وفاقی ءُ صوبائی حکومت وت مہ وتی کمک ءُ یکجاھیں حکمت عملی ءِ وسیلگ ءَ بلوچستان ءَ دائمی امن ءِ برجائی ءَ دل یکیمی کن اَنت، محسن نقوی، میر سرفراز بگٹی

کوئٹہ۔ 16 مارچ (اے پی پی):وفاقی وزیر داخلہ محسن نقوی ءُ بلوچستان ءِ سر وزیر میر سرفراز بگٹی ءِ سروکی ءَ بنجاہی وزیر ءِ سیکرٹریٹ ءَ امن ءُ ایمنی ءِ ھوالگ ءَ مزن تک ءِ دیوان برجم دارگ بوت کہ ایشی ءِ تہ ءَ وفاقی ءُ صوبائی ادارگ آنی مزنیں کارندہ آناں بھر زوری کت۔ گند ءُ نند ءَ بلوچستان ءِ امن ءُ ایمنی ءِ سرجمیں جاور، اوگان پناہ گِراں واتر کنگ، حوالہ ھندی ءِ بھتہ ءِ ھلاسی، اسمگلنگ ءِ گر ءُ دار ءُ اے دگہ ھاسیں بنگپانی سر ءَ سرجمی ءَ گپ ءُ تران کنگ بوت۔ گند ءُ نند ءِ تہ چیئرمین ناڈرا، ڈائریکٹر جنرل ایف آئی اے، ڈائریکٹر جنرل این سی سی آئیءُ انسپکٹر جنرل فیڈرل کانسٹیبلری ءَ وتی وتی ادارگ آنی ھوالگ ءَ جیڈھ آنی سر ءَ سرجمیں بریفنگ داتگ ءُ صوبگ ءَ ناجائزیں کار آنی گر ءُ دار، ادارگی گنجائش ءِ گہتریءُ امن ءُ ایمنی ءِ برجائی ءِ واستہ برجاھیں گامگیج آنی بابت ءَ سرپدی داتگ۔ دیوان ءَ بلوچستان ءَ دائمی امن ءِ جوڑ کنگ ءِ واستہ فیڈرل کانسٹیبلری ءِ ازمت لوٹگ ءِ یک ھاسیں پیسلہ کنگ بوت۔ اے درگت ءَ اولی بھر ءَ فیڈرل کانسٹیبلری ءِ دو بال ایر کنگ بنت وھدیکہ کل ءَ نزیک ءَ سئے ھزار کارندہ صوبگ ءِ جتا جتائیں حساسیں دمگ آنی تہ ءَ ڈیوٹی پیلو کن اَنت تانکہ امن ءُ ایمنی ءِ جاور ھال گیش مھکم کنگ بہ بنت۔ دیوان ءَ اے ھم پیسلہ کنگ بوت کہ بلوچستان ءَ وفاقی پٹ ءُ پولی ادارگ ءَ را گیش فعال ءُ کارآمد جوڑ کنگ بیت۔ اے مکسد ءِ واستہ ادارگ ءِ تہ ءَ دراہیں ھالیگیں پوسٹانی سر ءَ بنجاہی مردم بھرتی کنگ بنت تانکہ صوبہ ءِ ورنا آناں روزگار ءِ موہ پجارینگ بہ بنت ءُ بنجاہی تک ءَ ادارگ ءِ کارکردگی ءَ را گیش مھکم کنگ بہ بیت۔ گند ءُ نند ءِ تہ ءَ بلوچستان حکومت ءُ وفاقی حکومت ءِ نیام ءَ اے گپ ءِ سر ءَ ھم تپاک کنگ بوت کہ سوشل میڈیا ءِ سر ءَ ریاست ءِ ھلاپیں کارانیسر ءَ موثر نگرانی دل یکیمی کنگ بیت۔ اے درگت ءَ ریاستی ءُ راجی ادارگ آنی ھلاپ ءَ بے بنیں پروپیگنڈا ءِ شنگ کنگ ءُ الس ءَ را گمراہ کنگ ءِ تہ ءَ ھواریں عناصر آنی ھلاپ ءَ قانونی کارروائی گیش ترند کنگ بیت۔ اے موہ ءِ سر ءَ وفاقی تہی کارانی وزیر محسن نقوی ءَ بلوچستان حکومت ءَ را ھمک رنگیں کمک ءِ دل یکیمی دات ءُ گوشت کہ صوبہ ءَ امن ءُ ایمنی ءِ برجائیءُ ناشرکاری ءِ ھلاسی ءِ واستہ وفاقی حکومت بلوچستان حکومت ءِ گوما سرجمی ءَ کمک ءَ برجاہ دار ایت۔ آئی ءَ گوشت کہ بلوچستان پولیس ءِ پیشہ وارانہ صلاحیت ءِ تہ ءَ گیشی، نوکیں تربیتءُ وسائل آنی پھجاری ءِ واستہ ھم سرجمیں کمک پجاری کنگ بیت۔ آئی ءَ گوشت کہ بلوچستان ءِ جاورھالاں چہ ما درست جوانیں سرپد ایں صوبگ ءَ دائمی امن ءِ برجائی ءِ واستہ ھمک رنگ ءِ گام گیج کنگ بیت۔ بلوچستان ءِ سر وزیر میر سرفراز بگٹی ءَ دیوان ءَ گوں تران کنان ءَ گوشت کہ بلوچستان سرکار ناشرکاری ءُ آشوب ءِ ھلاسی ءِ واستہ سرجمیں زور ءُ بے دروریں جزم ءِ گوما گامگیج زورگ ءَ انت۔ آئی ءَ گوشت کہ ناشرکاری ءِ ھلاپ ءَ جنگ ایوک ءَ سیکورٹی فورسز ءِ نہ انت بلکینگ ءَ سرجمیں راج ءِ یکجائی جنگ انت ءُ ایشی ءِ تہ ءَ راجییکوئیءُیکوئی بنیاتی انت۔ آئی ءَ گوشت کہ من اولی روچ ءَ چہ اے گپ پدر کتگ کہ بلوچستان ءَ کانود ءِ حکمرانی ہر پیم ءَ دل یکیمی کنگ بیتءُ کانود ءِ حکمرانی ءِ سر ءَ ھچ وڑیں سمجھوتہ نہ بیت۔ بنجاھی وزیر ءَ گوشت کہ حکومت ءِ کارآمدیں حکمت عملی ءُ ادارگ آنی وت مہ وتی کمک ءَ چہ صوبہ ءِ جاور ھال ھاسیں رنگ ءَ گہتر بوتگ اَنت مرچی بلوچستان ءَ زھرشانی ءِ نام ءَ ھچ وڑیں شاہراہ بند نہ اِنت۔ بنجاھی وزیر ءَ صوبگ ءَ امن ءِ برجائی ءِ واستہ وفاقی حکومت ءِ کمک ءَ را ساڑات ءُ گوشت کہ یکجائی کوشست، یکجائی حکمت عملیءُ راجییکوئی ءِ وسیلگ ءَ ناشرکاریءُ ناامنی ءِ چیلنج آناں شکست دیگ بیت۔ گند ءُ نند ءِ گڈ ءَ وفاقی تہی کارانی وزیر محسن نقوی ءُ بلوچستان ءِ سر وزیر میر سرفراز بگٹی ءَ اے جزم ءِ پدا زور دات کہ وفاقی ءُ صوبائی حکومت بلوچستان ءَ دائمی امن ءِ برجائی، ریاستی حکومت ءِ استحکام ءُ الس ءِ جان ءُ مال ءِ رکھینگ ءَ را ہر قیمت ءَ یکوئی ءِ وسیلگ ءَ دل یکیمی کنت۔ گند ءُ نند ءَ وفاقی حکام ءَ ابید بلوچستان ءَ چہ صوبائی اسمبلی ءِ باسک میر ضیاء لانگو، چیف سیکرٹری بلوچستان شکیل قادر خان، ایڈیشنل چیف سیکرٹری ہوم حمزہ شفقت، آئی جی پولیس بلوچستان ءِ دگہ پرنسپل چیرک وزیر محمد طاہر خان ءَ بہر زرتگ ات۔