سینیٹ ءِ چیئرمین ءَ چہ میاں اوستمانی براتی ءَ لوٹ کتگ کہ آ سرجمیں دگنیا ءَ مسلمانانی ھلاپ ءَ گیش بوھوکیں تعصب ءِ ھلاسی ءِ ھاترا یکجاھیں گامگیج بہ زور اَنت

اسلام آباد۔15مارچ  (اے پی پی):اسلاموفوبیا ءِ ھلاپ ءَ میاں اوستمانی روچ ءِ موہ ءَ سینیٹ ءِ چیئرمین سید یوسف رضا گیلانی ءَ میاں اوستمانی براتی ءَ چہ لوٹ کتگ کہ آ سرجمیں دگنیا ءَ مسلمان آنی ھلاپ ءَ گیش بوھوکیں نفرت، تعصب ءُ تبعیض ءِ لیکہ آنی گر ءُ دار ءِ واستہ یکجائی گامگیج بہ زور اَنت۔ سینیٹ ءِ سیکرٹریٹ ءَ چہ شنگ بوتگیں وتی کلوہ ءِ تہ ءَ آئی ءَ گوشت کہ جتا جتائیں چاگرد آنی تہ ءَ اسلاموفوبیا ءِ برجاھی ءَ چہ برابری، انسانی شرپ ءُ مذھبی آجوئی ءِ بنیاتی رھبند آناں ھراب کنگ بوھگ ءَ اِنت چوش کہ میاں اوستمانی کانود ءُ اقوام متحدہ ءِ منشور ءِ تہ ءَ ھوار اَنت۔ آئی ءَ اے گپ ءِ سر ءَ جیڈھ ءِ درشانی کت کہ دگنیا ءِ جتا جتائیں دمگ آنی تہ ءَ مسلمان ءُ عبادت جاھانی سر ءَ نفرت انگیزیں گپ ، تبعیض ءُ اُرش ءِ وئیل پیداک بوھگ ءَ اَنت کہ اے امن ءُ ایمنی ءِ ھمراھی ءُ چاگردی ھمگرنچی ءِ واستہ مزنیں چیلنج اِنت۔ سینیٹ ءِ چیئرمین ءَ گوشت کہ اسلام یک انچیں مذہب انت کہ امن ءُ انصاف ءِ سکین ءَ دنت۔ آئی ءَ اے گپ ءِ سر ءَ زور پر دات کہ تہذیب ءُ مذہب آنی نیام ءَ رواداری ءُ یکے دومی ءِ احترام ءِ دیمروئی ءِ ھاترا جھان ءِ استحکام ءُ ھمگرنچی ءِ واستہ المی اِنت۔ آئی ءَ حکومت، پارلیمنٹ، میاں اوستمانی گل ءُ سول سوسائٹی ءَ را زور پر دات کہ آ مذہبی نا رواداری ءِ ھلاسی ءُ درستیں چاگرد آنی ھک ءُ آجوئی آنی رکھینگ ءِ واستہ موثر قانون ساز، پالیسی ءُ ادارگی گامگیج آناں مھکم بہ کن اَنت۔ سید یوسف رضا گیلانی ءَ بین المذاہب یکوئی، درستیں مذہب آنی احترام ءُ اقلیت آنی ھک آنی رکھینگ ءِ واستہ پاکستان ءِ اصولی عزم ءِ پدر کنگ ءَ گوشت کہ اسلاموفوبیا ءِ ھلاپ ءَ جنگ سرجمیں میاں اوستمانی براتی ءِ یکجائی ذمہ واری اِنت۔ آئی ءَ میاں اوستمانی براتی ءَ را زور پر دات کہ آ یکے دومی ءِ سر ءَ سرپدی، ھوار کنگ ءُ تنوع ءِ احترام ءَ را گیش کنگ ءِ واستہ یکجائی کوشست بہ کن اَنت تانکہ گیش امن ءُ انصاف ءِ دگنیا ءِ بنیات ایر کنگ بہ بیت۔