بنجاو صوبائی حکومت تین پہ تینی کمکاری و سوگو حکمت عملی نا کمک اٹ بلو چستان اٹی پائیدار امن نا قیام، ریاستی عملداری نا سوگوی و الس نا جان و مال انا رکھ ءِ ہر حال اٹ پک کیرہ، محسن نقوی، میر سرفراز بگٹی

کوئٹہ۔ 16 مارچ (اے پی پی) بنجائی وزیر داخلہ محسن نقوی و وزیراعلیٰ بلوچستان میر سرفراز بگٹی نا کماشی ٹی امن وایمنی نا بابت اسہ بڑزکو کہولی دیوان اس دوشنبے نادے آ داڑے چیف منسٹر سیکرٹریٹ اٹی اڈ ہلک ہراٹی بنجائی و صوبائی ادارہ غاتا بڑزکو کمامدارآک بشخ ہلکر دیوان اٹی بلوچستان اٹی امن و ایمنی نا جم حالیت، اوغان باہوٹ آتا واپسی، حوالہ ہنڈی بھتہ خوری نا چٹفنگ، اسمگلنگ نا توننگ و ایلو اہم امور تیا سرجمی اٹ سجفنگا۔ دیوان اٹی چیئرمین نادرا، ڈائریکٹر جنرل ایف آئی اے ، ڈائریکٹر جنرل این سی سی آئی و انسپکٹر جنرل فیڈرل کانسٹیبلری تینا تینا ادارہ غاتا بابت امور آ جوان حوال تسر و صوبہ ٹی  غیرکانودی سرجزآتا توننگ، ادارہ جاتی کاریم نا کچ اٹی گچینی و امن و سوگوی نا قیام کن برجاگام گیج آتیان معلومدار کریر دیوان اٹی بلوچستان اٹی پائیدار امن نا قیام کن فیڈرل کانسٹیبلری نا خذمت دوئی کننگ نا اہم فیصلہ کننگا دا رداٹ اولیکو ریسہ ٹی فیڈرل کانسٹیبلری نا اِرا ونگ تعینات کننگک وخت اس کہ جم وڑاٹ کم و ود مسہ ہزار کارندہ صوبہ نا چندی حساس علاقہ غاتیٹی فرض سرایترہ تانکہ امن و ایمنی نا حالیت آتے پین سوگو کننگ مرے۔ دیوان اٹی دا ہم فیصلہ کننگا کہ بلوچستان اٹی فیڈرل انویسٹی گیشن ایجنسی(ایف آئی اے) ءِ پین فعال و گچین کننگک و دا مسخت کن ادارہ ٹی ساڑی غٹ خورک آسامی تیا ہندی بندغ آتے بھرتی کننگک تانکہ صوبہ نا ورناتے روزگار نا وارخواہی فراوان مرے و ہندی کہول آ اداورہ نا کارکڑد ءِ پین سوگو کننگ مرے دیوان اٹی حکومت بلو چستان و بنجائی حکومت نا نیام اٹ داہیت آہم امنا کننگاکہ سوشل میڈیا غا ریاست مخالف سرجزآتا گچین چاروکی ءِ پک کننگک دا چرجوئی ٹی ریاست و قومی ادارہ غاتا برخلاف بے بنداو پروپیگنڈا تالان کننگ و الس ءِ گمراہ کننگ اٹ اوار زموار آتا برخلاف کانودی کارروائی تے پین ترند کننگک ۔ داوخت آ بنجائی وزیر داخلہ محسن نقوی بلوچستان حکومت ءِ ہرممکن کمکاری نا باوری کرفسا پارے کہ بنجائی حکومت صوبہ ٹی امن و سوگوی نا قیام و دہشت گردی نا چٹفنگ کن حکومت بلوچستان تون پورو کمکاری ءِ برجاتخک اوپارے کہ بلوچستان پولیس نا کسبی کاریم نا کچ اٹی ودکی ، پوسکن تربیت و وسیلہ غاتا فراوانی کن ہم پبی کمک فراوان کننگک ، اوپارے کہ بلوچستان نا حالیت آتیان نن غٹ جوانی اٹ بلد اُن صوبہ ٹی دیرپا امن نا قیام کن ہرممکن گام گیج کننگک، وزیراعلیٰ بلو چستان میر سرفراز بگٹی دیوان آن تران کرسا پارے کہ حکومت  بلوچستان دہشت گردی و بدامنی نا چٹفنگ کن پورو واک و بدل مفروک عزم اتون گام گیج کننگ ءِ اوپارے کہ دہشت گردی نا برخلاف جنگ بیرہ سیکورٹی فورس آتا آخا بلکن مچ آ قوم انا اسیجائی جنگ ءِ و دا ٹی قومی سیوت و یکجہتی بنداوی حیثیت تخک ، اوپارے کہ اولیکو دے آن پیدوار کرینن کہ بلوچستان اٹی ریاست نا عملداری ءِ ہر حال اٹ پک کننگک و کانود نا بالادستی آ ہچ ءُ سمجھوتہ اس کننگپک ، وزیراعلیٰ پارےکہ حکومت نا گچین حکمت عملی وادارہ غاتا تین پہ تینی کمکاری نا سوب صوبہ ٹی حالیت آتیٹی پیدوار گچینی بسنےو  اینو بلوچستان اٹی برانز نا پن آ ہچ ءُ شاہرہ اس بند مفک۔ دیوان اٹی بنجائی کمامدارآتیان بیدس بلوچستان آن صوبائی اسمبلی نا باسک میر ضیاء لانگو، چیف سیکرٹری بلوچستان شکیل قادر خان، ایڈیشنل چیف سیکرٹری داخلہ حمزہ شفقات، آئی جی پولیس بلوچستان محمد طاہر خان ، پرنسپل سیکرٹری وزیراعلیٰ عمران زرکون تون اوار ایلو کمامدارآک ساڑی ئسر۔