ڈیجیٹل دیمروئی ءُ ڈیجیٹل سرمایہ کاری ءِ تہا سرجمیں دل یکیمی پیداک کنگ ءِ ھاتر ءَ ملک ءَ سائبر سیکورٹی ءِ مھکم کنگ المی انت، وفاقی وزیر آئی ٹی

اسلام آباد۔11مارچ  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ ڈیجیٹل دیمروئی ءُ ڈیجیٹل سرمایہ کاری ءِ تہ ءَ سرجمیں دل یکیمی پیداک کنگ ءِ واستہ ملک ءَ سائبر سیکورٹی ءِ مھکم کنگ المی اِنت۔ چہ گیش سرکاری ازمت آناں سرجمی ءَ ڈیجیٹل کنگ بوتگ ءُ موبائل ایپس ءِ وسیلگ ءَ ناڈرا ءِ کاگد آناں رسائی ممکن کنگ بوھگ ءَ اِنت۔ دیمروئی ءُ سرمایہ کاری ءِ ھاتر ءَ سائبر سیکورٹی ءِ رد ءَ ملک ءِ کانود، رھبند ءُ نظام آناں گیش مھکم کنگ المی اِنت۔ آئی ءَ اے ھیالانی درشانی چار شمبے ءِ روچ ءَ سائبر سیکورٹی ءِ ھوالگ ءَ مراگش ءَ گوں تران کنان ءَ کت۔ داں وھدیکہ پاکستان ءَ مھکمیں سائبر سیکورٹی سسٹم جوڑ نہ بیت ڈیجیٹل سرمایہ کاری ممکن نہ بیت۔ سرمایہ کاری ءُ کاروباری موہانی سرا سرجمیں دل یکیمی نہ بیت۔ آئی ءَ گوشت کہ سائبر سیکورٹی ایوک ءَ ٹیکنالوجی ءِ جیڈھ نہ انت بلکینگ ءَ اے ذاتی پجار، ذاتی سیکورٹی، گس ءُ ھاندان آنی رکھینگ ءَ تاں راجی سیکورٹی ءَ چہ ھمک شہری ءِ ھمک پڑ ءَ گوں بندوک انت۔ وفاقی وزیر ءَ گوشت کہ معیشت ڈیجیٹلائزیشن ءِ نیمگ ءَ روگ ءَ انت، ایشی ءِ تہ ءَ جان سلامتی ءِ شوبگ ءَ ھم نوکیں ٹیکنالوجی ءِ کارمردی دیم ءَ آیگ ءَ انت۔ اے ٹیکنالوجی نادراھیانی شرتریں درمان ءِ موہاں پچ کنگ ءَ اَنت، البت اے گپ ءِ ھمراھی ءَ ڈیٹا ءِ ناجائز کارمرد کنگ ءِ ھترہ ھم گیش بوھگ ءَ اَنت۔ آئی ءَ گوشت کہ اگاں کسے ءَ را آبادی ءِ ریئل ٹائم ڈیٹا ءِ رسائی ھست گڈا ایشی ءِ نادراھی ءِ امکان ھم گیش بوت کن اَنت، ھمے ھاتر ءَ ڈیٹا ءِ دور ءَ سائبر سیکورٹی ءَ را بے دروریں مھکم کنگ المی اِنت۔ شزہ فاطمہ ءَ گوشت کہ حکومت سائبر سیکورٹی سسٹم ءَ را گیش مھکم کنگ ءِ واستہ گامگیج کنگ ءَ انت ءُ اے درگت ءَ سائبر سیکورٹی ایکٹ ءُ ایشی ءَ گوں سیادی داروکیں ادارگ آناں فعال کنگ ءِ واستہ ھم کار کنگ بوھگ ءَ انت۔ آئی ءَ گیش گوشت کہ سائبر سیکورٹی سک باز المی ئیں شوبگ اِنت ایشی ءِ واستہ جتا جتائیں مہارت آنی ضلورت اِنت ءُ حکومت ایشی ءِ واستہ ھاسیں وسیلگ ءُ ادارگی نظام آناں مھکم کنگ ءَ اِنت تانکہ پاکستان ءَ را ڈیٹا اکانومی ءِ تہ ءَ ایمن ءُ مھکم جوڑ کنگ بہ بیت۔