پارلیمانی امور ءِ وفاقی وزیر ڈاکٹر طارق فضل چوہدری ءَ نیشنل پریس کلب ءِ نوکیں گچین بوتگیں سروکی ءَ را مبارک بات داتگ

اسلام آباد۔14مارچ  (اے پی پی):پارلیمانی کارانی وفاقی وزیر ڈاکٹر طارق فضل چوہدری ءَ نیشنل پریس کلب ءِ نوکیں گچین بوتگیں سروکی ءَ را مبارک بات داتگ ءُ گوشت کہ اے سروکی اھوالکار کمیونٹی ءِ گہبود، پریس ءِ آجوئی ءِ دیمروئی ءُ پریس کلب ءِ شرپ ءَ گیش گیش کنگ ءِ واستہ سرجمیں کرد ءَ پیلو کنت۔ شمبے ءِ روچ ءَ سوشل نیٹ ورکنگ ءِ ویب سائٹ ’’ایکس‘‘ ءِ سر ءَ وتی پوسٹ ءِ تہ ءَ وفاقی وزیر ءَ نیشنل پریس کلب ءِ نوک گچین بوتگیں صدر رزاق سیال، سیکرٹری ڈاکٹر فرقان راؤ، سیکرٹری مالیات عابد عباسی ءُ سینئر نائب صدر احتشامل حق ءَ را مبارک بات داتگ۔ آئی ءَ گوشت کہ من عثمان خان ءُ بشیر چوہدری ءَ را نائب صدر، سہریش قریشی ءَ را (زالبول) نائب صدر گچین کنگ ءِ سر ءَ، آون شیرازی، شیراز گردیزی ءُ جاوید بھگت ءَ را مشترکہ سیکرٹری گچین کنگ ءِ سر ءَ مبارکی دیاں۔ وفاقی وزیر ءَ گوشت کہ شکیلہ جلیل ءِ زالبولیں جوائنٹ سیکرٹری ءِ بستار ءَ گچین کنگ ھم وشیں گپ اِنت۔ ڈاکٹر طارق فضل چوہدری ءَ وتی پوسٹ ءِ تہ ءَ اے اُمیت ءِ درشانی کت کہ نیشنل پریس کلب ءِ نوکیں سروکی اھوالکار کمیونٹی ءِ وشھالی، پریس ءِ آجوئی ءِ دیمروئی ءُ نیشنل پریس کلب ءِ شرپ ءِ گیش برز کنگ ءِ تہ ءَ سرجمیں کرد پیلو کنت۔ منی نیکیں واھگ گوں نوکیں گچین بوتگیں سروکی ءَ اَنت۔