بنجائی وزیر خزانہ نا اسپیکٹرم نیلامی نا دود آن تران

اسلام آباد۔ 10 مارچ (اے پی پی)  بنجائی وزیر خزانہ و محصولات سینیٹر محمد اورنگزیب پارینے کہ ڈیجیٹل شونداری و گیشتر زرگزرانی و راجی شونداری نا دوئی کننگ نا اسہ ذریعہ اسے۔ گچین ڈیجیٹل رابطہ غان ترند، اڑزان و گچین خذمت آتا فراوانی ءِ ممکن کننگ اٹ کمک رسینگک و زرگزران نا چندی بشخ آتیٹی بے شمار وارخواہی ودی مریک ۔سپیکٹرم نا زیات دستیابی و فائیو جی (5G) خذمت آتا بناء کننگ آن مصنوعی ذہانت ، بلاک چین و ویب 3.0کون آ مون آ بروک ٹیکنالوجی تے ہم مون آ دننگ اٹ کمک رسینگک ہرا نا سوب آن پاکستان اسہ پوسکن ڈیجیٹل زرگزران اسے نا کنڈ آ ہِننگ کیک۔او دا خیال آتا درشانی ءِ سے شنبےنا دے آداڑے پاکستان ٹیلی کمیونیکیشن اتھارٹی(پی ٹی اے) نا کنڈ آن اڈ ہلوک این جی ایم ایس/ فائیو جی سپیکٹرم نیلامی نا دود آن تران اٹی کرے ۔ او نیلامی ءِ اسہ تاریخی ءُ گام اس گوندسا پارے کہ دا گام آن پاکستان نا ڈیجیٹل بدلی ٹی ترندی بریک و ملک انا ڈیجیٹل زرگزران سوگو مریک۔وزیر خزانہ پارے کہ تدوک آ یک و نیم سال اٹی دا نیلامی نا فریم ورک ءِ گڈیکو دروشم اس تننگ کن کروک آ گیشتر کوشست آتا نتیجہ ءِ اینو عملی دروشم اسے ٹی ہُننگ خوشی نا سوب ءِ ۔اوپارے کہ سپیکٹرم کمیٹی، ہرا نا کماشی ءِ او تینٹ کریکہ، سرجمی اٹ سجفنگ آن پد اسہ متوازن فریم ورک اس تیار کرے ہرا نا مسخت اسہ کنڈ آزیات آن زیات ریونیودوئی کننگ و ایلو کنڈ آ پاکستان نا ڈیجیٹل سفر ءِ مون آ دننگ کن اسہ گچین ءُ چاگڑدی نظام اس ودی کننگ ئس۔ وزیر خزانہ دا ہیت انا ہم اعتراف کرے کہ سپیکٹرم نیلامی نا عمل دا کان مست 2021 اٹی وزیر انفارمیشن ٹیکنالوجی نا مسکوہی مد اٹی بناکننگاسس۔