کوئٹہ۔ 16 مارچ (اے پی پی )صوبائی وزیر بلدیات و دیہی شونداری نوابزادہ امیر حمزہ زہری چنکا عئید انا وخت آ گمانی پِر تا رداٹ شار اٹی سفائی ستھرائی نا خاص ءُ بندوبست کننگ نا پارت جاری کرینے۔ او "صفاء کوئٹہ” ءِ مچ آ شار اٹی سفائی نا حالیت آتے جوان کننگ و عئید آن مُست مچ آ تیاری تے پورو کننگ نا پنت و شون کرے۔صوبائی وزیر نوابزادہ امیر حمزہ خان زہری پارے کہ عئید گاہ ، مسیت، عئید میلہ ، بھلا کسر و گلی محلّہ غاتیٹی سفائی ءِ پک کننگ المی ءِ تانکہ شار والا تے عئیدانا وخت آ اسہ ساف ءُ چاگڑد اس دُو برے۔ او پارے کہ کوئٹہ نا گچین کروک آ السی نمائندہ غاتا کنڈ آن گڑاس ہند آتیا سفائی نا غیر تسلی بخش حالیت آتا بابت غاو ملنگ ءِ ، ہندا سوب آن السی نمائندہ غاتا پیدواری آ ہمو علاقہ غاتیاہم زوت آن زوت سفائی نا گام گیج کننگے۔صوبائی وزیر بلدیات و دیہی شونداری نوابزادہ امیر حمزہ زہری پارت کرے کہ چنکا عئید آن مُست شار انا ندی نالہ غاتا سفائی ءِ پورو کننگے تانکہ پِر تیٹی دیر انا کشنگ نا ویل ودی مف ۔ او عئید انا وخت آ سفائی نا عمل ءِ گچین کننگ کن تعلقدار ملازم آتا چھٹی تے منسوخ کننگ نا پارت کرے، او میٹروپولیٹن کارپوریشن کوئٹہ نا ایڈمنسٹریٹر ءِ پارت کرے کہ شار اٹی سفائی نا حالیت آتا گچین چاروکی کن اسہ خاص ءُ کمیٹی اس جوڑ کننگے تانکہ سفائی نا بندوبست آتے ہر حال اٹ برقرار تخنگ مرے ۔