صدر آصف علی زرداری نا اسرائیلی جلہو اٹی ڈاکٹر علی لاریجانی نا خون آ ڈکھیائی نا درشان، ایران نا حکومت و الس تون ہڑزخواہی

اسلام آباد۔ 18 مارچ (اے پی پی ) صدر مملکت آصف علی زرداری برجا اسرائیلی جلہو آتیٹی ایران نا سینئر راہشون ڈاکٹر علی اردشیر لاریجانی نا خون آ ڈکھیائی و غم انا درشانیءِ کرسا اسلامی جمہوریہ ایران نا حکومت و الس تون ہڑزخواہی کرینے۔ چارشنبے نادے آ ایوان صدر نا پریس ونگ آن جاری بیان نا رداٹ صدر مملکت نومبر 2025 اٹی ڈاکٹر علی اردشیر لاریجانی نا سرکاری دورہ پاکستان ءِ یات کرسا پارےکہ داوخت آ او چندی بشخ آتیٹی ہڑتوم آ کنڈآتا کمکاری ءِ پین مون آ دننگ نا وڑوڈول آتیا گپ وتران کریسس۔ اوپاکستان۔ ایران تعلقداری ٹی مثبت پیش رفت ءِ سوگو کننگ اٹ ڈاکٹر لاریجانی نا کڑد انا ہم ستاءِ کرے۔ صدر مملکت پارے کہ برجابے چیٹی نا سوبو انسانی جان تا زیان و بنداوی پنجر ءِ نسخان ملنگ ءِ ہراڑآن مچ آ ڈیہہ اٹی سنگین زرگزرانی اثرات و نزوری ودی مننگ ءِ ۔ صدر مملکت سگ و بے چیٹی نا دمدستی چٹفنگ آ زور شاغسا غٹ فریق آتیا زور شاغاکہ او گپ و تران و سفارتکاری ءِ اولیت ایتر۔ اواومیت ظاہر کرے کہ حالیت آک زوت مستحکم مریرہ و پین جانی نسخان و ڈیہہ اٹی بے چیٹی نا تالانی آن مست امن بحال مریک۔ صدر آصف علی زرداری پارے کہ پاکستان بے چیٹی ٹی کمتی و امن نا مون آ دننگ کن غٹ کوشست آتا مخ تفی ءِ برجاتخنگ نا عزم انا درشانی ءِ کیک و او ڈیہہ اٹی تناؤ ءِ کم کننگ کن گپ وتران و سفارتی کوشست آتے مون آ دننگ اٹ تعمیری کڑد ادا کننگ کن تیار ءِ۔