پاکستان ءِ پائیداریں اقتصادی دیمروئی ءِ تہ ءَ ورنا آنی کرد سک باز المی اِنت، چیئرمین مزن وزیر ءِ ورنا آنی پروگرام رانا مشہود احمد خان ءَ اوورسیز پاکستانی بزنس اینڈ ٹریڈ ءِ فوکل پرسن شہریار میمن ءِ شرپ ءَ افطار ءِ شپ ءِ ورگ ءَ گوں تران کنان ءَ گشتانک دات

اسلام آباد۔13مارچ (اے پی پی): مزن وزیر ءِ ورنا پروگرام ءِ چیئرمین رانا مشہود احمد خان ءَ گوشت کہ پاکستان ءِ پائیدار اقتصادی دیمروئی ءَ ورنا آنی کرد سک باز المی اِنت ءُ حکومت ورنا آناں بااختیار کنگ ءِ واستہ عملی گامگیج کنگ ءَ اِنت۔ آئی ءَ اے گپ جمعہ ءِ روچ ءَ اسلام آباد ءَ وتی گس ءَ مزن وزیر ءِ ورنا پروگرام ءِ فوکل پرسن آف اوورسیز پاکستانی بزنس اینڈ ٹریڈ شہریار میمن ءِ واستہ افطار ءِ شپ ءِ مراگش ءِ میزبانی ءِ ساھت ءَ کت۔ افطار ءِ مراگش ءَ پارلیمنٹ ءِ باسک، جتاجتائیں ملک آنی سفیر، سفارتکار ءُ نامداریں سیاسی ءُ کاروباری مردماں بہر زرتگ۔ اے موہ ءِ سر ءَ راجی ءُ صوبائی اسمبلی ءِ باسک ءَ ابید کاروباری برات، سرمایہ کار ءُ چاگردی ءُ سیاسی مردم آنی مزنیں کساس ھم ساڑی ات۔ اے موہ ءِ سر ءَ پاکستان ءَ سرمایہ کاری ءَ را دیمروئی دیگ ، اوورسیز پاکستانی آنی واستہ کاروباری موہ آناں گیش کنگ ءُ ورنا آناں معاشی رنگ ءَ توانمند کنگ ءِ ھوالگ ءَ جیڈھ آنی سر ءَ گپ ءُ تران کنگ بوت۔ ھاسیں گپ ءُ تران ءِ تہ ءَ رانا مشہود احمد خان ءَ گوشت کہ مزن وزیر ورنا پروگرام ءِ چیر دستی ءَ ورنا آنی واستہ روزگار، کاروبار ءُ ہنر ءِ دیمروئی ءِ واستہ بازیں منصوبگ دیم ءَ آرگ بوھگ ءَ انت تانکہ آ ملکی معیشت ءِ تہ ءَ جوانیں کردے پیلو بہ کن انت۔ آئی ءَ گوشت کہ حکومت ورنا آناں کاروبار ءِ نیمگ ءَ راجیگ کنگ ءِ واستہ اسٹارٹ اپس، ای کامرس ءُ جدید ٹیکنالوجی ءِ شوبگ آنی تہ ءَ موہ پجاری کنگ ءَ انت۔ آئی ءَ گوشت کہ کسان ءُ میاں اوستمانی کاروباری ادارگ آناں دیمروئی دیگ حکومت ءِ اولی ترجی آنی تہ ءَ ھوار انت چیا کہ اے شوبگ معیشت ءَ روزگار ءِ موہ پیداک کنگ ءَ ھاسیں کرد پیلو کنت۔ رانا مشہود احمد خان ءَ گوشت کہ پاکستان ءَ را گلوبل سپلائی چین ءَ گوں جوانیں رنگ ءَ یکجا کنگ وھد ءِ ضلورت اِنت۔ اے مکسد ءِ واستہ بنجاہی کاروبار ءُ چیمبر آف کامرس ءَ را میاں اوستمانی مارکیٹ آں رسائی ءِ واستہ گامگیج کنگ بوھگ ءَ انت۔ آئی ءَ گوشت کہ اوورسیز پاکستانی ملکی معیشت ءِ ارزشتی ایں سرڈگار اَنت، حکومت ایشانی واستہ جوانیں چاگرد پجاری کنگ ءَ اِنت تانکہ کاروباری موہ آنی تہ ءَ گیشی ءُ سرمایہ کاری ءَ را دیمروئی دیگ بہ بیت۔ یک جستے ءِ پسو ءَ آئی ءَ گوشت کہ معاشی چست ءُ ایر آنی تہ ءَ زالبول آناں سرگرمیں کرد دیگ ءِ واستہ ھاسیں گامگیج کنگ بوھگ ءَ انت۔ زالبولیں کاروباری مردم آناں آسراتی ءُ موہ پجاری پاکستان ءِ اقتصادی دیمروئی ءِ واستہ سک باز المی انت ۔ رانا مشہود احمد خان ءَ گوشت کہ حکومت برآمد ءِ سرا مبنی اقتصادی پالیشی ءِ رندگیری ءَ کنگ ءَ انت ءُ ورنا آناں جدید کاروباری ھنر آنی گوما لیس کنگ ءَ انت تانکہ آ جھان ءِ مارکیٹ ءَ مقابلہ ءِ لائک جوڑ بہ بنت۔ آئی ءَ اے امیت سہرا کت کہ ورنا آنی توانائی ءُ صلاحیت آناں کارمرد کنان ءَ پاکستان ءَ را معاشی رد ءَ مھکم ءُ وشھال جوڑ کنگ بوت کنت۔ اے موہ ءِ سر ءَ پاکستان ءَ ترکمانستان ءِ سفیر ءُ سفارتی کور ءِ ڈین اتاجان مولاموف، ملائیشیا ءِ سفیر اظہر بن منزلان، تاجکستان ءِ سفیر یوسف شریف زاده طاہر ءُ بازیں یورپی ءُ مغربی سفارتکاراں ھوار ویتنام، زمبابوے، شام ءُ نیپال ءِ سفیر ھوار اَنت۔ پاکستان ءَ را یک دیمروئی کنوکیں مارکیٹ ءِ رنگ ءَ پیش کنان ءَ سفارتکار آناں گوشت کہ پاکستان ءِ اسٹریٹجک جغرافیائی جاہ ءُ جاہ ءِ سبب ءَ پاکستان ءِ تہ ءَ بے دروریں اقتصادی گنجائش است انت۔ آئی ءَ گوشت کہ پاکستان کشت ءُ کشاری، ٹیکسٹائل ءُ آئی ٹی ءِ وڑیں شوبگ آنی تہ ءَ گلوبل تجارت ءِ تہ ءَ ھاسیں کرد پیلو کت کنت، وھدیکہ پاکستان ءِ تہ ءَ میاں اوستمانی ایشیا ءِ گیٹ وے ءِ بستار ءَ ھم مزنیں ارزشت ءِ است انت۔ راولپنڈی چیمبر آف کامرس اینڈ انڈسٹری ءِ صدر شوکت ءَ ھم مراگش ءَ بھر زوری کت ءُ گوشت کہ پاکستان ءِ معیشت ءَ را مھکم کنگ ءِ واستہ گلوبل سپلائی چین ءِ گوما رابطہ ءِ تہ ءَ گیشی المی اِنت، وھدیکہ دمگی تجارت ءَ را دیمروئی دیگ ءَ چہ پائیدار اقتصادی دیمروئی رس ایت۔ مراگش ءَ وفاقی وزیر رانا قاسم نور، مبارک زیب، سینیٹر وقار احمد خان، ملک حبیب، سینیٹر عبدالقیم سومرو، راجی اسمبلی ءِ باسک ءُ مسلم لیگ ن ءِ سروک انجم عقیل ءِ ھوار اسلام آباد چیمبر آف کامرس اینڈ انڈسٹری ءِ نمائندگاں بہر زرتگ ات۔