چین ءَ ایران ءِ اسکول ءِ سر ءَ امریکہ ءُ اسرائیل ءِ اُرش ءَ بیران بوتگیں نودربرانی مات ءُ پتانی واستہ دو لکھ ڈالر کمک ءِ جار جتگ

بیجنگ۔14مارچ  (اے پی پی):چین ءَ ایران ءِ یک وانگجاھے ءِ سر ءَ امریکہ ءُ اسرائیل ءِ اُرش ءَ بیران بوتگیں نودربرانی مات ءُ پتانی واستہ دو لکھ ڈالر ءِ کمک ءِ جار جتگ۔ العربیہ اردو ءَ چین ءِ دری کارانی وزارت ءِ رد ءَ گشتگ کہ چینی صلیب سرخ سوسائٹی ءِ نیمگ ءَ چہ ایران ءِ ہلال سرخ سوسائٹی ءَ 200 ہزار ڈالر ءِ کمک پہ ہنگامی انسانی کمک ءِ ھاتر ءَ ، ھاسیں رنگ ءَ شہید بوتگیں نودربر آنی مات ءُ پت آنی دلپدردی ءُ تاوان ءِ ھاتر ءَ کمک کنگ بیت۔ وزارت ءِ جارکش گو جیاکن ءَ نیوز بریفنگ ءِ وھد ءَ اے مہلکیں اُرش ءَ را میاں اوستمانی انسانی کمک ءِ کانود ءِ مزنیں خلاف ورزی لیک اِتگ۔ آئی ءَ گوشت کہ اسکول ءُ زھگ آنی سر ءَ اُرش میاں اوستمانی انسانی کانود ءِ مزنیں لگتمالی اِنت ءُ انسانی ضمیر ءُ اخلاقیات ءِ چیر تریں تک ءَ چہ دیم ءَ روت۔ آئی ءَ گوشت کہ چین اے گرانیں وھد ءَ ایران ءِ الس ءِ کمک ءِ واستہ المی ئیں انسانی کمک پجارینگ ءَ تیار انت۔ ایران ءَ امریکہ ءُ اسرائیل ءِ سر ءَ بھتام جتگ کہ جنگ ءِ اولی روچ ءَ تہران ءِ جنوب ءَ یک وانگجاھے ءِ سر ءَ کشندہیں میزائل اُرش کتگ۔ ایرانی رسانکدر ءِ رپورٹانی رد ءَ اے اُرش ءَ جنکاں ھوار کم چہ کم 165 مردم دفن کنگ بوتگ اَنت بلے اے کساس ءِ آزاتیں رنگ ءَ پٹ ءُ پول نہ بوتگ۔ دومی نیمگ ءَ نیویارک ٹائمز ءَ نبشتہ کتگ کہ امریکی فوجی پٹ ءُ پول ءَ پدر بوتگ کہ آئی ءِ توماہاک میزائل ءِ تیرگواری ءِ سبب ءَ اسکول ءَ لگت داتگ۔ اسرائیل ءَ اے اُرش ءِ تہ ءَ وتی ھچ وڑیں دست مان ءُ سرپدی ءِ رد ءَ رد داتگ۔