اسلام آباد۔ 16 مارچ(اے پی پی )بنجائی وزیر داخلہ محسن نقوی گوادر نا علاقہ ٹی کوسٹ گارڈ انا چیک پوسٹ آ سم کاری نا واقعہ نا سخت انگا لوز آتے ٹی مذمت ءِ کرینے ۔ وزیر داخلہ دا جلہو اٹی شہیدی نا جام ءِ نوش کروک آ کوسٹ گارڈ انا ورنا سلیم و عدنان ءِ اوفتا بھلا قربانی آ خراجِ عقیدت پیش کرینے ۔او تینا کلہو اٹی شہید آتا خاہوت آتون ہمدردی و ہڑزخواہی نا درشانی ءِ کرسا پارے کہ نن شہید آ ورنا تا خاہوت آتا غم اٹی بریبر نا شریک اُن و اوفتا پورو خیال ءِ تخنگک۔او مستی پارے کہ کوسٹ گارڈ انا ورنا ک تینا جان تے ندر کرسا دہشت گرد آتا گندہ انگا عزم آتے بے سہب کریر، اوفتادا قربانی زیان مفک ۔ وزیر داخلہ دا واقعہ ٹی ٹھپی مروک آ سپاہی عظیم کن دراخ جوڑی نا دعا کرے و تعلقدار کمامدار آتے پارت کرے کہ ٹھپی مروک آ ورنا ءِ درمان نا گچین آسراتی تننگے ۔