مزن وزیر، کویت ءِ ولی عہد ءَ ٹیلی فون ءِ سرا گپ ءُ تران کتگ، وت مہ وتی رابطہ برجاہ دارگ ءِ سرا تپاک

اسلام آباد۔18مارچ  (اے پی پی): مزن وزیر محمد شہباز شریف ءَ کویت ءِ گوما یکوئی ءِ درشانی کتگ ءُ گپ ءُ تران ءُ سفارتکاری ءِ وسیلگ ءَ اختلافات ءِ گیش ءُ گیوار کنگ ءِ ضلورت ءِ سر ءَ زور پر داتگ۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءُ کویت ءِ ولی عہد شیخ صباح الخالد الحمد الصباح ءِ نیام ءَ ٹیلی فون ءِ سر ءَ گپ ءُ تران بوتگ کہ ایشی ءِ تہ ءَ دوئیں سروک آنی نیام ءَ  کسانیں ائید ءِ وشیں موہ ءَ  پاکستان ءُ کویت ءِ اُلس ءُ ھمے رنگ ءَ سرجمیں مسلمان امت ءِ امن ءُ ایمنی ءُ وشھالی ءِ ھاترا وتی نیکیں واھگاں درشان کن اَنت۔ مزن وزیر محمد شہباز شریف ءَ کویت ءِ امیر شیخ مشال الاحمد الجبر الصباح ءِ واستہ نیکیں واھگ ءُ احترام ءِ درشانی کت۔ آئی ءَ یک رندے پد ءَ کویت ءِ سر ءَ اُرش آنی ترندیں گالوار ءَ گوں مذمت کتگ ءُ جانی بیرانی ءِ سر ءَ دلپدردی ءِ درشانی کتگ ءُ ٹپیگ آنی زوت جان سلامتی ءِ دعا کتگ۔ مزن وزیر محمد شہباز شریف ءَ کویت ءِ براتیں الس ءَ گوں پاکستان ءِ یکوئی ءُ کمک ءِ درشان کت۔ امن ءُ ایمنی ءِ برجائی ءُ توامیں اختلافات گپ ءُ تران ءُ سفارتکاری ءِ وسیلگ ءَ گیش ءُ گیوار کنگ ءِ واستہ توامیں دمگی ملک آں یکجائی ءَ کار کنگ ءِ ضلورت ءِ سر ءَ زور پر دات۔ مزن وزیر ءَ پاکستان ءُ کویت ءِ نیام ءَ مھکمیں ءُ برات ءِ سیادی ءِ پدا پدر کنان ءَ کویت ءِ ولی عہد ءَ را وتی آسراتی ءِ وھد ءَ پاکستان ءِ سرکاری تر ءُ تاب ءِ دعوت ءِ پدا زور دات۔ دوئیں رہشوناں رابطہ ءِ برجاہ دارگ ءِ سرا تپاک کتگ۔