وزیراعظم نا پیٹرولیم مصنوعات آتا متعین نہاد آتیا بہاکننگ ءِ پک کننگ نا پارت، حکومت جہانی بے چیٹی نا ردا ٹ ہر وڑ نا حالیت آتتون مون تننگ کن تیار ءِ، شہباز شریف

اسلام آباد۔ 16 مارچ (اے پی پی)وزیراعظم محمد شہباز شریف پیٹرولیم مصنوعات نامتعین نہاد آتیا بہا ءِ پک کننگ نا پرمان کرسا پارینے کہ حکومت جہانی کہول آ برجا ء بے چیٹی نا رداٹ ہر وڑ نا حالیت آتتون مون تننگ کن تیار ءِ۔وزیراعظم محمد شہباز شریف نا کماشی ٹی جہانی کہول آ بے چیٹی نا رداٹ ملکی زر گزران نا سوگوی و الس ءِ ریلیف تننگ نا گام گیج آتا بابت اسہ جاچ دیوان اس دوشنبے نا دے داڑے اڈ ہلک ، ہراٹی نائب وزیراعظم و وزیر خارجہ محمد اسحاق ڈار، بنجائی وزیر خزانہ محمد اورنگزیب، بنجائی وزیر اقتصادی امور احد خان چیمہ، بنجائی وزیر پیٹرولیم علی پرویز ملک، بنجائی وزیر حوالکاری و شینکاری عطاء اللہ تارڑ، بنجائی وزیر آئی ٹی شزا فاطمہ خواجہ، وزیر مملکت خزانہ بلال اظہر کیانی و تعلقدار ادارہ غاتا بڑزکو آفیسر آک شریک ئسر۔ وزیراعظم آفس نا میڈیا ونگ انا کنڈ آن جاری بیان نا رِد اٹ دیوان آن تران کرسا وزیراعظم پارے کہ ساڑی آ جہانی حالیت آتے مون آ تخسا الس ءِ ریلیف تننگ نا بابت پین گام گیج آتیا ہم سلابت برجا ءِ، حکومت نا وخت آ کروک آ فیصلہ غاتا سوب آن دا وخت آ ملک اٹی پیٹرولیم مصنوعات نا مناسب مقدار ساڑی ءِ۔ وزیراعظم پارے کہ بدل مروک آجہانی حالیت آتے مون آتخسا ملک اٹی زرگزرانی سوگوی قائم کننگ کن وخت آ جوڑ کروک آ کمیٹی نا فیصلہ غاتا سوب آن الس کن تیل نا برجا فراوانی ممکن مس۔او پارے کہ قومی کہول آ بچت و کفایت شعاری نا گام گیج آتیا عمل درآمد بناکرینے پین کاریم برجا ءِ۔ کفایت شعاری نا مچ آ گام گیج آتیا عمل درآمد ءِ پک کننگ کن تھرڈ پارٹی آڈٹ نا پارت مہالوآن ہی جاری کننگانے۔ او زرگزرانی سوگوی و الس کن ریلیف ءِ حکومت نا اولیت گوندسا پارے کہ مچ آ گام گیج آک نئے بیرہ دمدستی ریلیف بلکن مریس مدی زرگزرانی سوگوی ءِ مون آ تخسا کننگ انگ ءُ۔وزیراعظم پارے کہ حکومتِ پاکستان جہانی جھیڑہ غاتا سوب آن ہر وڑ نا حالیت آتون مون تننگ کن تیار ءِ۔ او پیٹرولیم مصنوعات نا تقسیم کار کمپنی تے پارت کرے کہ حکومت نا متعین نہاد آتیا تیل انا بہاکننگ ءِ پک کننگے و دا باندات اٹی شفافیت ءِ برقرار تخنگے۔دیوان اٹ وزیراعظم ءِ ملک اٹی ساڑی تیل نا کوڑی ، فیول نا گرج ءِ پورو کننگ کن پیٹرولیم مصنوعات نا درآمدات و الس ءِ جہانی بے چیٹی نا رداٹ ریلیف تننگ نا گام گیج آتیا حوال تننگا۔ حوال اٹی پاننگا کہ حکومتِ پاکستان تیل انا متعین نہاد آتیا بہا ءِ پک کننگ اٹی ءِ۔ تیل انا مدامی فراوانی و نہاد آتیا بہا ءِ پک کننگ کن "پاک ایپ” (Pak App) ٹی صارف آتیکن فیچر اس اوار کننگانے۔ داسہ صارف آک پاک ایپ نا کمک اٹ ملک اٹی ہراڑے ہم تیل انا عدم دستیابی یا کبین دام تیا بہاکننگ نا بابت تعلقدار کمامدارآتے معلومدار کننگ کیک، ہراڑآ حکومت نا کنڈ آن دمدستی گام گیج کننگک ۔ دیوان ٹی بشخ ہلوک آک تدوک آ جمعہ آ وزیراعظم نا کنڈ آن تیل انا نہاد آتیٹی پین ودکی کپننگ نا فیصلہ نا ستاءِ کریر۔