نریندر مودی ءُ نیتن یاہو دمگ ءِ بد امنی  ءُ بے رھبندی ءِ ذمہ وار انت، مشعال ملک

اسلام آباد۔16مارچ  (اے پی پی):چیئرپرسن امن ءُ دود ءُ ربیدگ ءِ گل ءُ ہریات ءِ سروک یاسین ملک ءِ زالبول مشال حسین ملک ءَ گشتگ کہ دمگ ءَ شنگ ءُ تالان بوھوکیں ناامنی ءُ بے رھبندی ءِ ذمہ وار بھارتی مزن وزیر نریندر مودی ءُ نیتن یاہو انت۔ دوئیں سروک دمگ ءَ کش ءُ چیل ءِ گیش کنگ ءُ امن ءِ کوشست آناں تاوان دیگ ءِ تہ ءَ کرد پیلو کنگ ءَ اَنت، اوگانستان ھندوستان ءُ اسرائیل ءِ دست ءَ گوازی مہ کنت۔ مئے جنگ گوں اوگانستان ءَ نہ اِنت بلکیں اودا ھستیں پراکسی آں گوں اِنت۔ احوالکاراں گوں تران کنان ءَ آئی ءَ گشتگ کہ کشمیر ءِ واستہ یاسین ملک ءَ آجوئی ءِ بیرک چست کتگ ءُ شہادت مئے منزل انت۔ ہندوستان مرچی یاسین ملک ءَ موت ءِ سزا دیگ لوٹیت۔ پاکستان ءُ فیلڈ مارشل سید عاصم منیر ءَ غزہ ءِ امن بورڈ ءِ واستہ سنگینیں کوشست کت تانکہ فلسطین ءَ امن بہ بیت ۔ آئی ءَ گوشت کہ مئے لوٹ اِنت کہ کشمیر ءِ جیڈھ ءِ سر ءَ ھم غزہ ءِ رنگ ءَ امن بورڈ جوڑ کنگ بہ بیت۔ مشال ملک ءَ گوشت کہ یاسین ملک کشمیری آنی وت واجئی ءِ ھک ءِ واستہ جہد ءُ کوشست ءِ لڑی علامت انت۔ مشال حسین ملک ءَ گشتگ کہ نیتن یاہو فلسطینیانی کُشندہ انت ءُ نریندر مودی کشمیریانی کُشندہ انت۔ آئی ءَ دوئیں سروکاں نوکیں دور ءِ یزید گْوشتگ ءُ میان اُستمانی انسانی ھکانی گلاں چہ لوٹ کتگ کہ آ مظلومیں راجانی کمک ءَ بہ کن اَنت ءُ کشمیری ءُ فلسطینیانی سر ءَ بوتگیں زُلم ءُ زوراکیانی ھلاپ ءَ توار چست بہ کن اَنت۔ آئی ءَ گوشت کہ پاکستان ءِ سروکی ھاسیں رنگ ءَ فیلڈ مارشل سید عاصم منیر ءِ کوشست آنی آسر ءَ غزہ ءِ جیڈھ ءَ را ایمنیں راہ ءِ شوھازگ ءِ کوشست کنگ بوتگ۔ کہ ایشی ءِ ھاتر ءَ امن ءِ بورڈ جوڑ کنگ بوت کہ ایشی ءِ تہا میان استمانی اسٹیبلشمنٹ ھم ھوار ات ءُ ایشی ءِ تہا پاکستان ءَ بنیاتی کرد پیلو کت۔ مشال حسین ملک ءَ گوشت کہ انچوش کہ غزہ ءِ واستہ امن بورڈ جوڑ کنگ بوتگ، کشمیر ءِ جیڈھ ءِ واستہ ھم امن بورڈ جوڑ کنگ بہ بیت تانکہ بھارتی جیل آنی تہ ءَ بندیں کشمیری سروک آنی یلہ کنگ ءِ واستہ یاسین ملک، شبیر شاہ ءُ ایشیا اندرابی ھوار دگہ سروک آناں کشمیر ءِ جیڈھ ءِ امن ءُ ایمنی ءِ گیواری ممکن بہ بیت۔ پاکستان ءُ افغانستان ءِ سیادیانی بابت ءَ گپ جنان ءَ آئی ءَ گشتگ پاکستان ءَ گوں افغانستان ءَ جنگ نیست ۔ مسئلہ اوگانستان ءَ ھستیں ھندی ءُ اسرائیلی پراکسی عناصر انت کہ آ پاکستان ءِ ھلاپ ءَ سرگرم انت ءُ پراکسی ءِ وسیلگ ءَ پاکستان ءَ ناشرکاری ءَ را گیش کنگ بوھگ ءَ انت۔ آئی ئَ گوشت کہ گوستگیں روچاں من افغان سفیر ئَ گوں گند ئُُ نند کتگ ۔ اے دیوان غیر رسمی بوتگ ءُ ایران ءِ سفیر ءِ میزبانی ءَ افطار ءِ شپ ءِ ورگ ءِ موہ ءَ بوتگ۔ آئی ءَ گوشت کہ اوگان سفیر ءَ گوں گند ءُ نند ءِ ساھت ءَ آئی ءَ اوگان سفیر ءَ را اے کلوہ سر کت کہ اوگانستان بھارت ءِ دست ءَ لیب مہ کنت ءُ مئے ملک ءَ چہ بھارت ءُ اسرائیل ءِ پراکسی ھلاس کنگ بہ بنت کہ پاکستان ءِ ھلاپ ءَ کارمرد کنگ بوھگ ءَ انت۔ مشال حسین ملک ءَ گوشت کہ بیک ڈور ڈپلومیسی ءِ دروازگ کدی بند کنگ مہ بیت۔ پاکستان ءَ نہ اوگان سفیر درکنگ کتگ ءُ نہ کہ اوگانستان ءَ پاکستان ءَ ھستیں وتی سفیر پدا لوٹائینتگ کہ دوئیں ملک آنی سیادی ءِ واستہ یک جوانیں دیمروئی یے ۔ آئی ءَ گوشت کہ کشمیری ءُ فلسطینی الس ءَ را امیت انت کہ اوگان راج مظلوم آنی توار جوڑ بیت ءُ بھارت ءِ پالیشی آنی کمک ءَ نہ کنت۔ پاکستان ءُ اوگانستان ءَ را ھندوستان ءُ اسرائیل ءِ پالیسیانی دیم ءَ یکجائی ءَ دیم پہ دیم بوھگی اِنت۔ آئی ءَ گوشت کہ اوگان راج ءَ مُدام کشمیری ءُ پاکستانی آں کمک کتگ ءُ پاکستان ءَ ھم مُدام اوگان الس ءِ واستہ وتی دروازگ پچ داشتگ اَنت۔ آئی ءَ وتی ترس ءِ درشان کت کہ بھارت وتی پراکسی آنی وسیلگ ءَ اوگانستان ءُ ایران ءَ را پاکستان ءِ ھلاپ ءَ چست ءُ ایر کنگ ءِ واستہ کارمرد کت کنت۔ ایران ءُ اسرائیل ءِ میان ءَ کش ءُ چیل ءِ وھد ءَ ھندی انٹیلی جنس ادارہ راو ءَ ایران ءِ بابت ءَ رازداریں ھال اسرائیل ءِ انٹیلی جنس ادارہ موساد ءَ داتگ اَنت۔ نریندر مودی ءُ نیتن یاہو انسانیت ءِ کوش انت ءُ اوگانستان مظلومیں راجانی حمایت کنگ ءِ بدل ءَ آہانی حق ءَ اوشتات کنت۔