مات ءُ پت مئے چاگردی نظام ءِ جوڑ کنوک اَنت، اگاں زھگاں وھد ءُ پاس ءُ جوانیں وانگ ءُ زانگ ءُ پروشگ دیگ مہ بیت گڑا آیانی محنت بے سوب بوت کنت، گورنر بلوچستان

کوئٹہ۔ 19 مارچ (اے پی پی): بلوچستان ءِ گورنر جعفر خان مندوخیل ءَ گشتگ کہ مات ءُ پت مئے چاگردی نظام ءِ جوڑ کنوکیں ٹکّ اَنت، آ وتی زھگانی لوٹ ءُ گزراں پیلو کنگ ءُ آھانی آیوکیں باندات ءِ رکھینگ ءِ ھاتر ءَ شپ ءُ روچ کار کن اَنت، اگاں زھگاں وھد ءُ پاس ءِ سر ءَ جوانیں وانگ ءُ زانگ ءُ پرورش دیگ مہ بیت گڑا مات ءُ پت ءِ محنت ءُ سرمایہ کاری بے سوب بوت کنت۔ آئی ءَ اے گپ گورنر گس ءِ نیمگ ءَ چہ درستیں والدین آناں یک کلوہ ءِ تہ ءَ گوشت۔ آئی ءَ گوشت کہ مرچیگیں شلوغیں زند ءِ تہ ءَ مستریں جیڈھ ایش انت کہ مات ءُ پت انچو معاشی ءُ چاگردی کار آنی تہ ءَ ھوار انت کہ آھاں وتی چک آنی پروشگ ءِ واستہ وھد ءُ پاس نہ رس ایت۔ آ وتی ذمہ واری ءَ باز براں اسکول ءِ استاداں دیم دئینت کہ ایشی ءِ آسر ءَ زھگ بے ھیال ءُ محرومی ءِ آماچ بنت کہ ایشی ءِ سبب ءَ پرورش ءُ کردار ءِ دیمروئی ءِ لوٹوکیں مول ءُ مراد سرجم نہ بنت۔ آئی ءَ گوشت کہ وتی دزگٹی  ءِ باوجود مات ءُ پت آنی واستہ المی انت کہ آ وتی زھگ آنی واستہ وھد ءُ پاس ءِ شوھاز ءَ بہ کن انت، پرچا کہ زھگ آناں دگہ آسراتی آنی چہ گیش جوانیں دلگوشی، مھمک ءُ مات ءُ پت آنی ھست بوھگ ءِ ضلورت انت۔ گورنر ءَ گوشت کہ والدین وتی زھگاں جوانیں وانگجاھاں داخل کن اَنت تانکہ آ پیداواری ءُ کارآمدیں شہری جوڑ بہ بنت بلے آھاں ایوک ءَ وانگ ءُ زانگ ءِ ادارگ آنی رحم ءُ کرم ءَ یلہ کنگ زانتکاری نہ اِنت۔ اے ھم المی اِنت کہ آؤکیں وھد ءِ چیلنجانی دیم ءَ دارگ ءِ ھاترا زھگاں جوانیں وانگ ءُ زانگ ءُ تربیت دیگ بہ بیت۔ آئی ءَ گْوشتگ کہ وانگ چہ لھتیں سال ءِ وانگ ءَ پد بندات بیت بلے پرورش چہ مات ءِ لاپ ءَ اولی روچ ءَ بندات بیت۔ پمیشکا پہ یک مھکمیں کردار ءُ شخصیت ءِ جوڑ کنگ ءَ جوانیں وانگ ءُ زانگ المی اِنت، دانکہ درستیں زھگ مزن بہ بنت ءُ ملک ءُ راج ءِ دیمروئی ءُ وشھالی ءِ تہ ءَ سرجمیں کردے پیلو کنگ ءِ وس ءَ بہ کن اَنت۔