اسپیکر راجی اسمبلی ءِ پنت ءُ شون ءِ رد ءَ اسمبلی سیکرٹریٹ ءَ کم ھرچ ءُ درچ ءِ گامگیج آنی سر ءَ عمل درآمد کنگ بوتگ

اسلام آباد۔11مارچ  (اے پی پی): راجی اسمبلی ءِ اسپیکر  سردار ایاز صادق ءِ پنت ءُ شون ءِ رد ءَ راجی اسمبلی ءِ سیکرٹریٹ ءَ مزنیں کچے ءَ کم ھرچ ءُ درچ ءِ گامگیج کنگ بوتگ۔ اے درگت ءَ راجی اسمبلی ءِ سیکرٹریٹ ءَ نوٹیفکیشن جاری کتگ ۔ قومی اسمبلی ءِ جارکش ءِ رد ءَ اے نوٹیفکیشن مزن وزیر میان محمد شہباز شریف ءِ کم ھرچ ءُ درچ مہم ءِ چیر دستی ءَ جاری کنگ بوتگ۔ کم ھرچ ءُ درچ ءِ مہم ءِ رد ءَ سرکاری گاڑی آنی 70درسد بند کنگ ءِ پیسلہ کنگ بوتگ۔ دو ماہ ءِ واستہ راجی اسمبلی ءِ باسک آنی پگار ءُ الاؤنس آنی تہ ءَ 25درسد کٹگ بیت۔ پارلیمانی ڈل آنی درملکی تر ءُ تاب آنی سر ءَ سرجمیں پابندی جنگ بوتگ۔ گریڈ بیست ءُ ایشی ءَ چہ گیش ءِ افسر یا ہما افسر کہ آہانی ماہانہ پگار 300 ہزار کلدار یا گیش انت آہانی دو روچی پگار راجی خزانہ ءَ جم کنگ بیت۔ نوٹیفکیشن ءِ رد ءَ سیکرٹریٹ ءِ تہ ءَ سرجمیں گِر ءُ دار زوت بند کنگ بنت، ایوک ءَ روچ ءِ المی ئیں لوٹ آنی واستہ محدودیں گِر ءُ بار ءِ اجازت دیگ بیت۔ راجی اسمبلی ءُ کمیٹیانی دیوان روچ ءِ شپ ءَ چہ پیسر ٹھینگ بنت۔ راجی اسمبلی سیکرٹریٹ ءِ تہ ءَ 80درسد کارندہ چہ لوگ ءَ مجازی کار کن اَنت۔ معیشت ءَ را دل یکیمی کنگ ءِ ھاتر ءَ 80 درسد کارمنداں کہ آ لوگ ءَ چہ کار کنگ ءَ اَنت آھاں گیشیں الاؤنس دیگ نہ بیت۔ قائمہ کمیٹی آنی دیوان ورچوئل یا آن لائن کنگ ءِ پیسلہ کنگ بوتگ۔ قومی اسمبلی ءَ چار کار روچ بنت۔ معیشت ءِ پالیشی ءِ رد ءَ قائمہ کمیٹی آنی دیوان آناں محدود کنگ ءِ پیسلہ کنگ بوتگ۔ بجلی ءِ کارمرز کنگ ءَ 70 درسد کم کنگ ءِ پیسلہ کنگ بوتگ ءُ غیر ضروری لائٹ ءُ بجلی ءِ ساماناں بند کنگ ءِ پنت ءُ شون دیگ بوتگ۔ قومی اسمبلی سیکرٹریٹ ءِ کیفے ٹیریا آنی یوٹیلٹی بل آنی تہ ءَ 70درسد بچت کنگ ءِ پیسلہ کنگ بوتگ۔ روایتی ھرچ ءُ درچ ءَ را گیش کم کنگ ءِ واستہ راجی اسمبلی سیکرٹریٹ ءَ کاگد ءِ رد ءَ کار کنگ ءِ ھم پیسلہ کنگ بوتگ۔