کوئٹہ۔16 مارچ (اے پی پی )پارلیمانی سیکرٹری ٹرانسپورٹ میر لیاقت لہڑی پارینے کہ الس نا خذمت و علاقہ نا شونداری ننا سیاست نا بنداوی مسخت ءِ اور او مدام الس تون سلوک مریک ۔ الس نا ویل آتے ایسر کننگ کن غٹ دوئی وسیلہ غاتے کاریم اٹ اتنگ انگ ءِ،  حلقہ ٹی ارب آ روپئی نا خڑچ آن شونداری اسکیم تیا کاریم برجا ءِ، ہرافتا پورو مننگ آن الس ءِ بنداوی آسراتی تا فراوانی ٹی کمک رسینگک۔دا ہیت آتے او لہڑی ہاؤس کوئٹہ ٹی اوڑدہی کروک آ علاقہ نا شرفمندآک، قبائلی سرکڑدہ ، پیپلز پارٹی نا کارندہ و گرینڈ ہدہ سپورٹس کمیٹی نا کنڈ آن تروک آ افطار نا وخت آ گپ و ت ران کرسا پارے۔ دا وخت آ بروک آ ڈل پارلیمانی سیکرٹری میر لیاقت لہڑی ءِ علاقہ ءِ مون تروک ویل، شونداری امور و علاقائی حالیت آتیان معلومدار کریر۔ پارلیمانی سیکرٹری ٹرانسپورٹ میر لیاقت لہڑی اوفتا ویل آتے جوانی اٹ بِنگ و باوری کرفے کہ السی ویل آتے ایسر کننگ و علاقہ نا شونداری کن ہر ممکن گام گیج کننگک۔افطار نا وخت آ ملک و صوبہ نا شونداری، امن و ایمنی و الس نا شونہالی کن خصوصی دعاہم کننگا۔ میر لیاقت لہڑی پارے کہ روچہ مبارک نا مقدس آ تُو ننے صبر، سیوب و مخلوق نا خذمت نا سبخ ایتک۔ او پارے کہ بلوچستان حکومت السی ویل آتے ایسر کننگ، ورنا تا کنڈ آن مثبت سرجزآتا مون آ دننگ و گوازی نا پڑتے آباد کننگ کن عملی گام گیج کننگ اٹی ءِ۔او گرینڈ ہدہ سپورٹس کمیٹی نا دا گام انا ستاءِ کرے وپارے کہ دا وڑ نا دود آتیان راج اٹی ایلمی، ہم گرنچی و مثبت سوچ ءِ مون آ دننگک ۔ او پارے کہ حکومت الس نا ویل آتے ایسر کننگ کن غٹ دوئی وسیلہ غاتے کاریم اٹ اتنگ اٹی ءِ و گچین کاری نا وخت آ الس تون ہرا قول آتے کننگا اوفتے اسٹ اسٹ آپورو کننگ انگ ءِ۔ ان شاء اللہ الس ننے آ ہرا پت انا درشانی ءِ کرینےاوفتا پت ءِ ٹھیس تفنہ ۔ او پارے کہ الس نا خذمت و علاقہ نا شونداری اونا سیاست نا بنداوی مسخت ءِ او مدام الس تون سلوک ءِ۔ اوعلاقائی شونداری ، تین پہ تینی امنائی  و سیوت ا لسی خذمت نا جوزہ ءِ پین سوگو کننگ آ ہم زور شاغا۔