اسلاموفوبیا و مذہبی تعصب ءِ ھلاسی ءِ واستہ عملی گامگیج المی انت، سردار ایاز صادق

اسلام آباد۔15مارچ  (اے پی پی):راجی اسمبلی ءِ اسپیکر سردار ایاز صادق ءَ اسلام فوبیا ءِ ھلاسی ءِ میاں اوستمانی روچ ءِ موہ ءَ وتی کلوہ ءِ تہ ءَ گوشت کہ اسلام فوبیا ءِ ھلاسی ءِ واستہ میاں اوستمانی براتی ءَ را موثر ءُ یکجائی گامگیج چست کنگ لوٹ ایت۔ اسلام ءِ ھلاپ ءَ نفرت، تبعیض ءُ تعصب پہ جھان ءِ امن ءُ مذاہب ءِ ھمگرنچی ءَ مزنیں ھترہ یے ۔ یک شمبے ءِ روچ ءَ راجی اسمبلی ءِ سیکرٹریٹ ءِ نیمگ ءَ جاڑی بوتگیں بیان ءِ تہ ءَ سردار ایاز صادق ءَ گوشت کہ اسلاموفوبیا سرجمیں دگنیا ءَ لاکھوں مسلمان آنی بنیاتی ھک ءُ مذھبی آجوئی ءَ را تاوان دیگ ءَ انت۔ آئی ءَ گوشت کہ اسلاموفوبیا ءِ ھلاسی ءِ میاں اوستمانی روچ مسلمان آنی ھلاپ ءَ نفرت ءُ تعصب ءِ گیش بوھوکیں رجحان آناں پدر کنگ ءِ روچ اِنت۔ اے روچ ءِ مول ءُ مراد مذہبی رواداری، یکے دومی ءِ احترام ءُ امن ءُ ایمنی ءِ دیمروئی انت۔ آئی ءَ گیش کرتگ کہ دگنیا ءِ جتا جتائیں دمگاں مسلمان مذھبی تبعیض ءِ آماچ اَنت ءُ نفرت ءِ گپ، عبادت جاہانی سر ءَ اُرش ءُ چاگردی تعصب انسانی ھک ءُ مذھبی آجوئی ءِ بنیاتی رھبندانی ھلاپ اِنت۔ سردار ایاز صادق ءَ گوشت کہ کجام ھم مذھب ءَ گوں ناشرکاری یا انتہا پسندی ءَ ھمگرنچ کنگ راستی ءِ ھلاپ انت ۔ آئی ءَ گوشت کہ مسلمان آنی ھلاپ ءَ گیش بوھوکیں نفرت ءِ سبب ءَ جھان ءِ تک ءَ کش ءُ چیل آنی تہ ءَ ھم گیشی اتک کنت۔ سردار ایاز صادق ءَ گوشت کہ اسلام امن، برداشت ءُ انسانیت ءِ احترام ءِ سکین ءَ دنت، اسلاموفوبیا ءُ مذہبی تعصب ءِ ھلاسی ءِ واستہ عملی گامگیج المی انت۔