بروک آ مالی سال انا بجٹ اٹی اسہ ہزار اسکول آتا اپ گریڈیشن وآؤٹ آف اسکول چنا تے اسکول اسکان رسینگ کن پنچ سالہ پروگرام نا سلاہ، تعلیمی شونداری کن جوان گام گیج آتا فیصلہ، وزیراعلیٰ بلوچستان میر سرفراز بگٹی نا کماشی ٹی بجٹ نا تیاری تابابت دیوان

کوئٹہ۔ 16 مارچ(اے پی پی) حکومت بلوچستان صوبہ ٹی تعلیمی پسماندگی نا چٹّفنگ کن انقلابی گام گیج کننگ نا فیصلہ کرینے، دا رِد اٹ وزیراعلیٰ بلوچستان میر سرفراز بگٹی نا کماشی ٹی بروک آ مالی سال انا بجٹ نا تیاری تا بابت اسہ بڑزکو کہولی دیوان اس مس، ہراٹی تعلیم نا بشخ انا گچینی و اسکول آتیان پیشن چنا تے تعلیمی ادارہ غاتیٹی اتنگ کن جوان ءُ حکمت عملی اسے آ سجفنگا۔ دیوان اٹی چیف سیکرٹری بلوچستان شکیل قادر خان بروک آ مالی سال انا بجٹ نا اہم خدوخال آتیا پورو حوال تس۔ حوال اٹی پاننگا کہ صوبہ ٹی اسکول آتیان پیشن چنا تے تعلیم نا دنگ اٹی اتنگ کن پنچ سالہ جامع پروگرام نا سلاہ تننگانے تاکہ زیات آن زیات چنا تے اسکول آتسکان اتنگ مرے ۔ دیوان اٹی بروک آ مالی سال انا بجٹ اٹی 679 پرائمری و 409 مڈل اسکول آتے اپ گریڈ کننگ نا فیصلہ ہم کننگا۔ حوال نا رداٹ کم و ود اسہ ہزار اسکول آتا اپ گریڈیشن آن تدوک آ پانزدہ سال اٹی ودی مروک آ تعلیمی عدم توازن بھلو کچ اسے ٹی چٹنگ نا گمان ءِ ۔ دیوان اٹی زالبول آتا تعلیم نا مون آ دننگ کن خوانوک آ مسن تیکن معقول ءُ ماہانہ وظیفہ اس تننگ نا سلاہ غاہم سجفنگا تانکہ مسن تا تعلیم نا مون آ دننگ و اسکول آتیٹی اوفتا حاضری ءِ پک کننگ مرے۔ دا وخت آ محکمہ پلاننگ اینڈ ڈویلپمنٹ نا کنڈ آن 174 ارب روپئی نا خڑچ اٹ 308 محکمانہ شونداری اسکیم تیا ہم پورو حوال تننگا۔دیوان آن تران کرسا وزیراعلیٰ بلوچستان میر سرفراز بگٹی پارے کہ تعلیم نا بشخ اٹ اصلاحات حکومت نا اولیت ءِ و ہر چنا ءِ اسکول اسکان سرکننگ حکومت نا زمواری ءِ۔ او پارے کہ بروک آ مالی سال انا بجٹ اٹی تعلیم، جان جوڑی و الس ءِ بنداوی آسراتی تا فراوانی ءِ اولیت تننگک ۔ وزیراعلیٰ پارے کہ تعلیم اٹ زرکاری دراصل بلوچستان نا روشنا آخبت اٹ زرکاری ءِ، حکومت صوبہ ٹی تعلیمی آسراتی تے پوسکن آ خواست آتون ہم گرنچ کننگ کن عملی گام گیج کننگ اٹی ءِ تانکہ ورنا چینءِ گچین ءُ وارخواہی اس دُو برے۔او پارے کہ صوبہ نا مر مر انگا علاقہ غاتے ٹی ہم تعلیمی ادارہ غاتا گچینی حکومت نا اولیت ءِ، دا مسخت کن غٹ تعلقدار ادارہ غاتے اواری اٹ کاریم کروئی مریک تاکہ تعلیمی بشخ اٹ حقی و دیرپاگچینی اتنگ مرے ۔