قومی اسمبلی دیوان، فوجداری کانود ترمیمی بل 2025 پین سجفنگ کن موخر

اسلام آباد۔ 10 مارچ (اے پی پی) فوجداری کانود ترمیمی بل 2025 پین سجفنگ کن موخر کننگا۔ سے شنبے نا دے آقومی اسمبلی ٹی ایم کیو ایم نا باسک خواجہ اظہار الحسن پارے کہ موبائل پُلنگ، داڑیلی ، اے ٹی ایم آن پیسہ کشنگ نا وخت آ خون ءِ انسدادِ دہشت گردی کورٹ اٹی بِننگے ۔ بنجائی وزیر پارلیمانی امور ڈاکٹر طارق فضل چوہدری پارے کہ دا بل کمیٹی آن منظور مرسا بسنے نن دادے سپورٹ کینہ ۔ نوید قمر پارے کہ قائمہ کمیٹی ٹی بل آتیا بھاز خوڑتی اٹ سجفنگپک ، خون دہشت گردی نا زمرہ ٹی بفک۔ او پارے کہ محرک آن خواست ءِ کہ او دا بل ءِ تینٹ موخر کے ، دادے سوچ سمجھ کر منظور کے ۔ دا گام آن انسدادِ دہشت گردی نا کورٹ آتیا مقدمہ غاتا بھاریم ودک و داڑآن دہشت گردی نا برخلاف مقدمہ غاتے سرتننگ اٹ تاخیر مریک ۔ خواجہ اظہار پارے کہ ہچ ءُ صوبہ اس، وزارت اس یا قائمہ کمیٹی اسے نا کنڈآن دا بل نا مخالفت ءِ کننگتنے ، بنجائی وزیر ہم مخالفت ءِ کتنے ہنداسوب آن بل ءِ منظور کننگے۔ ڈاکٹر طارق فضل چوہدری پارے کہ نن کانود جوڑ کننگ ءِ امنائی سلاہ اٹ کرینن ، ہڑتوم آ جماعت آک ننکن شرفمند ءُ، ہندا سوب آن بروک آ وخت اکن اودے موخر کننگے۔ ڈپٹی سپیکر بل ءِ بروک آ سیشن اسکان موخرکرے ۔