وزیر ءِ درئی کار اسحاق ڈار ءِ ریاض ءَ عرب۔اسلامی ملک آنی   درئی کارانی وزیرانی دیوان ءَ بہر زوری

ریاض۔19مارچ  (اے پی پی): نائب مزن وزیر ءُ دری کارانی وزیر محمد اسحاق ڈار ءَ سعودی عرب ءِ بنجاھی شہر ریاض ءَ عرب اسلامی درئی کارانی وزیر آنی دیوان ءَ بھر زوری کت کہ ایشی ءِ تہ ءَ دمگی جاور ھال آنی سر ءَ گپ ءُ تران کنگ بوت۔ پنچ شمبے ءِ روچ ءَ درئی کارانی کارگس ءِ رد ءَ سعودی عرب ءِ چیردستی ءَ برجم داشتگیں دیوان ءَ آذربائیجان، بحرین، مصر، اردن، کویت، لبنان، لبنان، قطر، شام، ترکیہ ءُ متحدہ عرب امارات ءِ دری کارانی وزیر آنی ھم بھمک زوری بوتگ۔ گند ءُ نند ءِ ساھت ءَ نائب مزن وزیر ءَ دمگ ءِ توامیں براتیں ملک آنی سرزمین یکوئی، وت واجہی ءُ سیاسی آجوئی ءِ واستہ سرجمی ءَ کمک ءِ درشان کت ءُ وتی سرزمین آنی سر ءَ ھمک رنگیں اُرش آنی ھلاسی ءِ ضلورت ءِ سر ءَ زور پر دات۔ نائب مزن وزیر ءَ مسلم امت ءِ نیام ءَ یکوئی ءِ ارزشت ءَ را پدر کنان ءَ برجاھیں جیڈھ آناں زوت ھلاسی ءِ لوٹ کت ءُ گپ ءُ تران ءُ سفارتکاری ءِ وسیلگ ءَ جیڈھ آناں گیواری ءِ واستہ پاکستان ءِ موقف ءِ پدا زور دات۔ واجہ اسحاق ڈار ءَ انوگیں بحران ءِ بُنکی سبب آنی گیواری ءِ ضلورت ءِ سر ءَ زور پر دیان ءَ دمگی ملک آنی سر ءَ اسرائیل ءِ نیمگ ءَ برجاھیں زوراکی ءُ آشوب آناں گوں زبردستیں رنگ ءَ مذمت کت۔ آئی ءَ شہری آنی سر ءَ بے جاہیں اُرش ءُ ھمے رنگ ءَ توانائی ءُ نازرکیں بنیاتی کوکا  ءِ نشانگ جوڑ کنگ ءِ ھم مذمت کتگ ءُ اے وڑیں درستیں کارروائی آناں زوت بند کنگ ءِ لوٹ کتگ۔ آئی ءَ اے وڑیں کارروائی آناں چہ بچگ ءِ ضلورت ءِ سر ءَ ھم زور پر دات کہ اے دمگ ءُ ایشی ءَ چہ دریں دمگ آنی تہ ءَ توانائی ءِ ایمنی ءَ را تاوان رسیت ءُ جھان ءِ اقتصادی چیلنج آناں گیش گیش ءُ گیوار کنت۔ نائب مزن وزیر ءَ شریکیں مردم آناں جیڈھ ءِ گیواری ءِ واستہ پاکستان ءِ برجاھیں سفارتی کوشست آنی بابت ءَ سرپد کت ءُ اے جزم ءِ یک رندے پدا گوشت کہ پاکستان دمگی ایمنی ءِ چیلنج آناں گیواری ءِ واستہ جوڑیشت ءِ کرد ءَ را برجاہ دار ایت۔ گند ءُ نند ءِ گڈسرا عرب ءُ اسلامی ملکاں ہم یکجائی بیان شنگ کتگ ۔ سینیٹر  محمد اسحاق ڈار ءَ وتی تر ءُ تاب ءِ ساھت ءَ سعودی ءِ دری کارانی وزیر شہزادہ فیصل بن فرحان السعود ءَ را پاکستان ءِ حکومت ءُ الس ءِ سرجمیں یکوئی ءُ بے مٹیں کمک ھم سر کت۔ وزارتی گند ءُ نند ءِ ساھت ءَ نائب مزن وزیر ءَ ترکیہ ءِ درئی کارانی وزیر ھاکان فیدان  ءُ آذربائیجان ءِ درئی کارانی وزیر جوہر باراموف ءِ گوما ھم دو نیمگی گند ءُ نند کتگ ات ایشی ءِ تہ ءَ نوکیں دمگی جاور ھال آنی سر ءَ ھیال ءُ لیکہ ءِ درشان کنگ بوتگ ات۔ نائب مزن وزیر ءُ وزیر ءِ درئی کار ءَ مصر، پاکستان، سعودی عرب ءُ ترکیہ ءِ دری کارانی وزیر آنی چار نیمگی دیوان ءَ ھم بھمک زوری کت کہ اے موہ ءَ برجم دارگ بوت۔