وفاقی وزیر مالیات ءُ آمدنی ءَ پٹرولیم ءِ چیزانی چار ءُ تپاسی ءِ واستہ دیوان ءِ سروکی کت، ملک ءَ سوخت ءِ دستیابی رضامند انت، بریفنگ

اسلام آباد۔16مارچ (اے پی پی):پٹرول ءِ نھاد آنی سر ءَ چار ءُ تپاسی ءِ واستہ جوڑ کتگیں کمیٹی ءَ را گوشگ بوتگ کہ ملک ءَ ایندھن ءِ دستیابی جوان انت ءُ مارچ ءِ لوٹ سرجمی ءَ پیلو کنگ بوتگ انت۔ استیں کارگو پلاننگ ءُ سپلائی ءِ بندوبست ءِ بنیاد ءَ اپریل ءِ میان ءَ تاں سپلائی دستیاب اِنت ءُ اپریل ءِ گڈ ءَ تاں ایشی ءَ را گیش کنگ ءِ ھاترا ھم گامگیج زورگ بوھگ ءَ اِنت۔ اے دیوان دو شمبے ءِ روچ ءَ وزارت ءِ ھزانگ ءَ وفاقی وزیر ھزانگ ءُ ریونیو سینیٹر محمد اورنگزیب ءِ سروکی ءَ بوت۔ اے دیوان دمگ ءِ بدل بوھوکیں جاور ھال آنی رد ءَ توانائی ءِ شوبگ ءَ بوتگیں پیشرفت ءِ روچ ءِ چار ءُ تپاسی ءِ یک سلسلہ ءِ بھر بوتگ۔ گند ءُ نند ءَ پٹرولیم ءِ وفاقی وزیر علی پرویز ملک، وفاقی وزیر ءِ میری ٹائم محمد جنید انور چوہدری، گورنر اسٹیٹ بینک ءُ سیادی داروکیں وزارت، ڈویژن ءُ ریگولیٹری ادارگ آنی وفاقی سیکرٹری ءُ مزنیں کارندہ آنی بھر زوری بوتگ۔کمیٹی ءَ سرجمیں ملک ءَ پٹرولیم ءِ چیز آنی ذخیرہ ءِ سرجمیں چار ءُ تپاسی کتگ۔ باسک آناں خام تیلءُ ریفائنڈ پٹرولیم ءِ چیز آنی استیں راجی اسٹاک، جاری درآمد ءِ بندوبست ءُ سپلائی چین رسد ءِ ھوالگ ءَ سرجمیں بریفنگ دیگ بوت۔ کمیٹی ءَ را سرپد کنگ بوت کہ ایندھن ءِ دستیابی ءِ ھوالگ ءَ ملک ءِ موقف وش انت ءُ مارچ ءِ لوٹ آناں سرجمی ءَ پیلو کنگ بوتگ۔ گیش گوشگ بوت کہ استیں کارگو پلاننگ ءُ سپلائی ءِ بندوبست ءِ رد ءَ اپریل ءِ میان ءَ تاں سپلائی دستیاب اِنت ءُ اپریل ءِ گڈ ءَ تاں ایشی ءِ گیشی ءِ واستہ ھم گامگیج کنگ بوھگ ءَ اِنت۔ سرجمی ءَ استیں اسٹاک ءِ کچ ءُ کساس ءُ شیڈول بوتگیں درآمدات ءِ رد ءَ مارچ ءِ تہ ءَ خام تیلءُ کلیدی پٹرولیم ءِ چیز آنی مزنیں اسٹاک است انت وھدیکہ اپریل ءِ تہ ءَ برجاھیں سپلائی ءَ را دل یکیمی کنگ ءِ واستہ ھم جوانیں منصوبگ بندی کنگ بوتگ۔ دیوان ءَ جاری دمگی جاور ھال آنی رد ءَ حصولیابی ءِ رھبند ءُ دریائی رسد ءِ سر ءَ ھم چار ءُ تپاسی کنگ بوت۔ اے درگت ءَ کمیٹی ءَ راجی توان ءِ سپلائی چین ءَ را گیش مھکم کنگ ءِ واستہ سپلائی ءِ وسیلگ آناں گیش چہ گیش تنوع ءِ سر ءَ زور پر دات۔ دیوان ءَ را سرپد کنگ بوت کہ زرکاری ءِ حکمت عملی پیسر ءَ چہ گیش تنوع ءِ نیمگ ءَ روگ ءَ اِنت ءُ میاں اوستمانی مارکیٹ ءَ چہ گیشیں وسیلگ آنی چہ زرکاری ءِ واستہ گامگیج کنگ بوھگ ءَ اِنت تانکہ کجام ھم یک راہ ءِ سر ءَ انحصار ءَ را کم کنگ ءُ پاکستان ءِ سرجمیں توانائی ءِ سلامتی ءَ را گیش مھکم کنگ بہ بیت۔ وزیر خزانہ ءَ زور پر دات کہ حکومت سرجمیں ملک ءَ پٹرولیم مصنوعات ءِ بے رکاوٹ دستیابی ءَ را دل یکیمی کنگ ءِ سر ءَ سرجمی ءَ دلگوشی انت۔آئی ءَ گوشت کہ استیں اسٹاک ءِ جاور ھال ءُ سپلائی ءِ منظر نامہ مھکم انت ءُ پیش کتگیں رپورٹ آنی رد ءَ الس ءِ نیمگ ءَ گھبراہٹ ءِ خریدارییا غیر ضروری ہارڈنگ ءِ ھچ ضلورت نیست۔ دیوان ءَ سیادی داروکیں واکدار آناں ہدایت کتگ کہ آ اوگرا ءُ صوبائی حکومت آنی گوما ہمگامی ءَ اسٹاک ءِ کچ ءُ کساس ءُ مارکیٹ ءِ کار آنی سر ءَ نزیکی ءَ چہ چار ءُ تپاسی بہ کن اَنت تانکہ ذخیرہ کاری ءِ ہچ وڑیں وئیل ءِ دیم ءَ دارگ بہ بیت۔ اے گپ ءِ سر ءَ زور پر دیگ بوت کہ مصنوعی کمی ءِ پیداک کنگ یا نارمل سپلائی ءَ را ھراب کنگ ءِ ھرچ وڑیں کوشست ءِ ھلاپ ءَ کانود ءِ رد ءَ سکیں گامگیج زورگ بیت۔توانائی ءِ مارکیٹ ءَ استحکام برجائی ءِ حکومت ءِ عزم ءِ دوبر پدر کنان ءَ وزیر خزانہ ءَ درستیں سیادی داروکیں وزارت، ریگولیٹرزءُ ادارگ آناں ہدایت کت کہ آ وت مہ وتی ہم آہنگی ءَ را برجائی بہ کن اَنت ءُ ذخائر ءُ سپلائی ءِ بہاؤ ءِ تک ءِ سر ءَ نزیکی ءَ چہ نگرانی ءَ بہ کن اَنت تانکہ ایندھن ءِ سپلائی چین ہموار بہ بیتءُ الس ءِ اعتماد ءِ وھد ءُ پاس ءِ وسیلگ ءَ برجم بہ بیت۔ دیوان ءَ گوشگ بوت کہ کمیٹی وتی دیواناں باقاعدگی ءَ برجاہ دار ایت تانکہ سرجمیں ملک ءَ ایندھن ءِ بے رکاوٹ دستیابی ءَ را دل یکیمی کنگ ءِ واستہ پٹرولیم ءِ ذخیرہ، درآمد ءِ روانی، مارکیٹ ءِ جاور ءُ سپلائی چین ءِ دیمروئی ءِ سر ءَ روچ پہ روچ چار ءُ تپاسی کنگ بہ بیت۔