ریلوے ءِ وفاقی وزیر محمد حنیف عباسی ءَ لکی مروت ءَ ناشرکارانی ھلاپ ءَ سوبمندیں آپریشن ءِ ھاتر ءَ سی ٹی ڈی ءَ  را توسیپ ءُ ستا

اسلام آباد۔14مارچ  (اے پی پی):ریلوے ءِ وفاقی وزیر محمد حنیف عباسی ءَ خیبر پختونخوا ءِ دمگ لکی مروت ءَ ناشرکار آنی ھلاپ ءَ سوبمندیں آپریشن ءِ واستہ انسداد ناشرکاری ءِ محکمہ ءَ را خراج تحسین پیش کتگ۔ شمبے ءِ روچ ءَ جاڑی بوتگیں بیان ءِ تہ ءَ ریلوے ءِ وزیر ءَ سی ٹی ڈی ءِ کارندہ آنی بہادری ءُ پیشہ وارانہ ازم ءِ توسیپ کتگ ءُ گوشت کہ سیکورٹی فورسز ءَ ناشرکار آنی ھلاپ ءَ سوبمندیں آپریشن کتگ ایشی ءِ تہ ءَ 6 ناشرکار بیران بوتگ اَنت۔ آئی ءَ گوشت کہ ناشرکاری ءِ ھلاپ ءَ جنگ ءَ خیبر پختونخوا ءِ سی ٹی ڈی ءِ نیمگ ءَ پیش داشتگیں بہادری ءُ لگن ستا کرز انت۔ آئی ءَ گوشت کہ سرجمیں راج وتی بہادریں سیکورٹی کارندہ آنی سر ءَ پھر کنت کہ آ ملک ءَ امن ءُ ایمنی ءِ واستہ بے دروریں قربانی دیگ ءَ اَنت۔ محمد حنیف عباسی ءَ گوشت کہ ناشرکاری ءِ ھلاپ ءَ جنگ داں ایشی ءِ سرجمیں ھلاسی ءَ برجاہ مان ایت۔ آئی ءَ اے جزم ءِ یک رندے پدا گوشت کہ پاکستان ءِ اُلس جنگولی ءِ ھلاپ ءَ برجاھیں جنگ ءَ وتی سیکورٹی فورسز ءِ ھمراھی ءَ سرجمی ءَ اوشتاتگ اَنت۔ وفاقی وزیر ءَ کانود ءِ نفاذ ءِ ادارگ آنی پیشہ وارانہ صلاحیت ءِ ھم توسیپ کت ءُ دل یکیمی دات کہ اے وڑیں سوبمندیں آپریشن ناشرکاری ءِ ھلاسی ءِ راجی کوشست آناں گیش مھکم کنت۔