راجی اسمبلی ءِ اسپیکر سردار ایاز صادق ءَ بنگلہ دیش ءِ نوک گچین بوتگیں اسپیکر میجر حفیض الدین احمد ءَ را بے مخالفت ءَ اسپیکر گچین بوھگ ءِ سر ءَ مبارکی

اسلام آباد۔14مارچ  (اے پی پی):راجی اسمبلی ءِ اسپیکر سردار ایاز صادق ءَ بنگلہ دیش ءِ نوک گچین بوتگیں اسپیکر میجر حفیض الدین احمد ءَ را بے مخالفت ءِ گچین کاری ءِ سر ءَ مبارکی دات ءُ اے گچین کاری ءَ را آئی ءِ سیاسی ءُ راجی توانائی آنی عکس لیک ات۔ زانگ بہ بیت کہ اسپیکر راجی اسمبلی سردار ایاز صادق ءَ بنگلہ دیش ءِ پارلیمنٹ ءِ گچین بوھگ ءَ چہ  زوتاں  میجر (ر) حفیظ الدین احمد ءَ را مبارکی ءِ پیغام ءُ پاکستان ءِ تر ءُ تاب ءِ دعوت ءِ نمدی دیم داتگ ات، ایشی ءَ پد دوئیں اسپیکر آنی نیام ءَ ٹیلی فون ءِ سرا گپ ءُ تران ھم بوتگ ات کہ آ منت وار ءِ درشان ءِ رد ءَ بوتگ ات۔ بنگلہ دیش ءِ نوک گچین بوتگیں اسپیکر ءَ اسپیکر راجی اسمبلی ءِ منت گپت کہ آئی ءَ وتی سوبمندی ءِ سر ءَ اولی مبارکی پیغام دیم داتگ۔ قومی اسمبلی ءِ سیکرٹریٹ ءِ رد ءَ گپ ءُ تران ءِ ساھت ءَ دوئیں راہشوناں پاکستان ءُ بنگلہ دیش ءِ نیام ءَ پارلیمانی سیادی ءَ را گیش مھکم کنگ ءِ جتا جتائیں تک ءُ پھناتانی سر ءَ ھیال ریچی کتگ ۔ راجی اسمبلی ءِ اسپیکر سردار ایاز صادق ءَ بنگلہ دیش ءِ پارلیمنٹ ءِ گوما پارلیمانی کمک، وت مہ وتی رابطہ ءُ تجروبت آنی مٹ ءُ بدلی ءَ را گیش کنگ ءِ واستہ وتی جزم ءِ پدا زور دات۔ دوئیں ھمکاراں وت مہ وتی مفاد، دمگی کمک ءُ پارلیمانی سفارتکاری ءِ دیمروئی ءِ جیڈھ آنی سر ءَ ھم سرجمیں رنگ ءَ گپ ءُ تران کتگ۔ اسپیکر قومی اسمبلی ءَ اے امیت سہرا کت کہ دوئیں ملک آنی پارلیمنٹ آنی نیام ءَ رابطہ آنی دیمروئی ءَ چہ دو نیمگی سیادی ءَ را گیش مھکم بیت۔ راجی اسمبلی ءِ اسپیکر سردار ایاز صادق ءَ بنگلہ دیش ءِ نوکیں گچین بوتگیں اسپیکر میجر حفیض الدین احمد ءَ را پاکستان ءِ تر ءُ تاب ءِ دعوت دات ءُ گوشت کہ پاکستان ءِ پارلیمنٹ ءُ الس آئی ءِ تر ءُ تاب ءِ ودار ءَ دار اَنت۔ بنگلہ دیش ءِ صدر ءَ اسپیکر راجی اسمبلی ءِ پاکستان ءِ تر ءُ تاب ءِ دعوت من اِتگ ءُ سک زوت پاکستان ءِ تر ءُ تاب ءِ جزم ءِ درشان کتگ۔ اسپیکر راجی اسمبلی ءَ بنگلہ دیش ءِ نوکیں گچین بوتگیں اسپیکر ءِ واستہ نیکیں واھگ آنی درشان کت ءُ آئی ءِ سوبمندی ءِ واستہ دعا کت۔