ما سرجمیں دگنیا ءِ مسلمانانی ھلاپ ءَ نفرت، تبعیض ءُ عدم برداشت ءِ ھلاپ ءَ یکجاہ اوشتاتگیں، اسلاموفوبیا ءِ ھلاسی ءِ میاں اوستمانی روچ ءِ موہ ءَ صدر آصف علی زرداری ءِ پیغام

اسلام آباد۔15مارچ  (اے پی پی):صدر آصف علی زرداری ءَ گوشت کہ اسلاموفوبیا ءِ ھلاسی ءِ میاں اوستمانی روچ ءِ موہ ءَ ما اقوام متحدہ ءِ جنرل اسمبلی ءِ قرارداد ءِ رد ءَ سرجمیں دگنیا ءَ مسلمان آنی ھلاپ ءَ نفرت، مہکم ءُ بے برداشت ءِ ھلاپ ءَ یکجائی ءَ اوشتاتگ آں۔ صدر ءِ مملکت ءَ اسلاموفوبیا ءِ ھلاسی ءِ میاں اوستمانی روچ (15مارچ 2026) ءِ موہ ءَ وتی کلوہ ءِ تہ ءَ گوشت کہ اے روچ ءَ مسلمان کمیونٹیز ءِ دیم ءَ اتکگیں تعصب ءُ زوراکی ءِ گیش بوھوکیں وئیل آنی نیمگ ءَ دلگوشی دیگ بیت ءُ مذہبی تنوع ءُ رواداری ءِ احترام ءِ ضلورت ءِ سر ءَ زور پر دیگ بیت۔ آئی ءَ گوشت کہ اے روچ کرائسٹ چرچ ءِ ھما غمناکیں وئیل ءِ ھم یات ءَ دنت کہ ایشی ءَ انسانیت ءِ ضمیر ءِ سرا زھر شانی کتگ۔ صدر ئِ مملکت ئَ گوشت کہ اسلاموفوبیا بازیں رنگ ئَ گندگ بیت ایشی ئِ تہ ئَ نفرت انگیزیں گشتانک، مذھبی علامت ءُ عبادت جاھ آنی سر ئَ اُرش ھوار اَنت۔ چُشیں کار انسانی بنیاتی حقانی لگتمالی کن اَنت ءُ اے بنیاتی رھبند ءِ ھم ھلاپ اَنت کہ درستیں انسان کانود ءِ دیم ءَ برابر اَنت۔ آئی ءَ گوشت کہ اسلام امن، شفقت ءُ انصاف ءِ درس ءَ دنت ءُ اے چہ عقیدہ، نسل ءُ پسماندہ ءَ ابید سرجمیں انسانیت ءِ احترام ءِ حمایت کنت۔ صدر آصف علی زرداری ءَ گوشت کہ اسلام ءَ را انتہا پسندی یا زوراکی ءَ گوں ھمگرنچ کنگ ءِ کوشست جہالت ءِ درشان انت ءُ تہذیب آنی نیام ءَ گپ ءُ تران ءُ وت مہ وتی تپاکی ءِ دیمروئی ءِ کوشست آناں را ھراب کنت۔ آئی ءَ گوشت کہ انسانی ھک آنی جھان ءِ جار ءِ تہ ءَ اے گپ ءِ پدر کنگ بیت کہ درستیں انسان آزات ءُ ھک آنی تہ ءَ برابر پیداک بنت۔ اے اعلامیہ ءِ بند 2 ءَ اے گپ پدر کتگ کہ ہرکس اے درستیں حقانی حقدار اِنت ءُ ہچ وڑیں فرق ءُ تپاوت ءِ ہست نہ اِنت، چہ ایشی ءَ ابید مذہبی ہم۔ اے رہبند یک منصفانہ عالمی نظم ءِ کلید انت۔ صدر ءِ مملکت ءَ گوشت کہ پاکستان ءَ انسانی ھک آنی بازیں میاں اوستمانی کنونشن آناں منظوری داتگ، ما میاں اوستمانی فورم ءُ کانفرنس آنی تہ ءَ اسلاموفوبیا ءِ ھلاپ ءَ مدام وتی توار چست کنگ ءَ بوتگ آں۔ آئی ءَ گوشت کہ لبز ءِ آجوئی یک بنیاتی ھکے بلے ایشی ءِ تہ ءَ یک ذمہ واری یے ھم ایر کنگ بیت، ایشی ءَ چہ نفرت یا تپاکی پیداک کنگ ءِ واستہ کارمرد کنگ مہ بیت۔ صدر ئِ مملکت ئَ گوشت کہ میاں اوستمانی براتی نفرت ئِ جرم آنی ھلاپ ئَ کانودی رکھینگ ئَ مھکم کنگ ءُ مذہبی رہشون، اکیڈمک ءُ رسانکدر ئِ نیام ئَ عملی کمک ئَ را دیم ئَ برگ بہ بیت۔ آئی ءَ گوشت کہ سرجمیں دگنیا ءَ لکاں پاکستانی درملک ءَ نشتگ اَنت، آ کاروبار کن اَنت، اسپتال آنی تہ ءَ ازمت کن اَنت، یونیورسٹی آنی تہ ءَ وانگ ءَ اَنت ءُ اے چاگرد آنی دیمروئی ءَ وتی کرد ءَ پیلو کن اَنت۔ صدر ءِ مملکت ءَ گوشت کہ وھدے مسلمان آنی ھلاپ ءَ تعصب گیش بیت گڈا ایشی ءَ چہ آوانی ایمنی ءِ مارشت ءُ روزگار ءُ وانگ ءُ زانگ ءِ وسیلگ آناں تاوان رسیت۔ آئی ءَ گوشت کہ ھچ مردم ءِ سر ءَ آئی ءِ ایمان ءِ بنیاد ءَ جست کنگ یا رد کنگ مہ بیت۔ صدر آصف علی زرداری ءَ گوشت کہ پاکستان ءَ ما اے گپ ءَ را دل یکیمی کن ایں کہ غیر مسلم شہری سرکاری آسراتی، اسکول ءُ نوکری آنی تہ ءَ بے رکاوٹ ءَ سر بہ بنت ءُ آوانی توار بنجاہی کونسل ءُ راجی مناظرہ آنی تہ ءَ گوشدارگ بہ بیت۔ آئی ءَ گوشت کہ وفاقی کابینہ ءَ ’’بین المذاہب ہم آہنگی ءِ پالیسی‘‘ ءُ ’’مذہبی رواداری ءِ حکمت عملی‘‘ ءِ منظوری داتگ، پارلیمنٹ ءَ اقلیت آنی ھک ءِ راجی کمیشن ایکٹ 2025 ءِ منظوری داتگ، وھدیکہ اقلیت آنی ھک آنی رکھینگ ءِ واستہ نوں یک آزاتیں راجی کمیشن ءِ جوڑ کنگ بوھگ ءَ اِنت۔ صدر ءِ مملکت ءَ گوشت کہ من سرجمیں دگنیا ءِ حکومت، سول سوسائٹی، میڈیا ءُ مذھبی سروک آناں لوٹ کن آں کہ آ تعصب ءَ را رد بہ کن اَنت ءُ گپ ءُ تران ءُ کانود ءِ وسیلگ ءَ یکجائی ءَ کار بہ کن اَنت۔ آئی ءَ گوشت کہ مذھبی عقائد ءِ احترام ءُ کانود ءِ چیر دستی ءَ برابر ءِ رکھینگ اختیاری اصول نہ انت بلکیں واجب انت۔ صدر ءِ مملکت ءَ گوشت کہ پاکستان اے اصول آنی حمایت ءَ ملک ءُ درملک ءَ وتی توار چست کنت ءُ وتی کرد ءَ را برجائی ءَ پیلو کنت۔