حکومت ءِ اولی ترجی سرجمیں ملک ءَ پٹرولیم ءِ چیز آنی بے رکاوٹیں سپلائی ءَ را دل یکیمی کنگ اِنت، الس ءِ سر ءَ ممکنہ مالی بوجھ ءَ را کم چہ کم کنگ ءِ ھم کوشست کنگ بوھگ ءَ اِنت، وفاقی وزیر خزانہ ءُ آمدنی محمد اورنگزیب

اسلام آباد۔14مارچ  (اے پی پی):وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ حکومت ءِ اولی ترجی سرجمیں ملک ءَ پٹرولیم ءِ چیز آنی بے رکاوٹیں سپلائی ءَ را دل یکیمی کنگ اِنت، الس ءِ سر ءَ استحکام ءِ ممکنہ بوجھ ءَ را کم چہ کم کنگ ءِ کوشست ھم کنگ بوھگ ءَ اِنت، حکومت   مارکیٹ ءِ تہ ءَ سرجمیں رنگ ءَ برجم دارگ ءِ ھاترا جھد کنگ ءَ اِنت۔ سپلائی چین ءَ را بے رکاوٹ ءَ برجاہ دارگ۔ اے ھیالانی درشانی آئی ءَ پٹرولیم ءِ چیز آنی نہاد آنی سر ءَ چار ءُ تپاسی ءِ واستہ وتی سروکی ءَ جوڑ بوتگیں کمیٹی ءِ ورچوئل دیوان ءَ گوں گشتانک دیان ءَ کت۔ گند ءُ نند ءَ پٹرولیم ءِ وفاقی وزیر علی پرویز ملک، راجی وردن ءُ وراک ءِ سلامتی ءُ پٹ ءُ پول ءِ وفاقی وزیر رانا تنویر حسین، خزانہ ءِ وزیر مملکت بلال اظہر کیانی، پاکستان ءِ اسٹیٹ بینک ءِ گورنر ءُ سیادی داروکیں وزارت، ڈویژن ءُ ریگولیٹری بوڈی ءِ مزنیں کارندہ آں بہر زرتگ۔ دیوان ءَ توانائی ءِ شوبگ ، ایندھن ءِ ذخیرہ ءُ سپلائی چین ءِ جاور ھال ءِ سر ءَ سرجمی ءَ چار ءُ تپاسی کنگ بوت ءُ شریکیں مردم آناں خام تیل ءُ ریفائنڈ پٹرولیم ءِ چیز آنی راجی ذخیرہ ، جاری درآمد ءِ بندوبست ءُ سپلائی چین ءِ نظام ءِ بابت ءَ سرپد کنگ بوت۔ حکام ءَ گوشت کہ اے وھد ءَ لھتیں کارگو روٹ ءَ اَنت وھدیکہ راجی ذخائر ءَ را گیش مھکم کنگ ءِ واستہ گیشیں درآمد ءِ کھیپ آنی بندوبست کنگ بوھگ ءَ اِنت۔ کمیٹی ءَ اے گپ ءِ سر ءَ دل یکیمی ءِ درشان کت کہ ملک ءَ پٹرولیم مصنوعات ءِ ذخیرہ تسلی ءِ تک ءَ انت ءُ سپلائی چین جوانیں رنگ ءَ کار کنگ ءَ انت۔ حکام ءِ رد ءَ آیوکیں ہفتگاں سوخت ءِ رسگ ءِ برجاہ دارگ ءِ ھاتر ءَ جوانیں بندوبست کنگ بوتگ۔ گند ءُ نند ءَ جہانی خام تیل ءُ ریفائنڈ پٹرولیم پروڈکٹس مارکیٹ ءِ تہ ءَ نوکیں دیمروئی آنی سر ءَ ھم چار ءُ تپاسی کنگ بوت۔ شریکیں مردم آناں سرپدی دیگ بوت کہ دمگ ءِ جیوپولیٹکل جاور ھال آنی سبب ءَ گوستگیں روچ آنی تہ ءَ توانائی ءِ جھان ءِ مارکیٹ آنی تہ ءَ بے وسی ءُ نرخ آنی ردوم ءِ گندگ بوتگ۔ کمیٹی ءِ باسکاں میاں اوستمانی نرخانی رجحان، خام تیل ءِ گلوبل بینچ مارک ءِ نقل و حرکت ءُ ریفائنڈ پروڈکٹس ءِ مارکیٹ ءِ جاور ھال آنی سر ءَ چار ءُ تپاسی کتگ۔ گند ءُ نند ءَ اے گپ ءِ سر ءَ ھم تران کنگ بوت کہ گلوبل مارکیٹ ءِ تہ ءَ بوت کنوکیں بدلی پاکستان ءِ توانائی ءِ شوبگ ءُ سرجمیں معیشت ءِ سر ءَ چونیں اثر مند بوت کن اَنت۔ کمیٹی ءَ را سرپد کنگ بوت کہ حکومت میاں اوستمانی مارکیٹ آنی تہ ءَ جاور ھال آنی سر ءَ مدام نگرانی کنگ ءَ اِنت ءُ توان ءِ سلامتی ءُ اقتصادی برجائی ءَ را دل یکیمی کنگ ءِ واستہ جتا جتائیں ممکنہ منظرنامہ آنی سر ءَ منصوبگ بندی کنگ ءَ اِنت۔ گند ءُ نند ءَ خام تیل ءِ درآمد، ریفائنری ءِ کارکردگی ءُ دریائی ٹرانسپورٹ ءِ ھوالگ ءَ بندوبست آنی سر ءَ ھم چار ءُ تپاسی کنگ بوت۔ سیادی داروکیں واکداراں کمیٹی ءَ را سرپد کت کہ کارگو ءِ روگ ءُ آیگ ءِ آسراتی، ریفائنری آنی پیداواری گنجائش ءِ برجائی ءُ پٹرولیم سپلائی چین ءِ بے رکاوٹیں کارکردگی ءَ را دل یکیمی کنگ ءِ واستہ جتا جتائیں گامگیج کنگ بوھگ ءَ انت۔ کمیٹی ءَ اے گپ ءِ سر ءَ زور پر دات کہ ریفائنری، آئل مارکیٹنگ کمپنی ءُ سیادی داروکیں سرکاری ادارگ آنی نیام ءَ نزیکیں ھمگرنچی ءُ ھمگرنچی برجائی کنگ بہ بیت تانکہ سرجمیں ملک ءَ پٹرولیم ءِ چیز آنی برجاھیں ءُ بے رکاوٹیں سپلائی ءَ را دل یکیمی کنگ بہ بیت۔ گند ءُ نند ءَ ڈیزل، پٹرول، ایوی ایشن فیول ءُ ایل پی جی ءِ آیوکیں سپلائی ءِ جاور ھال ءِ ھوالگ ءَ ھم سرپد کنگ بوت۔ کمیٹی ءَ را گوشگ بوت کہ استیں سپلائی ءُ شیڈول بوتگیں درآمد آیوکیں ہفتگ آنی تہ ءَ ملکی لوٹ ءِ پیلو کنگ ءِ واستہ کفی انت۔ سیادی داروکیں ادارگ اسٹاک ءِ کچ، جہاز ءِ رؤگ ءُ آیگ ءُ بہر ءُ بانگ ءِ نظام ءِ سر ءَ مدام نگرانی کنگ ءَ اَنت دانکہ مارکیٹ ءَ ایندھن ءِ سپلائی ءَ را ھچ وڑیں تاوان مہ رسیت۔ دیوان ءَ سپلائی ءِ گوما ایندھن ءِ جوانیں کارمردی ءُ ڈیمانڈ مینجمنٹ ءِ ھوالگ ءَ جتا جتائیں گامگیج آنی سر ءَ ھم چار ءُ تپاسی کنگ بوت۔ اے گامگیج آنی مول ءُ مراد جھان ءِ نرخ آنی تہ ءَ اتار چڑھاؤ ءِ وھد ءَ درآمد ءِ دباؤ ءَ را کم کنگ اِنت۔ اے درگت ءَ سرکاری ادارگ آنی تہ ءَ زمہ واریں ایندھن ءِ کارمردی ءُ بچت ءِ گامگیج آنی سر ءَ ھم گپ ءُ تران کنگ بوت۔ ایشی ءَ ابید کمیٹی ءَ پٹرولیم سپلائی چین ءِ نگرانی ءِ نظام ءَ را گیش مھکم کنگ ءِ تہ ءَ بوتگیں پیشرفت ءِ سر ءَ چار ءُ تپاسی کت۔ اے ھاتر ءَ ڈیجیٹل ڈیش بورڈ جوڑ کنگ بوھگ ءَ اِنت کہ ایشی ءِ وسیلگ ءَ ذخائر، ڈپو ءُ خوردہ ءِ تک ءَ سپلائی ءِ جاور ھال ءِ سر ءَ ریئل ٹائم ءَ نگرانی کنگ بیت۔ گند ءُ نند ءَ اے گپ ءِ سر ءَ تپاک کنگ بوت کہ ڈیٹا ءِ جوانیں یکجا کنگ ءُ نگرانی ءِ نظام ءَ چہ پالیسی جوڑ کنگ ءُ وھد ءِ سر ءَ پیسلہ آنی تہ ءَ گیش گہتری کیت۔ دیوان ءِ سروکی کنان ءَ وفاقی وزیر خزانہ محمد اورنگزیب ءَ گوشت کہ حکومت ءِ اولی ترجی سرجمیں ملک ءَ پٹرولیم ءِ چیز آنی بے رکاوٹیں سپلائی ءَ را دل یکیمی کنگ اِنت وھدیکہ الس ءِ سر ءَ ممکنہ مالی بوجھ ءَ را کم چہ کم کنگ ءِ واستہ ھم کوشست کنگ بوھگ ءَ اِنت۔ آئی ءَ گوشت کہ اگاں اے وھد ءَ گلوبل انرجی مارکیٹ بے وسی ءِ آماچ انت بلے وھد ءِ سر ءَ منصوبگ بندی ءُ سیادی داروکیں ادارگ آنی نیام ءَ نزیکیں رابطہ ءِ سبب ءَ پاکستان ءَ ایندھن ءِ سپلائی ءِ جاور ھال برجم انت۔ وزیر خزانہ ءَ گیش گوشت کہ کمیٹی ءِ تہ ءَ میاں اوستمانی توانائی ءِ مارکیٹ، ملکی ذخائر ءُ سپلائی چین ءِ جاور ھال آنی سر ءَ روچ پہ روچ چار ءُ تپاسی کنگ بیت تانکہ وھد ءِ سر ءَ ءُ جوانیں پالیسی پیسلہ کنگ بہ بیت۔ آئی ءَ یک رندے پدا گوشت کہ حکومت توانائی ءِ سلامتی ءَ را دل یکیمی کنگ، مارکیٹ ءِ استحکام ءَ را برجم دارگ ءُ بے رکاوٹیں سپلائی چین ءَ را دل یکیمی کنگ ءِ واستہ سرجمیں رنگ ءَ جزم اِنت۔