پجاری ءِ واستہ ھم گامگیج کنگ بوھگ ءَ انت۔ آئی ءَ گوشت کہ آیوکیں لھتیں ماھ آنی تہ ءَ انٹرنیٹ ءِ سرجمیں معیار گہتر بنت، 5 جی سپیکٹرم ءِ بھر ءُ بانگ ءِ تہ ءَ شفافیت ءَ را دل یکیمی کنگ بیت۔ پی ٹی اے ءِ چیئرمین میجر جنرل (ریٹائرڈ) حفزان الرحمان ءَ گوشت کہ پاکستان ءَ موبائل فون ٹیکنالوجی ءِ دیمروئی 90 ءِ دہائی ءِ بندات ءَ بندات بوتگ، 2004ءَ چہ 2025ءَ تاں چار سپیکٹرم ءِ تخصیص کنگ بوتگ، سپیکٹرم ءِ تخصیص شفافیں رنگ ءَ کنگ بوتگ ءُ پاکستان ءِ تہ ءَ اولی رند ءَ سپیکٹرم ءِ تخصیص ءِ رد ءَ لائسنس جاری کنگ بوتگ۔ مراگش ءَ پاکستان ٹیلی کمیونیکیشن اتھارٹی ءُ ٹیلی کام آپریٹرز جاز، یوفون ءُ زونگ ءِ نیام ءَ 5 جی اسپیکٹرم لائسنس ءِ واستہ معاہدہ ءِ سر ءَ دستخط کنگ بوت۔ لائسنس ءِ جاری کنگ ءَ پد کمپنی ملک ءَ 5 جی سروسز ءَ را یک شل ءَ بندات کنگ ءِ اہل بنت ایشی ءَ چہ صارف آناں تیز انٹرنیٹ ءُ نوکیں ڈیٹا ءِ آسراتی رس ایت ءُ ڈیجیٹل سروسز، کاروبار ءُ آن لائن معیشت ءَ را دیمروئی دنت۔