مزن وزیر شہباز شریف ءِ گشگ انت کہ سرجمیں ملک ءَ ریلوے ءِ بنیاتی ڈھانچہ ءَ را پائیداریں شرتانی سرا دوبر جوڑ کنگ ءِ زوتیں ضلورت انت

اسلام آباد۔18مارچ  (اے پی پی): مزن وزیر محمد شہباز شریف ءَ ملک ءِ معیشت ءُ رابطہ کاری ءِ سرین ءِ ھڈ ءِ رنگ ءَ ریلوے ءِ کرد ءِ سر ءَ زور پر دیان ءَ گوشت کہ سرجمیں ملک ءَ ریلوے ءِ بنیاتی ڈھانچہ ءِ پائیداریں شرت آنی سر ءَ پدا جوڑ کنگ ءِ ترندیں ضلورت اِنت ءُ ریلوے ءِ دمگی پالیشی ءِ نوکیں رنگ ءَ جوڑ کنگ ءُ دیمروئی ءِ ھاترا المی اِنت۔ آ چار شمبے ءِ روچ ءَ مزن وزیر گس ءَ وتی سروکی ءَ برجم داشتگیں پاکستان ریلوے ءِ سٹیئرنگ کمیٹی ءِ دیوان ءَ گوں گشتانک دیگ ءَ ات۔ گند ءُ نند ءَ وفاقی وزیر اقتصادی امور احد خان چمہو، ریلوے ءِ وفاقی وزیر حنیف عباسی، وفاقی وزیر خزانہ ءُ آمدنی محمد اورنگزیب، خزانہ ءُ ریلوے ءِ وزیر مملکت بلال اظہر کرنی ءُ سیادی داروکیں مزنیں سرکاری کارندہ آں بہر زرتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر ءَ گوشت کہ ریلوے ءِ نظام ملک ءِ معیشت ءُ رابطہ ءِ مڈی انت۔ آئی ءَ سرجمیں ملک ءَ ریلوے ءِ بنیاتی ڈھانچہ ءِ نوک کنگ ءِ ضلورت ءِ سر ءَ زور پر دات تانکہ اے ملک ءِ اقتصادی ءُ صنعتی دیمروئی ءِ واستہ یک زندگ داروکیں آپشن ءِ جوڑ کنگ بہ بیت ءُ گوشت کہ دمگی تجارت ءُ رابطہ کاری ءِ واستہ نوکیں پلیٹ فارم آنی سر ءَ ریلوے ءِ دیمروئی راجی حکمت عملی ءِ یک ھاسیں بھر اِنت۔ آئی ءَ پاکستان ریلوے ءَ را پنت ءُ شون کت کہ آ وتی مال بار ءِ آسراتی ءَ را اپ گریڈ بہ کنت ءُ گوشت کہ استیں دمگی جاور ھال آنی رد ءَ ایندھن ءِ بچت ءِ رد ءَ سامان آنی ٹرانسپورٹ ءِ واستہ ریلوے فریٹ سروس ءِ کارمردی ناگزیر جوڑ بوتگ۔ دیوان ءَ پاکستان ریلوے ءِ تہ ءَ برجاھیں اصلاحات آنی ھوالگ ءَ سرپد کنگ بوت ءُ گوشگ بوت کہ پاکستان ریلوے ءِ مال بردار سروس ءِ تہ ءَ اے سال ءَ 21درسد گیشی ءِ گمان اِنت۔ مین لائن ون (ایم ایل 1) کراچی روہری سیکشن ءِ اولی بھر ءِ اپ گریڈ کنگ ءِ سر ءَ میاں اوستمانی دیمروئی بینک ءِ کمک ءَ کار برجاہ اِنت۔ انجینئرنگ ڈیزائن، ماحولیاتی اثرات ءِ سروے ءُ زمین ءِ گرگ ءِ کار جاری انت۔ تھر ریل کنیکٹوٹی منصوبگ ءِ سرا 57درسد کار سرجم کنگ بوتگ۔ بریفنگ ءِ رد ءَ مین لائن تھری ءِ روہری نوکندی سیکشن ءِ اپ گریڈیشن صوبہ بلوچستان ءَ چہ معدنیات ءِ ٹرانسپورٹ ءِ واستہ سک باز ھاسیں منصوبگ اِنت ایشی ءِ واستہ ڈیزائن کنسلٹنٹ ءِ سروسز گرگ بوتگ ءُ پی سی ون ھم سرجم کنگ بوتگ۔ پاکستان ریلوے ءِ ڈیٹاائزیشن ءِ عمل ھم جاری انت۔ کنکٹیویٹی ایپلی کیشن، کیش لیس ٹکٹنگ ءُ ریلوے اسٹیشن آنی سر ءَ مفت وائی فائی ءِ پھجارینگ ھاسیں سنگ میل اَنت۔ بریفنگ ءَ گوشت کہ مال برداری ءِ بندوبست ءِ نظام، تفصیلی بالداریں پل ءُ رولنگ اسٹاک ٹریکنگ ءِ نظام ءَ چہ مال برداری ءِ ازمت آنی کوالٹی ءُ شفافیت ءَ را گہتر کتگ۔