ترند گام لائک ءِ دل یکیمی انٹرنیٹ  ملک ءِ معیشت، چاگرد، وانگ ءُ زانگ، جان سلامتی ءُ راجی ایمنی ءِ ھاترا بنیاتی اهمیت ءِ واھند انت، بنجاھی وزیر شزہ فاطمہ خواجہ

اسلام آباد۔12مارچ  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ تیز ءُ معتبریں انٹرنیٹ ملک ءِ معیشت، چاگرد، وانگ ءُ زانگ، جان سلامتی ءُ راجی ایمنی ءِ واستہ بنیاتی ارزشت ءِ واھند اِنت۔ 5جی ءِ نیلامی ءَ چہ نہ ایوک ءَ انٹرنیٹ سروس ءِ پجارینگ ءَ گہتری کیت بلکینگ ءَ مزن وزیر محمد شہباز شریف ءِ ڈیجیٹل پاکستان ءِ وژن ءِ واستہ یک مھکمیں بنیات ءِ ھم جوڑ بیت۔ آئی ءَ اے ھیالانی درشانی 5 جی سپیکٹرم ءِ اسائنمنٹ مراگش ءَ گوں تران کنان ءَ کت۔ آئی ءَ گوشت کہ پاکستان ءَ 5 جی سپیکٹرم ءِ نیلامی ءِ اولی بھر سوبمندیں رنگ ءَ سرجم کنگ بوتگ، ایشی ءِ چیر دستی ءَ 480 میگاہرٹز سپیکٹرم سئے موبائل آپریٹرز جاز، زونگ ءُ یوفون ءَ چہ زرتگ۔ اے نیلامی ءِ وسیلگ ءَ سرکار ءَ 507 ملین ڈالر ءِ نزیک ءَ زرّ زرتگ۔ آئی ءَ گوشت کہ نیلامی ءِ اولی بھر ءَ پد یک روچ ءِ وقفہ ءِ گوما اسائنمنٹ ءِ بھر کنگ بوتگ، ایشی ءِ تہ ءَ جتا جتائیں بینڈ آنی تہ ءَ سپیکٹرم ءِ گڈی بھر ءُ بانگ کنگ بوتگ، وھدیکہ 3.5گیگاہرٹز بینڈ ءِ عمل ءِ ھم باقاعدہ بنگیج کنگ بوتگ۔ شزہ فاطمہ خواجہ ءَ گوشت کہ اے نیلامی بازیں تک ءَ راجدپتری انت چیاکہ اے وڑیں مزنیں کساس ءَ اسپیکٹرم پیسر ءَ کدی نیلامی نہ بوتگ۔ آئی ءَ گوشت کہ پاکستان 1987ءَ چہ کل ءَ ایوک ءَ 274میگا ہرٹز ءِ سپیکٹرم ءِ سر ءَ کار کنگ ءَ بوتگ ایشی ءِ سبب ءَ ملک ءَ را دمگ ءَ سپیکٹرم ءِ کمی ءِ آماچ بوتگ، البت اے نیلامی ءَ پد کلیں سپیکٹرم ءِ کساس 750میگا ہرٹز ءَ سر بوتگ ایشی ءَ چہ نوں پاکستان ءَ را جھان ءِ میانگین ءِ نزیک ءَ اتکگ۔ وفاقی وزیر ءَ گوشت کہ مرچیگیں معیشت، چاگرد، وانگ ءُ زانگ، جان سلامتی ءُ راجی سلامتی ءِ واستہ ترند ءُ بھروسہ مندیں انٹرنیٹ بنیاتی ارزشت ءِ دار انت۔ اے نیلامی ءَ چہ نہ ایوک ءَ فور جی سروس گہتر بیت بلکینگ ءَ پاکستان ھم سرکاری رنگ ءَ 5 جی ءِ دور ءَ داخل بیت ایشی ءَ چہ مزن وزیر محمد شہباز شریف ءِ ڈیجیٹل پاکستان ءِ وژن ءِ واستہ یک مھکمیں بنیاتے جوڑ بیت۔ آئی ءَ گوشت کہ نوکیں ٹیکنالوجی ءِ واستہ ھاسیں رنگ ءَ آرٹیفیشل انٹیلی جنس ءُ ایندگر نوکیں ٹیکنالوجی آنی واستہ تیز رفتار انٹرنیٹ ناگزیر اِنت۔ ایشی ءَ چہ ورنا آنی واستہ وانگ ءُ زانگ ءُ روزگار ءِ نوکیں موہ رس ایت، وھدیکہ کشت ءُ کشاری، جان سلامتی ءُ ایندگر شوبگ آنی تہ ءَ ھم ٹیکنالوجی ءِ کارمردی ءَ را گیش ءُ گیوار کنگ بیت ھاسیں رنگ ءَ دوریں دمگ آنی تہ ءَ وانگ ءُ زانگ ءُ جان سلامتی ءِ آسراتی آنی تہ ءَ گہتری کیت۔ چیئرمین پاکستان ٹیلی کمیونیکیشن اتھارٹی میجر جنرل (ریٹائرڈ) حفیظ الرحمن ءَ گوشت کہ سپیکٹرم اسائنمنٹ ءِ عمل سرجمی ءَ سافٹ ویئر ءِ وسیلگ ءَ کنگ بوتگ تانکہ شفافیت ءَ را دل یکیمی کنگ بہ بیت۔ آئی ءَ گوشت کہ فریکوئنسی الوکیشن بورڈ ءُ ٹیلی کام انڈسٹری ءِ کمک ءَ سپیکٹرم ءِ دستیابی ءُ ٹیکنیکل ویریفکیشن پیسر ءَ چہ سرجم کنگ بوتگ۔ آئی ءَ گوشت کہ اسائنمنٹ ءِ پڑ ءَ جتا جتائیں آپریٹر آناں اے آپشن دیگ بوھگ ءَ اِنت کہ آ وتی فریکوئنسی ءِ گڈی پوزیشن (بُرز، میان یا چیر) ءَ وتی وتی بینڈ ءَ گچین بہ کن اَنت۔