مزن وزیر ءَ وردن ءُ وراک ءِ چیز آنی لوٹ ءُ گزر ءِ سر ءَ چار ءُ بچار کنگ ءِ پنت ءُ شون

لاہور۔15مارچ  (اے پی پی):مزن وزیر محمد شہباز شریف ءَ ملک ءِ وردن ءِ ضلورت آنی واستہ وردن ءُ وراک ءِ سپلائی ءُ لوٹ ءِ سر ءَ نگرانی کنگ ءُ پاکستان ءِ وردن ءِ ضلورت آناں تاوان مہ دنت ءُ سرپلس وردن ءِ چیز آنی خلیج ملک آناں برآمد کنگ ءِ واستہ یک جامع ایکشن پلان ءِ جوڑ کنگ ءِ پنت ءُ شون کتگ۔ خطہ ءِ بدل بوھوکیں جاور ھال آنی رد ءَ یک شمبے ءِ روچ ءَ مزن وزیر محمد شہباز شریف ءِ سروکی ءَ ملک ءَ وردن ءِ جاور ھال ءُ سرپلس ضروری چیز آنی برآمد ءِ ھوالگ ءَ چار ءُ تپاسی دیوان برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ دیوان ءَ گشتانک دیان ءَ پنت ءُ شون کت کہ ملک ءِ وردن ءُ وراک ءِ ضلورت آنی واستہ وردن ءُ وراک ءِ چیز آنی سپلائی ءُ لوٹ ءِ سر ءَ سرجمی ءَ چار ءُ بچار کنگ بہ بیت۔ مزن وزیر ءَ را بریفنگ ءِ تہ ءَ گوشگ بوت کہ پاکستان ءَ وردن ءُ وراک ءِ چیز آنی ٹوھیں اسٹاک است انت، ھچ چیز ءِ کمی نیست انت۔ مزن وزیر ءَ گوشت کہ گلوبل سپلائی چینز ءِ سر ءَ اثر ءِ سبب ءَ خطہ ءَ پاکستانی مصنوعات ءِ برآمد ءِ گنجائش گیش بوتگ۔ آئی ءَ پنت ءُ شون کت کہ استیں جاور ھال آنی تہ ءَ خلیج ءِ ملک آنی لوٹ ءِ وردن ءُ وراک ءِ چیز آنی پھجارینگ ءُ آوانی وردن ءُ وراک ءِ ایمنی ءِ ھیال داری کنگ بہ بیت۔ خلیج ءِ ملک آنی تہ ءَ پرچریں وردن ءِ چیز آنی برآمد کنگ ءِ واستہ یک سرجمیں ایکشن پلان ءِ جوڑ کنگ بہ بیت کہ ایشی ءَ چہ پاکستان ءِ وردن ءِ لوٹ آناں تاوان مہ رسیت۔ مزن وزیر ءَ گوشت کہ براتیں خلیج ءِ ملک آناں وردن ءُ وراک ءِ سامان آنی برآمد کنگ ءِ وھد ءَ مزنیں کوالٹی ءَ را دل یکیمی کنگ بہ بیت۔ مزن وزیر ءَ پنت ءُ شون کت کہ پی این ایس سی ءِ دریائی راہ ءِ وسیلگ ءَ براتیں خلیج ءِ ملک آناں وردن ءُ وراک ءِ سامان برآمد کنگ ءِ واستہ المی ئیں گامگیج چست کنگ بہ بنت۔ دیوان ءَ ملک ءِ تہ ءَ استیں ذخائر ءُ وردن ءُ وراک ءِ پیداوار ءِ بابت ءَ سرپدی دیگ بوت، ایشی ءِ تہ ءَ گوشت بوت کہ پاکستان ءِ زرعی سامان، گوشت، پولٹری، ڈیری ءُ سی فوڈ ءَ ھوار زرعی شوبگ ءِ تہ ءَ برآمداتی مزنیں گنجائش است انت۔ مزن وزیر ءَ اے درگت ءَ کمیٹی ءِ جوڑ کنگ ءِپنت ءُ شون کت، کمیٹی ھمک روچ ءِ جاور آنی چار ءُ تپاسی ءَ کنت۔ مزن وزیر ءَ براتیں خلیج ءِ ملک آنی تہ ءَ تعیناتیں سفیر ءُ تجارتی افسر آناں سرگرم بوھگ ءِ پنت ءُ شون کتگ۔ گند ءُ نند ءَ نائب مزن وزیر ءُ دری کارانی وزیر اسحاق ڈار، وفاقی وزیر جام کمال خان، رانا تنویر حسین، احد خان چیمہ، اسپیشل اسسٹنٹ ہارون اختر ءُ ہمگرنچیں مزن مزنیں حکام ءَ شریک بوتگ۔ دیوان ءَ صوبائی چیف سیکرٹری ءُ ہمگرنچیں شعبہ آنی پرائیویٹ انجمن آنی نمائندگ ہم بہر زورگ بوتگ انت۔