نیشنل پریس کلب صحافی تا سوگو توار ءِ، بنجائی وزیر حوالکاری و شینکاری عطاء اللہ تارڑ نا نیشنل پریس کلب نا پوسکن گچین مروک آ عہدیدار آتون گپ وتران

اسلام آباد۔ 16 مارچ (اے پی پی) بنجائی وزیر حوالکاری و شینکاری عطاء اللہ تارڑ پارینے کہ نیشنل پریس کلب صحافی تا سوگو توار ءِ، صحافی برادری نا ویل آتا ایسری کن وزارت حوالکاری تینا کڑد ءِ ادا کرسا کیک۔ داہیت ءِ او دوشنبے نادے آ داڑے سینئر صحافی حاجی نواز رضانا کماشی ٹی اوڑدہی کن بروک نیشنل پریس کلب نا پوسکن گچین مروک آ صدر عبدالرزاق سیال و سیکرٹری ڈاکٹر فرقان راؤ تون گپ وتران کرسا پارے۔ بنجائی وزیر حوالکاری عطاء اللہ تارڑ نیشنل پریس کلب نا گچین کاری تیٹی سرسہب مروک آہڑتوم آ گروپ ڈیموکریٹس و جرنلسٹ پینل نا عہدیدار آتے مبارکبادی تس و پوسکن گچین مروک آ ایگزیکٹیو باڈی نا باسک آتیکن نیک است خواہی نا درشانی ءِ کرے۔ اوڑدہی ٹی صحافی برادری ءِ مون تروک امور تون اوار ایلو اہم باندات آتیا ہم گپ وتران مس۔ داوخت آ گپ وتران کرسا بنجائی وزیر حوالکاری پارے کہ نیشنل پریس کلب صحافی تا سوگو توار ءِ ہرا صحافی برادری نا ویل آتا ایسری و کسبی قدر انا مون آ دننگ اٹ اہم کڑد ادا کننگ ءِ۔ اوپارے کہ حکومت صحافی تا راجی آسودہی و میڈیا نا ویل آتا ایسری کن ہر ممکن کمکاری ءِ برجاتخک۔بنجائی وزیر پارے کہ صحافی برادری نا ویل آتا ایسری کن وزارت حوالکاری تینا کڑد ءِ ادا کرسا کیک ، تعلقدار باندات آتا ایسری کن ہرممکن گام گیج کننگک۔ ڈل انا باسک آک بنجائی وزیر حوالکاری ءِ نیشنل پریس کلب  نا پوسکن گچین مروک آ عہدیدار آتا سوغندی دود اٹی بشخ ہلنگ نا سلہ خلکر ہرا چنکا عئید آن پد اڈ ہلیک۔ بنجائی وزیر سوغندی دود اٹی بشخ ہلنگ نا سلہ ءِ امنا کرے۔ داوخت آ وزیراعظم نا میڈیا کوآرڈینیٹر بدر شہباز وڑائچ ، بنجائی سیکرٹری حوالکاری اشفاق احمد خلیل و پرنسپل انفارمیشن آفیسر مبشر حسن ئسک ہم ساڑی ئسر۔