ایران آن اِرا ہزار شاری و طالب علم آتے بحفاظت کشنگا، ایلو تا پدی ہتنگ کن گام گیج آک جاری ءُ، بنجائی وزیر طارق فضل چوہدری نا قومی اسمبلی ٹی چکاری نوٹس آ ورندی

اسلام آباد۔ 10 مارچ (اے پی پی) قومی اسمبلی ءِ پاننگانے کہ ایران آن اِرا ہزار شاری و طالب علم آتے حفاظتاٹ کشنگانےو ایلو پاکستانی شاری و طالب علم آتا پدی ہتنگ کن گام گیج برجاءِ ۔ سے شنبے نا دے آقومی اسمبلی نا دیوان اٹی ڈاکٹر نفیسہ شاہ، شازیہ مری و ایلوفتاکنڈ آن دا بابت چکاری نوٹس آ بنجائی وزیر پارلیمانی امور ڈاکٹر طارق فضل چوہدری ایوان ءِ پارے کہ دے ٹک نیامی نا حالیت آک گڑتی نا وڑ ءُ۔دے ٹک نیامی و خاص وڑاٹ ایران اٹی پاکستانی طالب علم و شاری تے رکھ اٹ کشنگ ننا اولیت ءِ۔ پاکستانی سفارت خانہ، زاہدان و مشہد نا مشن تے پارت ہم جاری کننگاسس و جوان بندوبست ہم کننگاسس ، دا وخت اسکان 2 ہزار آن زیات طالب علم آتے ہموکان  کشنگانے۔ او پارے کہ تفتان و علی رمدان بارڈرءِ دا مسخت کن کاریم اٹ اتنگ انگ ءِ و آذربائیجان نا کسر ءِ ہم کاریم اٹ اتنگ انگ اٹی ءِ۔ پاکستانی سفارت خانہ ءِ سیکیورٹی نا رداٹ عارضی وڑ اٹ گدریفنگانے ۔بنجائی وزیر پارے کہ ایران آ جلہو نا حالیت آک گھمبیر ءُ ۔ پاکستان تدوک آ مسہ تُو آن سفارت خانہ و مشن تے الرٹ کریسس، سفارت خانہ و مشنز وٹس ایپ گروپس و ایلو ذریعہ اٹ ہم پاکستانی طالب علم و شاری تتون رابطہ تخانے ۔ ڈاکٹر شازیہ مری نا سوج آ او پارے کہ ایران اٹی حالیت آک غیر معمولی ءُ، ننا سفارت خانہ و مشنز پاکستانی طالب علم و شاری تتون رابطہ ٹی ءِ ، سفارت خانہ و مشنز ءِ ہڑدے 500 آن زیات کالین موصول مننگ ءِ ۔ پاکستانی شاری تے رکھ فراوان کننگ ننا اولیت ءِ۔